ەلىمىزدە قانت ديابەتىنە شالدىققان ازاماتتاردىڭ ءومىر ساپاسىن جاقسارتۋ ماقساتىندا كەشەندى شارالار جۇرگىزىلۋدە.
قوعام دەنساۋلىعىنا ەلەۋلى اسەر ەتەتىن بۇل اۋرۋدى ەرتە انىقتاۋ، دۇرىس ەمدەۋ جانە الدىن الۋ ءۇشىن مەملەكەت تاراپىنان تەگىن مەديسينالىق كومەكتى كەڭەيتۋ، ديابەت مەكتەپتەرىنىڭ قىزمەتىن كۇشەيتۋ جانە حالىق اراسىندا تۇراقتى سكرينينگ وتكىزۋ شارالارى قولعا الىنۋدا، دەپ حابارلايدى aqshamnews.kz.
بۇل تۋرالى وڭىرلىك كوممۋنيكاسيالار قىزمەتىنىڭ باسپا ءسوز بريفينگىندە قازاقستان رەسپۋبليكاسىنىڭ ديابەت قاۋىمداستىعىنىڭ (قردق) پرەزيدەنتى بايان جۋمانوۆا مالىمدەدى.
بۇگىنگى كۇنى مەملەكەتىمىزدە 500 مىڭنان استام ادام قانت ديابەتىمەن تىركەلگەن، ولاردىڭ 10%-ى 1ء-شى ءتيپتى، ال 90%-ى 2ء-شى ءتيپتى ديابەتكە شالدىققان. ناۋقاستارعا دۇرىس تاماقتانۋ، قانداعى قانت دەڭگەيىن تۇراقتى باقىلاۋ جانە سالاۋاتتى ءومىر سالتىن ۇستانۋ قاجەتتىگىن ءتۇسىندىرۋ ماقساتىندا ەلىمىزدە ارنايى ديابەت مەكتەپتەرى جۇمىس ىستەيدى.
«ديابەت مەكتەبىندە پاسيەنتتەرگە كومىرسۋلاردى ەسەپتەۋ، ناندىق بىرلىك (حە) قولدانۋ، ينسۋلين مولشەرىن دۇرىس انىقتاۋ جانە فيزيكالىق بەلسەندىلىكتى ساقتاۋ داعدىلارى ۇيرەتىلەدى. بۇل ولاردىڭ اۋرۋىن ءتيىمدى باسقارۋعا جانە ءومىر ساپاسىن ارتتىرۋعا كومەكتەسەدى»، – دەدى بايان جۋمانوۆا.
ديابەتپەن اۋىراتىن ازاماتتاردى تەگىن دارى-دارمەكپەن قامتاماسىز ەتۋ جانە مەديسينالىق كومەك كولەمىن ۇلعايتۋ ماقساتىندا مەملەكەت جاڭا شارالاردى ەنگىزۋدە.
«ەلىمىزدە 1ء-شى ءتيپتى ديابەتپەن اۋىراتىن بارلىق ازاماتتار ينسۋلينمەن تولىقتاي تەگىن قامتاماسىز ەتىلەدى. قوسىمشا قانداعى قانت دەڭگەيىن ولشەيتىن قۇرىلعىلار مەن تەست جولاقتارى دا تەگىن بەرىلەدى. 2ء-شى ءتيپتى ديابەتكە شالدىققاندار ءۇشىن دە تەگىن دارى-دارمەك قاراستىرىلعان، ءبىراق ولار سيرەك قانت ولشەيتىندىكتەن، تەست جولاقتارىنىڭ سانى شەكتەۋلى بولادى»، – دەپ اتاپ ءوتتى بايان جۋمانوۆا.
2024 جىلى ديابەتكە قارسى سكرينينگتىك تەكسەرۋلەر مەن ءبىلىم بەرۋ باعدارلامالارى كەڭەيتىلدى. رەسپۋبليكا وڭىرلەرىندە ەندوكرينولوگتار مەن جالپى تاجىريبە دارىگەرلەرىنە ديابەتتى ەمدەۋ بويىنشا وقۋ سەمينارلارى وتكىزىلدى.
ديابەتتى ەرتە كەزەڭدە انىقتاۋ اسا ماڭىزدى، سەبەبى بۇل اۋرۋدىڭ اسقىنۋ ءقاۋپىن تومەندەتۋگە كومەكتەسەدى. وسىعان بايلانىستى قازاقستاندا ءاربىر ازاماتتىڭ جىلىنا ءبىر رەت قانداعى قانت دەڭگەيىن تەگىن تەكسەرۋ مۇمكىندىگى قاراستىرىلدى.
2024 جىلدىڭ باسىنان بەرى ەلىمىزدە 492 000 ازامات قانت ديابەتى دياگنوزىمەن تىركەلگەن. حالىق اراسىندا ديابەتتى ەرتە انىقتاۋ شارالارىنىڭ كۇشەيتىلۋىنە بايلانىستى اۋرۋدى ەرتە اۋىزدىقتاۋعا مۇمكىندىك تۋىپ وتىر.
«ديابەتتىڭ الدىن الۋ ءۇشىن ونىڭ ەرتە انىقتالۋى وتە ماڭىزدى. سوندىقتان ءبىز سكرينينگتىك باعدارلامالار ارقىلى حالىقتى ۋاقىتىلى تەكسەرۋگە شاقىرامىز. ءاربىر 35 جاستان اسقان ازامات جىلىنا ءبىر رەت قانداعى قانت دەڭگەيىن تەكسەرۋى قاجەت»، – دەپ مالىمدەدى بايان جۋمانوۆا.