قازاقستاندا 173 شيپاجاي-كۋرورتتى مەكەمە جۇمىس ىستەيدى.
سوڭعى جىلدارى ىشكى جانە شەتەلدىك تۋريستەر اراسىندا ساۋىقتىرۋ ءتۋريزمىنىڭ تانىمالدىلىعى ارتىپ كەلەدى، دەپ حابارلايدى Almaty-akshamy.kz.
ەلىمىزدەگى قولايلى كليماتتىق جاعداي، كۇن ساۋلەسى، بىرەگەي مينەرالدى قاينار كوزدەرى مەن ەمدىك بالشىق ورىندارى ەمدەۋ-ساۋىقتىرۋ نىساندارىنىڭ دامۋىنا سەپتىگىن تيگىزۋدە.
مىسالى، وڭتۇستىكتەگى سارىاعاش شيپاجايلارى قابىنۋ پروسەسىن ەمدەۋگە كومەكتەسەتىن جانە ادام اعزاسىنىڭ جالپى جاعدايىنا وڭ اسەر ەتەتىن، سونداي-اق ۇزاق مەرزىمدى اۋرۋدان كەيىن يممۋنيتەتتى قالپىنا كەلتىرۋگە كومەكتەسەتىن مينەرالدى قاينار كوزدەرىمەن تانىمال. ايتا كەتۋ كەرەك، سارىاعاشتىڭ كوكتەرەك كەنتى ەلىمىزدەگى شيپايجايلاردىڭ ەڭ كوپ شوعىرلانعان ورنى.
شىعىستاعى قاتون-قاراعاي تەرمالدى رادون قاينارلارى ەمدىك قاسيەتتەرى بويىنشا حالىقارالىق باسەكەلەستەرىنەن كەم تۇسپەيدى جانە ءارتۇرلى ەندوكريندىك اۋرۋلاردى ەمدەۋگە كومەكتەسەدى. اتالعان ءوڭىردىڭ تابيعاتى جازدا دا، قىستا دا بىردەي ادەمى. بۇل جەرگىلىكتى شيپاجاي - كۋرورتتى ايماقتارعا جىلدىڭ كەز كەلگەن ۋاقىتىندا دەمالۋعا مۇمكىندىك بەرەدى.
ال، ەلىمىزدىڭ باتىسىنداعى شيپاجايلار بۋىن، جۇيكە جۇيەسىن، گينەكولوگيالىق جانە ۋرولوگيالىق پاتولوگيالاردى، سونداي-اق تەرى اۋرۋلارىن ەمدەۋگە جانە الدىن الۋعا باعىتتالعان. بۋراباي جانە قوستاناي قاراعايلى ورماندارىنىڭ ەكولوگيالىق تازا اۋاسى، ەمدىك بالشىعى، ادەمى تاۋلى لاندشافت جانە بىرەگەي تابيعي كورىكتى جەرلەر دەنساۋلىعىن جاقسارتقىسى كەلەتىندەر ءۇشىن تاعى ءبىر سۇرانىسقا يە شيپاجاي-كۋرورتتى ايماققا اينالدىردى.
«قازاقستان ساۋىقتىرۋ ءتۋريزمىن دامىتۋ ءۇشىن ءتۇرلى تۋريستىك-رەكرەاسيالى رەسۋرستارعا يە. شيپاجاي-كۋرورتتى كەشەندەردىڭ كوپشىلىگى جىل بويى جۇمىس ىستەيدى. بۇل ماۋسىمنان تىس ۋاقىتتا باعانى تومەندەتۋگە مۇمكىندىك بەرەدى، سول ارقىلى دەمالىس پەن ەمدەۋدى ودان ءارى قولجەتىمدى ەتەدى. كەيبىر پانسيوناتتار اتپەن سەرۋەندەۋ، تاريحي جانە تابيعي كورىكتى جەرلەرگە ەكسكۋرسيالار جۇرگىزۋ، ءارتۇرلى سپورتتىق جانە ويىن-ساۋىق ءىس-شارالارىن ۇيىمداستىرۋ جانە ت.ب. ءبىرقاتار قوسىمشا قىزمەتتەردى دە ۇسىنادى»،- دەدى تۋريزم جانە سپورت ۆيسە-مينيسترى ەرجان ەركىنبايەۆ.