مۇنداي جۇمىسشىلاردىڭ 21،8%-ىنا نەمەسە 228،3 مىڭىنا فريلانسەرلىك قىزمەت تابىس تابۋدىڭ نەگىزگى جولى بولدى. ال تاعى 78،2%-ى نەمەسە 820،5 مىڭ ادام فريلانسەرلىك قىزمەتتە دە، جۇمىسقا ورنالاسىپ تا جۇمىسپەن قامتىلعان. وسىلايشا، 2021 جىلى قىزمەتكەرلەردى جۇمىسپەن قامتۋدىڭ جالپى كولەمىندەگى فريلانسەرلەردىڭ ۇلەسى 16،6% بولدى. بۇل - ايتارلىقتاي ماڭىزدى كورسەتكىش.
وڭىرلىك تۇرعىدا فريلانسەرلەردىڭ باسىم بولىگى الماتى (244 مىڭ ادام) جانە استانا (133 مىڭ ادام) قالالارىندا، سونىمەن قاتار تۇركىستان وبلىسىندا (93 مىڭ ادام) جۇمىس ىستەگەن. ۇزدىك بەستىككە شىمكەنت (71 مىڭ ادام) پەن الماتى وبلىسى (68 مىڭ ادام) كىردى. بۇل تۋرالى Finprom.kz جازدى.
باياندامادا فريلانسەرلەردىڭ سانى جىلدان جىلعا ارتىپ كەلە جاتقانى ايتىلعان. بۇل سەكتورعا كوروناۆيرۋس پاندەمياسى ەرەكشە سەرپىن بەردى.
فريلانسەر دەگەن كىم؟
Freelance ءسوزى اعىلشىن تىلىنەن اۋدارعاندا "شتاتتان تىس" دەگەن ماعىنانى بىلدىرەدى، ياعني، ەشقانداي جۇمىس بەرۋشى كومپانيانىڭ قۇرامىندا جوق، تاپسىرىس بەرۋشىنى ءوز ەركىمەن تاڭدايتىن، ءوز جۇمىس ۋاقىتىن ءوزى رەتتەيتىن كاسىپ يەسى. ولار ءتۇرلى كومپانيا مەن تاپسىرىس بەرۋشىگە جۇمىس ىستەيدى. بۇل قىزمەتتەگىلەردىڭ ساناتىنا تابىسىن كوبەيتۋ ماقساتىندا بىرنەشە جۇمىستى قاتار الىپ جۇرەتىن ادامداردى جاتقىزۋعا بولادى.
"فريلانسەر" دەگەن تەرميننىڭ ماعىناسىنا قاتىستى كوپتەگەن دەرەك بار. ايگىلى جازۋشى ۆالتەر سكوتتىڭ "ايۆەنگو" رومانىندا بۇل تەرمين العاش رەت قولدانىلادى. جازۋشى روماندا ورتا عاسىرلارداعى جالدامالى جاۋىنگەرلەردى وسىلاي اتاعان.
ق ر "حالىقتى جۇمىسپەن قامتۋ تۋرالى" زاڭى بويىنشا ءوزىن-وزى جۇمىسپەن قامتۋشىلارعا تابىس الۋ ءۇشىن تاۋار وندىرۋمەن نەمەسە وتكىزۋمەن، قىزمەت كورسەتۋمەن دارا اينالىساتىندار، وندىرىستىك كووپەراتيۆ مۇشەلەرى، وتباسىلىق كاسىپورىندار مەن شارۋاشىلىقتاردىڭ جانە جۇمىس بەرۋشىلەردىڭ ەڭبەكاقى تولەنبەيتىن جۇمىسكەرلەرى جاتادى. ءبىزدىڭ قوعامدا بۇلاردىڭ ءبارىن ءبىر سوزبەن فريلانسەر دەپ اتاۋ قالىپتاسقان.
الەۋمەتتىك جەلىلەردىڭ تاپسىرىستار نارىعى رەتىندە ءوسىپ كەلە جاتقان ءرولىن بولەك اتاپ وتكەن ءجون. TikTok، Facebook، Instagram جانە YouTube فريلانسەرلەر اراسىندا ءالى دە تانىمال. ونىڭ ۇستىنە الەۋمەتتىك جەلىلەر مەن بەينەسەرۆيستەر قالا تۇرعىندارىنىڭ عانا ەمەس، اۋىل تۇرعىندارىنىڭ دا بارلىق مۇمكىندىگىن بەلسەندى تۇردە پايدالانىپ جاتقانى بەلگىلى.
مىسالى، Tele2/Altel 2022 جىلى 250+ اۋىلدا ءوز جەلىسىندەگى ترافيكتى تۇتىنۋعا زەرتتەۋ جۇرگىزدى. وپەراتوردىڭ مالىمەتى بويىنشا، الماتى جانە جەتىسۋ وبلىستارىنىڭ اۋىلدارى تۇتىنۋ بويىنشا كوش باستاپ تۇر: بارلىق 250+ ترافيكتىڭ 30%-دان استامى. ودان كەيىنگى ورىندا اقتوبە مەن قاراعاندى وبلىستارى تۇر. YouTube، Instagram، TikTok، VK جانە Facebook Tele2/Altel جەلىسىندەگى 250+ اۋىلدىڭ جالپى ترافيگىنىڭ 37%-ىنا تەڭ. اۋىل تۇرعىندارىنىڭ جىل باسىنان بەرى اتالعان قىزمەتتەرگە جۇمساعان جالپى ۋاقىتى 136 مىڭ ساعات (نەمەسە جىلدارمەن ەسەپتەگەندە 16 جىل) بولدى، بۇل الەمدىك ۇردىستەرگە سايكەس كەلەدى.
ءتۇرلى سالاداعى ساراپشىلاردىڭ پىكىرىنشە، ءقازىر الەۋمەتتىك جەلىلەردەگى اۋىلدىق تيكتوكەرلەر مەن بلوگەرلەر سانىنىڭ قارقىندى ءوسۋى بايقالادى.