ءماجىلىستىڭ جالپى وتىرىسىندا ۇلتتىق بانك ءتوراعاسى ەربولات دوسايەۆ ەلىمىزدە ينفلياسيانىڭ ءوسۋىنىڭ نەگىزگى سەبەپتەرىن ايتتى، دەپ حابارلايدى almaty-akshamy.kz قازاقپاراتقا سىلتەمە جاساپ.
«بيىلعى جىلدىڭ ەكىنشى جارتىجىلدىعىنان باستاپ قازاقستاندا ينفلياسيا تۇتىنۋشىلىق بەلسەندىلىكتىڭ تەز قالپىنا كەلۋى، ەكونوميكانى فيسكالدىق ىنتالاندىرۋدىڭ جالعاسۋى جانە جەكەلەگەن تاۋار نارىقتارىنداعى تەڭگەرىمسىزدىكتەرى ناتيجەسىندە ءوستى»، - دەدى ە. دوسايەۆ.
ونىڭ ايتۋىنشا، ازىق-تۇلىك باعاسىنىڭ ءوسۋى نەگىزگى ينفلياسياعا قارسى فاكتور بولدى، ول جالپى ينفلياسياعا جارتىسىنان كوپ ۇلەس قوسادى. ازىق-تۇلىك ينفلياسياسى بيىلعى قىركۇيەكتە ۋاقىتشا جانە ورنىقتى فاكتورلاردىڭ اسەرىنەن 11،5%-عا دەيىن جىلدامدادى.
«وسى جىلعى شىلدە-تامىزدا جاز ايلارىنا ءتان ەمەس جانە ۇزاق ساقتالاتىن كوكونىستەر (كارتوپ، ءسابىز، قىزىلشا) باعاسىنىڭ سوڭعى جىلدارداعى رەكورد ءوسۋى تىركەلدى. ەت، وسىمدىك مايى جانە قانت باعاسىنىڭ ءوسۋى ينفلياسيانى جىلدامداتۋدىڭ تۇراقتى فاكتورى بولىپ قالۋدا، بۇل ءوسۋ دەڭگەيىن الەمدىك ۇردىستەرمەن سالىستىرۋعا بولادى. فاو دەرەكتەرىنە سايكەس، ءبىر جىلدا ەتتىڭ الەمدىك باعاسى ورتا ەسەپپەن 26،3%-عا، وسىمدىك مايىنىڭ باعاسى – 61،2%-عا، قانتتىڭ باعاسى – 53،5%-عا ءوستى»، - دەدى ۇب باسشىسى.
ونىڭ سوزىنە قاراعاندا، ءبىرىنشى كەزەكتە تۇتىنۋشىلىق بەلسەندىلىكتىڭ قالپىنا كەلۋى اياسىندا جانار-جاعار ماي جانە ۇزاق پايدالانىلاتىن تاۋارلار باعاسىنىڭ ءوسۋى ناتيجەسىندە قازاقستاندا ازىق-تۇلىككە جاتپايتىن ينفلياسيا 7،5%-عا دەيىن جىلدامدادى.
«اقىلى قىزمەتتەر ينفلياسياسى نەگىزىنەن ەلەكتر ەنەرگياسى، تۇرعىن ءۇيدى جالداۋ جانە كولىك قىزمەتتەرى باعاسىنىڭ ءوسۋى ەسەبىنەن 6،8%-عا دەيىن جىلدامدادى»، - دەدى ە. دوسايەۆ.