قازاقستاندا وزبەكستاننىڭ مادەنيەت كۇندەرى ءوتتى

گالا-كونسەرتتە وزبەكستاننىڭ جەتەكشى سوليستەرى مەن شىعارماشىلىق ۇجىمدارى ونەر كورسەتتى.

قازاقستان مەن وزبەكستان اراسىندا ديپلوماتيالىق قاتىناستاردىڭ ورناعانىنا 30 جىل تولۋىنا وراي ۇيىمداستىرىلعان مەرەكەلىك ءىس-شارالار اياسىندا دوڭگەلەك ۇستەلدەر، كورمەلەر مەن شەبەرلىك cاباقتارى ءوتتى، دەپ حابارلايدى Almaty-akshamy.kz.

سونداي-اق قازاقستاندىق كورەرمەندەرگە قازاق تىلىندە تيفلوكوممەنتارييلەرى بار «شاي» قىسقامەتراجدى ءفيلمى ۇسىنىلدى. قاليبەك قۋانىشبايەۆ اتىنداعى قازاق مۋزىكالىق دراما تەاترىندا وتكەن گالا-كونسەرتتە وزبەكستان رەسپۋبليكاسىنىڭ جەتەكشى سوليستەرى مەن شىعارماشىلىق ۇجىمدارى ونەر كورسەتتى.

«ءبىزدى ەكى مىڭ شاقىرىمنان استام شەكارا عانا ەمەس، ەكى مىڭ جىلدىق تاريح بىرىكتىرەدى. سىزدەر بىزگە ارنايى الىپ كەلگەن مازمۇنى تەرەڭ، ماعىناسى باي باعدارلامالار كوشى سول يگى ساباقتاستىقتى جالعاستىرىپ وتىر. الايدا، قوس تاراپ بۇل رۋحاني بايلانىسپەن شەكتەلىپ قالماۋى ءتيىس. الداعى ۋاقىتتا مادەني الماسۋدان بولەك، بىرلەسكەن ورتاق جوبالاردى جۇزەگە اسىرۋ قاجەت. ءبىز بۇرىننان تاتۋلىقتى تابىسقا، بىرلىكتى بەرەكەگە اينالدىرىپ كەلە جاتقان اعايىنداس حالىقتارمىز. ءتۇبى ءبىر تۇركى الەمىنىڭ قوس قازىعىنداي قازاق-وزبەك قاتىناسى نىعايا بەرۋىنە شىن جۇرەكتەن تىلەكتەسپىن»، - دەدى مادەنيەت جانە سپورت ءمينيسترى داۋرەن ابايەۆ.

ءوز كەزەگىندە وزبەك تاراپى مادەنيەت جانە سپورت مينيسترلىگىنە ءىس-شارالاردى ۇيىمداستىرۋعا كومەكتەسكەنى ءۇشىن العىس ايتىپ، قازاقستان تاراپىنىڭ جوبالارى مەن باستامالارىنا جوعارى قىزىعۋشىلىق تانىتقانىن اتاپ ءوتتى.