شىمكەنتتە ق ر مادەنيەت جانە اقپارات مينيسترلىگىنىڭ ۇيىمداستىرۋىمەن وزبەكستان رەسپۋبليكاسى ارحيۆتەرىنىڭ كۇندەرى باستالدى.
ءىس-شارا اياسىندا «قازاقستان مەن وزبەكستان تاريحىن زەرتتەۋدىڭ وزەكتى ماسەلەلەرى» تاقىرىبىندا حالىقارالىق عىلىمي-تاجىريبەلىك كونفەرەنسيا ءوتتى، دەپ حابارلايدى Almaty-akshamy.kz مادەنيەت جانە اقپارات مينيسترلىگىنىڭ باسپا ءسوز قىزمەتىنە سىلتەمە جاساپ.
جيىنعا ق ر مام ارحيۆ، قۇجاتتاما جانە كىتاپ ءىسى كوميتەتى جانە «ۋزارحيۆ» اگەنتتىگىنىڭ، شىمكەنت قالاسى اكىمدىگىنىڭ، قازاقستان جانە وزبەكستان رەسپۋبليكاسىنىڭ مەملەكەتتىك ارحيۆتەرىنىڭ وكىلدەرى، سونداي-اق تاريحشىلار مەن ولكەتانۋشىلار، مادەنيەت سالاسىنىڭ قىزمەتكەرلەرى قاتىستى.
كونفەرەنسيادا ق ر مام ارحيۆ، قۇجاتتاما جانە كىتاپ ءىسى كوميتەتى ءتوراعاسىنىڭ ورىنباسارى روللان قۇسپان مينيستر ايدا بالايەۆانىڭ قۇتتىقتاۋ حاتىن وقىدى.
«ءبىز - ورتاق شەكارامىز عانا ەمەس، تاريحى مەن مادەنيەتى، ادەبيەتى مەن ونەرى ۇقساس باۋىرلاس حالىقپىز. ورتالىق ازيا ايماعىندا وزبەكستان رەسپۋبليكاسىمەن اۋقىمدى ماقساتتارعا قول جەتكىزۋگە باعىتتالعان ستراتەگيالىق ماڭىزى زور بىرلەسكەن جوبالار ىسكە اسىرىلۋدا. قازاقستان مەن وزبەكستان اراسىنداعى مادەني ىنتىماقتاستىق مەملەكەت باسشىلارىمىزدىڭ ساياساتىنىڭ ارقاسىندا قارقىندى دامىپ كەلەدى. ءبىز بىرلەسكەن كۇش-جىگەرىمىزدىڭ ارقاسىندا مادەني مۇرالاردى زەرتتەۋدە، قازاقستان مەن وزبەكستاننىڭ مەملەكەتتىك ارحيۆ قورلارىندا ساقتالعان قۇندى تاريحي مالىمەتتەردى انىقتاۋدا تابىسقا جەتەتىنىمىزگە سەنىمدىمىن»، - دەلىنگەن حابارلامادا.
ءوز كەزەگىندە وزبەكستان رەسپۋبليكاسى ادىلەت مينيسترلىگى جانىنداعى «ۋزارحيۆ» اگەنتتىگى ءتوراعاسىنىڭ ورىنباسارى شەرزود سادىقوۆ ەكى ەل اراسىنداعى ارحيۆتىك قارىم-قاتىناستى نىعايتىپ، جان-جاقتى دامىتۋعا ۆەدومستۆو تاراپىنان بارىنشا قولداۋ كورسەتىلەتىنىن جەتكىزدى.
كونفەرەنسيادا تاريحتى زەرتتەۋدەگى ارحيۆ قۇجاتتارىنىڭ ورنى مەن ءرولى، ارحيۆ سالاسىنىڭ جاعدايى جانە دامۋ پەرسپەكتيۆالارى، ارحيۆتىك قۇجاتتاردىڭ ساقتالۋىن قامتاماسىز ەتۋدىڭ زاماناۋي تەحنولوگيالارى تۋرالى جان-جاقتى تالقىلاندى.
سونداي-اق حالىقارالىق ءىس-شارا اياسىندا ەكى ەلدىڭ مەملەكەتتىك ارحيۆتەرى ۇيىمداستىرعان كورمە ءوتتى.