ءورت سوندىرۋشىلەرگە قانشا تەحنيكا قاجەت؟
توتەنشە جاعدايلار ءبىرىنشى ۆيسە-مينيسترى يبراگيم كۇلشىمبايەۆ مينيسترلىكتىڭ ماتەريالدىق-تەحنيكالىق جابدىقتالۋى تۋرالى ايتتى، دەپ حابارلايدى Almaty-akshamy.kz
ونىڭ ايتۋىنشا، بۇگىندە ەلدى مەكەندەردى ورتتەن قورعايتىن 426 ءورت ءسوندىرۋ ءبولىمى جۇمىس ىستەيدى.
"ءبىراق بۇل جەتكىلىكسىز، نورماتيۆقا جەتۋ ءۇشىن ءالى 121 ءورت ءسوندىرۋ ءبولىمىن سالۋ كەرەك. جوسپاردا بار. بۇگىنگى كۇننىڭ وزىندە جول كارتاسى بويىنشا قازاقستاندا 21 ءورت ءسوندىرۋ بەكەتىنىڭ قۇرىلىسى ءجۇرىپ جتىر. قاراپ وتىرساق، سوڭعى ون جىلدا 18 نىسان عانا سالىنعان. بىلتىرعى جىلداردان باستاپ وسى جۇمىستاردى كۇشەيتە باستادىق"، - دەدى كۇلشىمبايەۆ سەنات وتىرىسىندا.
ول تج مينيسترلىگىنىڭ تەحنيكامەن جابدىقتالۋى 80 پايىزدى قۇرايتىنىن اتاپ ءوتتى. ءقازىر 3200 تەحنيكا بار، ءالى 430 تەحنيكا قاجەت. ونىڭ ىشىندە 15 پايىزىنىڭ نەمەس 470 تەحنيكانىڭ مەرزىمى جيىرما جىلدان اسىپ كەتكەن.
"وسىنىڭ ءبارىن شەشۋ ءۇشىن پرەزيدەنتتىڭ تىكەلەي تاپسىرماسىمەن كەشەندى جوسپار قاراستىرىلعان. بۇگىنگى كۇنى وسى كەشەندى جوسپارعا بارلىق ورتالىق مەملەكەتتىك ورگان كەلىسىمىن بەرىپ، قول قويۋ ساتىسىندا تۇر. سول بويىنشا ناۋرىز ايىندا رەسپۋبليكالىق بيۋدجەت كوميسسياسىنىڭ وتىرىسىندا قارالىپ، 605 ملرد تەڭگە قارجى ءبولىنىپ وتىر. سونىڭ ىشىندە 536 ملرد توتەنشە جاعدايلار مينيسترلىگىنە، 48 ملرد تەڭگە ەكولوگيا مينيسترلىگىنە، جانە 20 ملرد تەڭگە جەرگىلىكتى اكىمشىلىك ورگاندارىنا"، - دەدى ۆيسە-مينيستر.
ايتۋىنشا، اۋە قۇتقارۋ جۇيەسىن دامىتۋ ءۇشىن سوڭعى ءۇش جىلدا 11 تىكۇشاق ساتىپ الىندى. كەشەندى جوسپار بويىنشا 2027 جىلعا دەيىن 16 تىكۇشاق الۋ جوسپارلانىپ وتىر.
"كەشەندى جوسپاردا الەۋمەتتىك جاعدايلار دا كوزدەلگەن. بيىل ءورت سوندىرۋشىلەردىڭ جالاقىسى جەتپىس پايىزعا دەيىن كوتەرىلدى، جوسپار بويىنشا پاتەرى جوق قىزمەتكەرلەر وتەماقى تولەۋ ءۇشىن اقشا قاراستىرىلىپ وتىر"، - دەدى كۇلشىمبايەۆ.