زاڭنىڭ 12-بابىنا جاڭا تارماقشالار ەنگىزۋ ۇسىنىلادى
اشىق نقا سايتىندا سايلاۋ تۋرالى ق ر كونستيتۋسيالىق زاڭىنا وزگەرىستەر ەنگىزۋ جوباسى جاريالاندى، دەپ حابارلايدى Almaty-akshamy.kz. زاڭنىڭ 12-بابىنا جاڭا تارماقشالار ەنگىزۋ ۇسىنىلادى، وسىلايشا ق ر ورتالىق سايلاۋ كوميسسياسىنا قوعامدىق بىرلەستىكتەر مەن كوممەرسيالىق ەمەس ۇيىمداردى اككرەديتتەۋ ءتارتىبىن ازىرلەۋ جانە بەكىتۋ وكىلەتتىكتەرى بەرىلەدى. سونىمەن بىرگە، ورتالىق سايلاۋ كوميسسياسى سايلاۋدى، رەفەرەندۋمدى دايىنداۋ مەن وتكىزۋ كەزەڭىندە سايلاۋ كوميسسيالارىن ۇيىمداستىرۋ مەن ولاردىڭ قىزمەتى ءۇشىن قاجەتتى تاۋارلاردى، جۇمىستار مەن كورسەتىلەتىن قىزمەتتەردى ساتىپ الۋ قاعيدالارىن ازىرلەپ، بەكىتەتىن بولادى. الەۋمەتتىك جەلىدە قوعام قايراتكەرلەرى بۇل تۇزەتۋلەر تاۋەلسىز باقىلاۋشىلاردى، ونىڭ ىشىندە شەتەلدىك ۇيىمداردان قارجىلاناتىن باقىلاۋشىلاردى ۇكىمەتتىك ەمەس ۇيىمداردان كۋالىك الۋعا ءماجبۇر ەتەدى دەپ الاڭداپ وتىر. ونىڭ كوپشىلىگى تەك قاعاز جۇزىندە عانا بار جانە بۇرىن-سوڭدى اففيليرلەنبەگەن ازاماتتار اراسىنان تاۋەلسىز باقىلاۋشىلاردى جالداۋ ناۋقانىن جۇرگىزبەگەن. ءقازىر كەز كەلگەن قوعامدىق ۇيىم سايلاۋدى باقىلاي الاتىن بولسا، ەندى جارعىدا ءتيىستى تارماعى بار ۇيىمدار عانا باقىلاۋعا جىبەرىلەدى.
«تەك تاجىريبەسى بار جانە ونىمەن كاسىبي تۇردە اينالىساتىن ۇيىمداردى عانا باقىلاۋعا الۋ ءتارتىبى بۇرىننان بار. ال شەتەلدەن قارجىلاناتىن ۇەۇ اككرەديتاسيالاۋ ماسەلەسى پىكىرتالاس تۋدىرىپ وتىر. تاۋەلسىز باقىلاۋشىلار – سايلاۋ پروسەسىنىڭ وتە ماڭىزدى بولىگى جانە سايلاۋدى باقىلاۋ شىنىمەن بەيتاراپ بولۋى كەرەك جانە ەش جاعدايدا شەتەلدىك قارجىلاندىرۋعا دا، ۇكىمەتكە دە، جەكە تۇلعاعا دا تاۋەلدى بولماۋى كەرەك. ءبىز بۇل نورمالاردى ماجىلىستە زاڭ جوباسى بويىنشا جۇمىس كەزىندە تالقىلاپ، تۇسىنىكتەمە بەرەمىز»، - دەدى ق ر پارلامەنتى ءماجىلىسىنىڭ زاڭناما جانە سوت-قۇقىقتىق رەفورما كوميتەتىنىڭ حاتشىسى سنەجاننا يماشيەۆا.
سايتتاعى قوعامدىق تالقىلاۋ 28 شىلدەگە دەيىن جالعاسادى. وسىدان كەيىن عانا زاڭ جوباسى ق ر پارلامەنتى ماجىلىسىنە تۇسەدى.