الەۋمەتتىك جەلىلەردە تاراعان روليكتە قازاقستاندا كوككولدە لوح-نەسس قۇبىجىعى مەكەندەيتىنى ايتىلادى.
جىلان ءتارىزدى ەجەلگى تىرشىلىك يەسى دەنەسىنىڭ ۇزىندىعى 15 مەترگە جەتەدى. ۋفولوگتاردىڭ پىكىرىنشە، قۇبىجىق كول تۇبىندەگى ۇڭگىرلەردە جاسىرىنادى. ال سۋ ايدىنىندا قۇبىجىقتىڭ بارىن قىرىلداعان، ىڭىرسىعان دىبىستاردان جانە سۋدىڭ شالپىلداعانىنان بايقاۋعا بولادى ەكەن، دەپ حابارلايدى aqshamnews.kz.
Stopfake.kz بۇل اقپاراتتىڭ جالعان ەكەنىن حابارلايدى. عالىمدار بۇل جاعدايدى جاي عانا ءتۇسىندىردى.
كوككول – وتە ادەمى جەر. سۋ قويماسى قازاقستاننىڭ وڭتۇستىگىندە، جامبىل وبلىسىندا تاۋلى جەردە ورنالاسقان. حالىق اراسىندا كوككول تۋرالى اڭىزدار مەن ميفتەر كوپ. مۇندا سۋدىڭ رۋحى ايداحار تىرشىلىك ەتەدى ەكەن. ونىڭ اقىرۋى كەرنەيدىڭ دىبىسىنا ۇقسايدى ەكەن. ارينە، بۇل ەرتەگى.
كوككول ءوزىنىڭ ەرەكشە فيزيكالىق قاسيەتتەرىنە بايلانىستى قازاقستاننىڭ انومالدى ايماقتارىنىڭ تىزىمىنە ەندى. مۇنداعى سۋ ءاردايىم تازا، ءبىراق كولگە ەشقانداي وزەن قۇيمايدى، كوككولدىڭ سۋى دا ەشقايدا اقپايدى. تاعى ءبىر ەرەكشەلىگى – سۋدا شۇڭقىرلار جانە ۇزىن جولاقتى تولقىندار پايدا بولادى. بۇل سۋ استىندا ۇزىن اڭ ءجۇزىپ كەلە جاتقانداي اسەر قالدىرادى.
ءارتۇرلى ەلدەردىڭ گيدرولوگتارى كوككولگە كوپتەن بەرى قىزىعۋشىلىق تانىتىپ كەلەدى. ولار زەرتتەۋلەر جۇرگىزىپ، كوككولدىڭ مۇزداقتاردان جانە تاۋ جىنىستارىنىڭ مورەنالىق قىرتىستار قاباتىندا پايدا بولعانىن انىقتادى. مورەنا – گەولوگيالىق شوگىندىلەر. جاي سوزبەن ايتقاندا، ءارتۇرلى سىنىق ماتەريالى. بۇل – ۇلكەن تاستار، ساز جانە ۇساق تاستار.
مورەنالاردا كانالدار، شۇڭقىرلار، سۋ استىنداعى ۇڭگىرلەر پايدا بولۋى مۇمكىن. سۋ اۋادا سىڭىرىلگەن كەزدە، وعاش ۋىلدەگەن دىبىستار، شۇڭقىرلار پايدا بولادى.
جەرگىلىكتى تۇرعىنداردىڭ ايتۋىنشا، كول سۋىنىڭ ەمدىك قاسيەتتەرى بار. عالىمدار بۇل دەرەكتى راستادى. ۇڭگىرلەردىڭ قۋىستارىنا تارتىلعان كەزدە سۋ مينەرالدار مەن تۇزدارمەن قانىققان.
كوككول – تىلسىم كۇشكە تولى جەر. دەسە دە، وندا قۇبىجىق مەكەندەمەيدى. گيدرولوگ عالىمدار سۋ بەتىندەگى وعاش دىبىستاردى، شۇڭقىرلار مەن تولقىنداردى ونىڭ پايدا بولۋىمەن بايلانىستىرادى.