وڭىرلىك كوممۋنيكاسيالار قىزمەتىندە وتكەن بريفينگتە قازاق ونكولوگيا جانە راديولوگيا عىلىمي-زەرتتەۋ ينستيتۋتى باسقارما ءتوراعاسىنىڭ ورىنباسارى ايشا مولداشيەۆا 2023–2027 جىلدارعا ارنالعان ونكولوگيالىق اۋرۋلارمەن كۇرەس جونىندەگى كەشەندى جوسپار اياسىندا ونكولوگيالىق قىزمەتتى جاڭعىرتۋ مەن رادياسيالىق ونكولوگيانى دامىتۋ تۋرالى ايتتى، - دەپ حابارلايدى Aqshamnews.kz.
ونىڭ ايتۋىنشا، قازىرگى تاڭدا قازاقستاندا 22 سىزىقتىق ۇدەتكىش پەن 20 گامماتەراپيالىق اپپارات جۇمىس ىستەپ تۇر. 2024 جىلى ەلىمىزدىڭ ءبىراز وڭىرىندە قوسىمشا التى جاڭا سىزىقتىق ۇدەتكىش پايدالانۋعا بەرىلگەن. بۇل ساۋلەلىك تەراپيامەن قامتىلعان پاسيەنتتەردىڭ ۇلەسىن 65 پايىزعا دەيىن ارتتىرىپ، ەمدەۋدى بەلگىلەنگەن مەرزىمدە جۇرگىزۋگە مۇمكىندىك بەردى.
«جاڭا قوندىرعىلاردى ەنگىزۋ ساۋلەلىك تەراپيانىڭ وسى زامانعى تەحنولوگيالارىن — ءاداپتيۆتى تەراپيانى، 4D-گەيتينگتى، ستەرەوتاكتيكالىق ادىستەردى قولدانۋعا جول اشتى. مۇنىڭ ءبارى ەمدەۋدىڭ دالدىگىن ارتتىرىپ، ساۋ تىندەرگە تۇسەتىن جۇكتەمەنى ازايتادى، تەراپيانى دا ءقاۋىپسىز، ءتيىمدى ەتەدى»، — دەپ اتاپ ءوتتى ايشا مولداشيەۆا.
سونداي-اق ول 2025 جىلعى 1 قازاننان باستاپ توموتەراپيا جوعارى تەحنولوگيالىق مەديسينالىق كومەك تىزبەسىنەن مامانداندىرىلعان مەديسينالىق كومەك تىزبەسىنە اۋىستىرىلىپ، ستاسيوناردى الماستىراتىن دەڭگەيدە كورسەتىلەتىنىن، سونىمەن قاتار كەپىلدەندىرىلگەن تەگىن مەديسينالىق كومەك كولەمى اياسىندا ساقتالاتىنىن ءتۇسىندىردى. بۇل شەشىم، ەڭ الدىمەن، ساۋلەلىك تەراپيانىڭ ساپاسىن ارتتىرۋعا باعىتتالعان.
بۇدان بولەك، ونكولوگيالىق قىزمەتتى جاڭعىرتۋ اياسىندا رادياسيالىق ونكولوگيا سالاسىنداعى مامانداردىڭ بىلىكتىلىگىن ارتتىرۋ بويىنشا جۇيەلى جۇمىس جۇرگىزىلىپ جاتىر. 2024–2025 جىلدارى رادياسيالىق ونكولوگتار مەن مەديسينالىق فيزيكتەرگە ارنالعان كاسىبي وقىتۋ باعدارلامالارى، سونىڭ ىشىندە يسپانيا، فرانسيا جانە تۇركيانىڭ جەتەكشى ونكولوگيالىق ورتالىقتارىنداعى شەتەلدىك تاعىلىمدامالار ىسكە اسىرىلدى. بۇل كلينيكالىق پراكتيكاعا حالىقارالىق ستاندارتتارعا ساي زاماندىق تاسىلدەر مەن وزىق ساۋلەلىك تەراپيا تەحنولوگيالارىن ەنگىزۋگە مۇمكىندىك بەردى.