پاسيەنتتەردىڭ ءومىر ءسۇرۋ دەڭگەيى بەس پايىزعا ارتقان.
2018 جىلدان باستاپ قازاقستاندا ونكولوگيالىق اۋرۋلاردان بولاتىن ءولىم-جىتىم كورسەتكىشى 5% تومەندەگەن. بۇل تۋرالى ماماندار الماتىدا ءوتىپ جاتقان «ونكولوگيانىڭ وزەكتى ماسەلەلەرى مەن زاماناۋي مەكتەپتەرى تۋرالى» حالىقارالىق عىلىمي–تاجىريبەلىك كونفەرەنسيا بارىسىندا ايتتى، دەپ حابارلايدى Almaty-akshamy.kz Egemen.kz سىلتەمە جاساپ.
اتالمىش شارا بارىسىندا ق ر دەنساۋلىق ساقتاۋ مينيسترلىگىنىڭ مەديسينالىق كومەكتى ۇيىمداستىرۋ دەپارتامەنتىنىڭ ءبولىم باسشىسى گۇلنار ماقسۇتوۆا 2018 جىلدان بەرى ونكولوگيالىق اۋرۋلاردان بولاتىن ءولىم-جىتىم كورسەتكىشى 5 پايىزعا تومەندەدى دەپ مالىمدەدى.
الدىمەن قازاقستاندا 2018-2022 جىلدارعا ارنالعان قاتەرلى ىسىكپەن كۇرەسۋدىڭ كەشەندى جوسپارى جۇزەگە اسىرىلىپ وتىرعانىن ەسكە سالا كەتۋ كەرەك.
«كەشەندى جوسپاردىڭ ءىس-شارالارىن جۇزەگە اسىرۋ بارىسىندا قاتەرلى ىسىكتەردەن بولاتىن ءولىم-جىتىمدى تومەندەتۋدىڭ وڭ ۇردىستەرى بايقالادى، 2018 جىلدان باستاپ ءولىم-جىتىم دەڭگەيى 5 پايىزعا تومەندەدى. 2018 جىلى ءولىم-جىتىمدى كورسەتكىشى 100 مىڭ حالىققا شاققاندا 78،1 قۇراسا، 2022 جىلدىڭ 6 ايىندا بۇل كورسەتكىش 66،8 قۇرادى. COVID-19 جاعدايىنا قاراماستان، 0-1 ساتىداعى ونكولوگيالىق اۋرۋلاردىڭ ەرتە دياگنوستيكاسى ارتىپ، 2022 جىلى انىقتالعان ەرتە كەزەڭدەردىڭ ۇلەسى 28،7 پايىزدى قۇرادى»، - دەدى گۇلنار ماقسۇتوۆا.
سونداي-اق، سپيكەردىڭ ايتۋىنشا، پاسيەنتتەردىڭ 5 جىلدىق ءومىر ءسۇرۋ دەڭگەيى 55 پايىزعا دەيىن، ياعني 2018 جىلمەن سالىستىرعاندا 5 پايىزعا ارتقان.
ق ر دەنساۋلىق ساقتاۋ مينيسترلىگىنىڭ شتاتتان تىس باس ونكولوگى، «قازورعزي» اق باسقارما ءتورايىمى ديليارا قايداروۆانىڭ ايتۋىنشا، قازىرگى كەزدە قازاقستان رەسپۋبليكاسىنىڭ ونكولوگيالىق قىزمەتىن دامىتۋ مەن جەتىلدىرۋدىڭ كەلەسى كەشەندى جوسپارى كاراستىرىلىپ جاتىر. ول جاڭا ونكوجوسپار الداعى 5 جىلعا ەسەپتەلەتىن بولادى.
بيىلعى 2022 جىلعى 22-23 قىركۇيەك كۇندەرىنە مەجەلەنگەن كونفەرەنسيا وكپە وبىرى، ءسۇت بەزى وبىرى، كولورەكتالدى وبىر جانە قۋىق استى بەزى وبىرى بويىنشا ونكولوگتار مەكتەپتەرىن قامتىپ، كلينيكالىق جاعدايلار تالقىلانىپ، ۇلتتىق جانە شەتەلدىك ساراپشىلارمەن پىكىر الماسۋ ءجۇرىپ جاتىر.
سونداي-اق، ءارتۇرلى سيپاتتاعى ىسىكتەردى دياگنوستيكالاۋ جانە ەمدەۋ بويىنشا شەبەرلىك ساعاتتارى، ساتتەليتتىك سيمپوزيۋمدار، سونداي-اق فارماسيەۆتيكالىق پرەپاراتتار مەن مەديسينالىق تەحنيكا وندىرۋشىلەرىنىڭ كورمەلەرى ۇيىمداستىرىلدى.
ءىس-شاراعا قازاقستاننان، جاقىن جانە الىس شەتەلدەردەن 300-دەن استام ونكولوگ، ساۋلەلىك دياگنوستيكا دارىگەرلەرى جانە تەراپيەۆت، يادرولىق مەديسينا ماماندارى قاتىسىپ وتىر.