قازاقستاندا ونەركاسىپتىك كاسىپورىنداردىڭ قورشاعان ورتاعا تيگىزەتىن زيانىن ازايتۋ ماقساتىندا جاڭا شارالار قولعا الىنىپ جاتىر. بۇل تۋرالى ۇكىمەت وتىرىسىندا يندۋستريا جانە قۇرىلىس ءمينيسترى قانات شارلاپايەۆ مالىمدەدى، دەپ حابارلايدى aqshamnews.kz
ءمينيستردىڭ ايتۋىنشا، ەكولوگيالىق كودەكسكە سايكەس، 17 ءىرى ونەركاسىپتىك كاسىپورىن ەڭ ۇزدىك قولجەتىمدى تەحنولوگيالاردى (ەۇت) ەنگىزۋى قاجەت. بۇل تەحنولوگيالار اتموسفەراعا زياندى زاتتاردىڭ شىعارىندىلارىن ازايتىپ قانا قويماي، كاسىپورىن قىزمەتكەرلەرىنىڭ ەڭبەك جاعدايلارىن دا جاقسارتۋعا مۇمكىندىك بەرەدى.
بۇگىندە وسى كاسىپورىنداردىڭ بەسەۋى باعدارلامالارىن بەكىتىپ، ونى كەزەڭ-كەزەڭىمەن ىسكە اسىرۋدى باستادى. سونىمەن قاتار، بيىل مەتاللۋرگيا سالاسىنداعى تاعى ءۇش كاسىپورىن وزدەرىنىڭ ەكولوگيالىق باعدارلامالارىن قابىلداۋدى جوسپارلاپ وتىر.
وڭىرلەردەگى ەكولوگيالىق جاعدايدى جاقسارتۋ ءۇشىن كاسىپورىندار اتموسفەراعا شىعاتىن زياندى زاتتاردى ازايتۋ بويىنشا بەلسەندى جۇمىس ىستەپ كەلەدى. ولار جىل سايىن قالالار مەن اۋدانداردى كوگالداندىرۋعا جانە ەلدى مەكەندەردى اباتتاندىرۋعا باعىتتالعان ءىس-شارالارعا قاتىسىپ، تابيعاتتى قورعاۋ سالاسىندا الەۋمەتتىك جاۋاپكەرشىلىكتى ارتتىرۋعا اتسالىسۋدا.
بۇل شارالار قورشاعان ورتانى قورعاۋ ماسەلەلەرىندە وڭ وزگەرىستەرگە قول جەتكىزىپ، ونەركاسىپتىك سالانىڭ تۇراقتى دامۋ ۇلگىسىن قالىپتاستىرۋعا ىقپال ەتەدى.