ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ مەملەكەتتىك ەڭبەك ينسپەكسياسى كوميتەتىنىڭ مالىمەتى بويىنشا 2024 جىلى وندىرىستەگى جازاتايىم وقيعالاردان 1408 جۇمىسكەر زارداپ شەگىپ، ونىڭ 202ء-ۋى قازا بولعان. بۇل رەتتە 2024 جىلدىڭ قورىتىندىسى بويىنشا وندىرىستىك جاراقاتتانۋ 2023 جىلمەن سالىستىرعاندا 4،5%-عا تومەندەدى.
2024 جىلدىڭ قورىتىندىسى بويىنشا وندىرىستىك جاراقاتتانۋ كوەففيسيەنتى (1000 جۇمىسكەرگە شاققانداعى جازاتايىم وقيعالاردىڭ جيىلىگى) 0،20 قۇرادى، دەپ حابارلايدى aqshamnews.kz.
رەسپۋبليكانىڭ ونىدىرىستىك ايماقتارىندا جاراقات الۋدىڭ ەڭ جوعارى دەڭگەيى ساقتالۋدا. ماسەلەن، قاراعاندى وبلىسىندا – 159 ادام، شقو-دا – 124 ادام، پاۆلودار وبلىسىندا – 112 ادام، اباي وبلىسىندا – 101 ادام، قوستاناي وبلىسىندا – 91 ادام، زارداپ شەككەن. سونداي-اق، الماتى قالاسىندا 116 ادام زارداپ شەكتى.
ەكونوميكانىڭ سالالارى بويىنشا ەڭ كوپ زارداپ شەككەندەر تاۋ-كەن مەتاللۋرگيا كەشەنىنىڭ ونەركاسىپتەرىندە – 18،3% جانە قۇرىلىس سالاسىندا – 10،1%.
جازاتايىم وقيعالاردىڭ ورىن الۋىنىڭ نەگىزگى سەبەپتەرى: وندىرىستەگى جۇمىستىڭ ءتيىستى دەڭگەيدە ۇيىمداستىرىلماۋى (35،5%)؛ جابىرلەنۋشىنىڭ ءوزىنىڭ ورەسكەل ابايسىزدىعى (31%)؛ جول قوزعالىسى ەرەجەلەرىن بۇزۋ (8،2%)؛ ەڭبەك قاۋىپسىزدىگى جانە ەڭبەكتى قورعاۋ ەرەجەلەرىن بۇزۋ (7،6%).
ءقاۋىپسىز ەڭبەك جاعدايىن جاساۋ مەن وندىرىستىك جاراقاتتانۋدى ازايتۋ ق ر ۇكىمەتى مەن ەڭبەك جانە حالىقتى الەۋمەتتىك قورعاۋ مينيسترلىگىنىڭ (بۇدان ءارى – مينيسترلىك) نەگىزگى مىندەتتەرىنىڭ ءبىرى بولىپ تابىلادى.
سوڭعى بەس جىلدىڭ ىشىندە مەملەكەتتىك ورگاندار مەن جۇمىس بەرۋشىلەردىڭ ەڭبەكتى قورعاۋ سالاسى بويىنشا قابىلدانعان كەشەندى شارالاردىڭ ناتيجەسىندە وندىرىستىك جاراقاتتانۋ دەڭگەيى 6،3%-عا تومەندەدى.
پروفيلاكتيكا مەن بۇزۋشىلىقتى الدىن الۋ ماقساتىندا ەلىمىزدىڭ 3262 كاسىپورنى قاۋىپسىزدىك پەن ەڭبەكتى قورعاۋ ستاندارتتارىن ەنگىزدى.
2019 جىلدان باستاپ مينيسترلىك تاراپىنان «نولدىك جاراقات - Vision Zero» تۇجىرىمداماسىن جەتىلدىرۋ بويىنشا بەلسەندى جۇمىس اتقارىلۋدا. وعان بۇگىندە 605 كاسىپورىن قوسىلدى.
قۇرىلىس وبەكتىلەرىندە باس مەردىگەردىڭ وبەكتىدەگى ەڭبەك قاۋىپسىزدىگى ماسەلەلەرى بويىنشا بارلىق قوسالقى مەردىگەرلەرگە جاۋاپكەرشىلىگى مەن باقىلاۋىن كوزدەيتىن باقىلاۋدىڭ تىك مودەلىن ەنگىزۋ بويىنشا جۇمىس جالعاسۋدا. بۇل باقىلاۋ مودەلىن رەسپۋبليكانىڭ 318 كاسىپورنى ەنگىزدى.
بۇدان باسقا، جۇمىس بەرۋشىلەرگە ەڭبەكتى قورعاۋ تالاپتارىنىڭ ساقتالۋىن ءوزىن-وزى تەكسەرۋدەن وتۋگە مۇمكىندىك بەرەتىن «ونلاين ەڭبەك كونسۋلتانتى» ەلەكتروندىق سەرۆيسى ىسكە قوسىلدى. سەرۆيس ىسكە قوسىلعان ساتتەن باستاپ ونى 42 985 جۇمىس بەرۋشى پايدالاندى.
قازاقستان رەسپۋبليكاسىنىڭ 2024-2030 جىلدارعا ارنالعان ءقاۋىپسىز ەڭبەك تۇجىرىمداماسى ىسكە اسىرىلۋدا، ول 4 نەگىزگى باعىتتى كوزدەيدى. بۇل تاۋەكەلگە باعدارلانعان ءتاسىل نەگىزىندە ەڭبەكتى قورعاۋدىڭ ۇلتتىق جۇيەسىن جاڭعىرتۋ، جۇمىس ورىندارىندا تاۋەكەلدى تومەندەتۋ جونىندەگى شارالاردى ەكونوميكالىق ىنتالاندىرۋ، كاسىبي قۇزىرەتتىلىكتەر مەن عىلىمي الەۋەتتى دامىتۋ، سونداي-اق ەڭبەكتى قورعاۋ سالاسىنداعى باقىلاۋ مەن مونيتورينگتىڭ تيىمدىلىگىن ارتتىرۋ. تۇجىرىمدامانى ىسكە اسىرۋ وندىرىستىك جاراقاتتانۋ مەن كاسىپتىك سىرقاتتانۋشىلىق دەڭگەيىن تومەندەتۋگە ىقپال ەتەتىن بولادى.