قازاقستان رەسپۋبليكاسىنىڭ ەنەرگەتيكا مينيسترلىگى مۇناي-گاز حيمياسى سالاسىندا جالپى قۇنى 15 ميلليارد اقش دوللارىنان اساتىن ءبىرقاتار ءىرى جوبالار ىسكە اسىرىلىپ جاتقانىن حابارلايدى. بۇل جوبالار ەلىمىزدىڭ يندۋستريالىق-يننوۆاسيالىق دامۋىنا سەرپىن بەرىپ، جاڭا وندىرىستەردى جولعا قويۋعا، سونداي-اق ىشكى جانە سىرتقى نارىقتارداعى باسەكەگە قابىلەتتىلىكتى ارتتىرۋعا مۇمكىندىك بەرەدى.
اتالعان جوبالاردىڭ ءبىرى – 2022 جىلى پايدالانۋعا بەرىلگەن جىلدىق قۋاتى 500 مىڭ توننا پوليپروپيلەن وندىرەتىن زاۋىت (ج ش س «KPI»). 2024 جىلدىڭ قورىتىندىسى بويىنشا كاسىپورىن شامامەن 250 مىڭ توننا ءونىم ءوندىردى. بۇل جوبا ەلىمىزدىڭ يمپورتقا تاۋەلدىلىگىن ازايتىپ، ەكسپورتتىق الەۋەتىن ارتتىرۋ جولىنداعى ماڭىزدى قادام سانالادى.
قازىرگى ۋاقىتتا ستراتەگيالىق ماڭىزى جوعارى تاعى ءبىر جوبا – جىلىنا 1،25 ميلليون توننا پوليەتيلەن وندىرەتىن زاۋىت – ىسكە اسىرۋدىڭ بەلسەندى كەزەڭىندە. جوبانىڭ جوبالىق-سمەتالىق قۇجاتتاماسى ازىرلەنىپ، باستاپقى قۇرىلىس-مونتاجداۋ جۇمىستارى جۇرگىزىلۋدە.
سونىمەن قاتار، بۋتاديەن، كارباميد، پوليەتيلەنتەرەفتالات جانە الكيلات وندىرۋگە ارنالعان وزگە دە جوبالار دايىندىقتىڭ ءارتۇرلى ساتىسىندا پىسىقتالۋدا.
ەنەرگەتيكا مينيسترلىگىنىڭ باعالاۋىنشا، كورسەتىلگەن جوبالاردى ىسكە اسىرۋ ناتيجەسىندە شامامەن 3،5 مىڭ تۇراقتى جانە 16 مىڭ ۋاقىتشا جۇمىس ورنى اشىلادى. بۇل ءوز كەزەگىندە وڭىرلىك ەكونوميكانىڭ دامۋىنا جانە حالىقتى جۇمىسپەن قامتۋ دەڭگەيىنىڭ ارتۋىنا ەلەۋلى ۇلەس قوسادى.