قازاقستاندا مىندەتتى الەۋمەتتىك ساقتاندىرۋ جۇيەسىندە وزگەرىستەر بولدى

الەۋمەتتىك تولەمدەر مولشەرى ۇلعايتىلدى.

قازاقستان ۇكىمەتى مىندەتتى الەۋمەتتىك ساقتاندىرۋ جۇيەسىندەگى  وزگەرىستەر تۋرالى ايتتى، دەپ حابارلايدى Almaty-akshamy.kz.

"2023 جىلعى 1 قاڭتاردان باستاپ مەملەكەتتىك الەۋمەتتىك ساقتاندىرۋ قورىنان جۇمىسىنان ايىرىلعان، ەڭبەككە قابىلەتتىلىگىنەن ايىرىلۋ جانە اسىراۋشىسىنان ايىرىلۋ جاعدايلارى بويىنشا الەۋمەتتىك تولەمدەر مولشەرى ۇلعايتىلدى، سونداي-اق بالا كۇتىمى بويىنشا تولەمدەر كەزەڭى ۇزارتىلدى"، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.

مەملەكەت باسشىسىنىڭ جولداۋىن ىسكە اسىرۋ شەڭبەرىندە جۇمىسىنان ايىرىلعان جاعدايدا تولەنەتىن الەۋمەتتىك تولەمدى ەسەپتەۋ ءۇشىن قولدانىلاتىن تابىستى الماستىرۋ كوەففيسيەنتى 40%-دان 45%-عا دەيىن ۇلعايتىلدى. 2023 جىلى 117 مىڭعا جۋىق ازاماتقا جۇمىسىنان ايىرىلعان جاعدايدا تولەنەتىن الەۋمەتتىك تولەم ورتا ەسەپپەن 13%-عا ءوسىپ، ارتتىرىلعان مولشەردە تاعايىندالادى دەپ كۇتىلۋدە.

سونداي-اق بالا كۇتىمى بويىنشا الەۋمەتتىك تولەمدى جۇزەگە اسىرۋ ۇزاقتىعى 1 جاستان 1،5 جاسقا دەيىن ۇزارتىلدى. بيىل بۇل تولەم 500 مىڭنان استام اتا-اناعا تاعايىندالۋى جوسپارلانۋدا.

بۇدان بولەك، ەڭبەككە قابىلەتتىلىگىنەن ايىرىلعان 78 مىڭ ادامعا جانە اسىراۋشىسىنان ايىرىلعان 55 مىڭ وتباسىعا بازالىق مەملەكەتتىك جاردەماقىلارعا قوسىمشا تاعايىندالاتىن الەۋمەتتىك تولەمدەردىڭ مولشەرى 8،5%-عا ارتتى.

وسىلايشا، جۇمىس ىستەيتىن ازاماتتاردى الەۋمەتتىك قامسىزداندىرۋ جۇمىس ىستەمەيتىندەرگە قاراعاندا جوعارى بولماق.