بۇل تۋرالى سەناتتا وتكەن ۇكىمەت ساعاتىندا اۋىل شارۋاشىلىعى ۆيسە-مينيسترى امانعالي بەردالين مالىمدەدى.
ونىڭ ايتۋىنشا، ءبىرقاتار ناقتى شارالار وڭ ناتيجەگە قول جەتكىزۋگە ىقپال ەتكەن، - دەپ حابارلايدى Aqshamnews.kz.
اتاپ ايتقاندا: ۆەتەرينارلىق ينفراقۇرىلىمدى جاڭعىرتۋ، ەسەپ جۇرگىزۋ ۇدەرىستەرىن سيفرلاندىرۋ، وتاندىق ۆاكسينالار ءوندىرىسىن كەڭەيتۋ جانە ماتەريالدىق-تەحنيكالىق بازانى نىعايتۋ. بۇل باعىتتاردىڭ بارلىعى اوك دامۋىنىڭ 2030 جىلعا دەيىنگى تۇجىرىمداماسىنا ەنگىزىلگەن.
ناقتى مالىمەتتەر بويىنشا، ەلدە 9،1 ملن باس ءىرى قارا، 23،7 ملن باس ۇساق مال، 4،7 ملن جىلقى، 302 مىڭ تۇيە وسىرىلەدى.
سونىمەن قاتار، 569 مىڭ شوشقا بار.
باقىلاۋ جانە الدىن الۋ شارالارىنىڭ كۇشەيۋى ەت ءوندىرىسىن 914 مىڭ تونناعا دەيىن ارتتىرۋعا، ال سيىر جانە قوي ەتى ەكسپورتىن 60،8 مىڭ تونناعا جەتكىزۋگە مۇمكىندىك بەردى.
قازاقستاندا دۇنيەجۇزىلىك جانۋارلار دەنساۋلىعى ۇيىمى (OIE) انىقتاعان 90-نان استام ءقاۋىپتى اۋرۋدىڭ 23-ىنە قارسى ۆاكسيناسيا جۇرگىزىلۋدە. جۇمىس ادىستەرىن جەتىلدىرۋ ماقساتىندا ددسۇ، فاو جانە OIE ساراپشىلارىنىڭ قاتىسۋىمەن جۇمىس توبى قۇرىلدى.
2024 جىلدان باستاپ سالادا يمپورتتى الماستىرۋ ساياساتى بەلسەندى جۇزەگە اسىرىلۋدا.
وتاندىق ۆاكسينالاردىڭ ۇلەسى 34%-دان 78%-عا ءوستى. ءقازىر ساتىپ الىناتىن 22 ۆاكسينانىڭ 18ء-ى قازاقستاندا وندىرىلەدى.
ماتەريالدىق-تەحنيكالىق بازانى نىعايتۋ اياسىندا ەكى جىلدا 401 ۆەتەرينارلىق مەكەمە سالىندى، 892 ارنايى كولىك ساتىپ الىندى. سونىمەن قاتار، 2026–2027 جىلدارى ۆەتستانسيالار، ۆەتپۋنكتتەر جانە مال ولەكسەلەرىن كومۋ ورىندارىن سالۋعا 66،2 ملرد تەڭگە قاراستىرىلعان.
لابوراتوريالىق بازانى كۇشەيتۋ ماقساتىندا 9 سۇيىقتىق حروماتوگرافى ساتىپ الىندى، الداعى ۋاقىتتا تاعى 54 قوندىرعىمەن قامتاماسىز ەتۋ جوسپارلانعان. بۇل ەاەو-نىڭ ازىق-تۇلىك قاۋىپسىزدىگى جونىندەگى تالاپتارىنىڭ 94%-ىن ورىنداۋعا مۇمكىندىك بەرەدى.
شىعىس قازاقستان وبلىسىندا جۇڭگو ستاندارتتارى بويىنشا 38 زاماناۋي قۇرال-جابدىقپەن جابدىقتالعان لابوراتوريا اشىلدى.
يسج (مالداردى ەسەپكە الۋ) جۇيەسى جاڭعىرتىلدى. ول جانۋارلاردى جانە ءونىمدى تولىق قاداعالاۋ مۇمكىندىگىن قامتاماسىز ەتەدى. جالعان تىركەۋدى بولدىرماۋ، ۆاكسيناسيالانعان جانۋارلاردى ءدارى مەرزىمى بىتكەنشە سويماۋ، مال بازارى ءمودۋلى، ەكسپورت كەزىندە كارانتيندى سيفرلىق باقىلاۋ سياقتى فۋنكسيالار ەنگىزىلدى.
ISZH-Mobile جانە TortTulik ءموبيلدى قوسىمشالارى ازىرلەندى. جۇيە قارجى مينيسترلىگىنىڭ قكد، حالىق بانكى، ەاەو سەرۆيستەرى جانە باسقا دا پلاتفورمالارمەن بىرىكتىرىلگەن.
قازاقستان ترانسشەكارالىق بىرنەشە اۋرۋ بويىنشا ءقاۋىپسىز ەل مارتەبەسىن ساقتاپ وتىر. ولاردىڭ قاتارىندا اۋسىلدىڭ كەي وڭىرلەرى (وڭتۇستىك-شىعىس)، جىلقىنىڭ افريكالىق وباسى، سونداي-اق شوشقانىڭ كلاسسيكالىق جانە افريكالىق وباسى، قۇس تۇماۋى بار. سولتۇستىك-باتىس وڭىردە اۋسىلعا قارسى ءقاۋىپسىز ەل مارتەبەسىن الۋ ءۇشىن قۇجاتتار توپتاماسى ۇسىنىلدى.
2025 جىلعا قاراي 16 ۆەتەرينارلىق سەرتيفيكات كەلىسىلدى، بۇل ءونىمدى 42 ەلگە ەكسپورتتاۋعا جول اشادى. ولاردىڭ ىشىندە ەو، ۇلىبريتانيا، جۇڭگو، يران، يراك، اقش جانە كانادا بار.
3 728 قازاقستاندىق كاسىپورىن باسقا ەلدەردىڭ تىزىلىمىنە ەنگىزىلدى.
«بارلىق شارالار ەپيزووتيالىق قاۋىپسىزدىكتى قامتاماسىز ەتۋگە، ءونىم ساپاسىن ارتتىرۋعا جانە قازاقستاننىڭ حالىقارالىق نارىقتاعى ۇستانىمىن نىعايتۋعا باعىتتالعان»، — دەدى امانعالي بەردالين.