سەرتيفيكات العان كوۋچتەردىڭ ءتىزىمى career.enbek.kz سايتىنا جاريالانادى، دەپ حابارلايدى aqshamnews.kz
قازاقستاندا كوۋچ قىزمەتىنىڭ كاسىپتىك ستاندارتى بەكىپ، ول كوۋچينگتىڭ 9 ءتۇرىن قامتىماق. ولار: بيزنەس-كوۋچ، مانساپتىق كوۋچ، لايف-كوۋچ، كوماندالىق كوۋچ، كوشباسشىلىق كوۋچ، دەنساۋلىق جانە ساۋىقتىرۋ كوۋچى، كاسىپكەرلەرگە ارنالعان كوۋچ، ءبىلىم بەرۋ كوۋچى، سپورتقا دايىندايتىن كوۋچتەر.
ۇكىمەتتىڭ مالىمەتىنە سۇيەنسەك، قازاقستاندا كوممەرسيالىق ەمەس ۇيىم رەتىندە تىركەلگەن ICF Kazakhstan كوۋچينگ فەدەراسياسى قۇرىلعان. بۇل ۇيىم ICF حالىقارالىق كوۋچينگ فەدەراسياسىمەن بىرگە «كوۋچينگ قىزمەتى (كوۋچ) تۋرالى» كاسىبي ستاندارتى ازىرلەندى.
«ءقازىر ستاندارت عىلىم جانە جوعارى ءبىلىم مينيسترلىگىندە بەكىتىلۋ ساتىسىندا»، - دەپ جازعان ولجاس بەكتەنوۆ.
بۇدان وزگە «پسيحولوگيالىق، پسيحوسوماتيكالىق جانە كوۋچينگتىك قىزمەتتەر تۋرالى» زاڭ قابىلداۋ، ليسەنزيالاۋ جانە كاسىبي تىركەۋ تەتىگىن ەنگىزۋ، «پسيحولوگ»، «پسيحوسوماتيك»، «كوۋچ»، «مەنتور» اتاۋلارىن تەك ءتيىستى ءبىلىمى جانە كاسىبي بىلىكتىلىگى بار ماماندارعا عانا قولدانۋعا قۇقىق بەرۋ باعىتىندا حالىقارالىق تاجىريبە زەردەلەنگەن كورىنەدى.
«ICF حالىقارالىق كوۋچينگ فەدەراسياسىمەن (ICF Kazakhstan، قازاقستاندا كوممەرسيالىق ەمەس ۇيىم رەتىندە تىركەلگەن) بىرگە «كوۋچينگ قىزمەتى (كوۋچ)» كاسىبي ستاندارتى ازىرلەندى. قازىرگى تاڭدا ول عىلىم جانە جوعارى ءبىلىم مينيسترلىگىندە بەكىتىلۋ ساتىسىندا. كاسىپتىك ستاندارت 9 قىزمەتتى قامتيدى: بيزنەس-كوۋچ، مانساپتىق كوۋچ، لايف-كوۋچ، كوماندالىق كوۋچ، كوشباسشىلىق كوۋچ، دەنساۋلىق جانە ساۋىقتىرۋ كوۋچى، كاسىپكەرلەرگە ارنالعان كوۋچ، ءبىلىم بەرۋ كوۋچى، سپورتتىق دايىندىق كوۋچى. كاسىپتىك ستاندارتتىڭ نەگىزىندە ۇلتتىق بىلىكتىلىك جۇيەسىنىڭ سيفرلىق پلاتفورماسىندا (career.enbek.kz) سەرتيفيكاتتالعان كوۋچ-جاتتىقتىرۋشىلار ءتىزىلىمى جاساقتالادى»، - دەپ حابارلايدى بەكتەنوۆ.
ءبىراق، كوۋچتاردى وقىتۋدى، سەرتيفيكاتتاۋدى جانە تىزىلىمگە ەنگىزۋ جۇمىسىن ICF حالىقارالىق كوۋچينگ فەدەراسياسى جۇرگىزەدى.