قازاقستاندىق جوعارى وقۋ ورىندارىندا كىتاپحانا ءىسى بويىنشا 5 مىڭنان اسا ستۋدەنت ءبىلىم الۋدا. بۇل تۋرالى ق ر عجبم جوعارى جانە جوعارى وقۋ ورنىنان كەيىنگى ءبىلىم كوميتەتىنىڭ ءتورايىمى گۇلزات كوبەنوۆا ءحىى حالىقارالىق عىلىمي-پراكتيكالىق كونفەرەنسياداعى سوزىندە مالىمدەدى، دەپ حابارلايدى اlmaty-akshamy.kz.
بۇگىن قازاق ۇلتتىق قىزدار پەداگوگيكالىق ۋنيۆەرسيتەتىندە «زاماناۋي كىتاپحانا – جوعارى وقۋ ورنىنىڭ اقپاراتتىق-كىتاپحانالىق قىزمەت كورسەتۋ ساپاسىنىڭ كەپىلى» تاقىرىبىندا ەكى كۇندىك كونفەرەنسيا جۇمىسى باستالدى. ءىس-شارا QyzPU 80 جىلدىق مەرەيتويى اياسىندا ق ر عىلىم جانە جوعارى ءبىلىم مينيسترلىگى، ق ر ۋنيۆەرسيتەت كىتاپحانالارىنىڭ قاۋىمداستىعى، ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتى جانە سدۋ ۋنيۆەرسيتەتىنىڭ قولداۋىمەن وتكىزىلۋدە.
ق ر عجبم جوعارى جانە جوعارى وقۋ ورنىنان كەيىنگى ءبىلىم كوميتەتىنىڭ ءتورايىمى گۇلزات كوبەنوۆا 2023-2024 وقۋ جىلىندا كىتاپحانا كادرلارىن دايارلاۋعا ارنالعان گرانتتار سانى 2،5 ەسە ارتقانىن اتاپ ءوتتى.
«ەلىمىزدىڭ 12 جوعارى وقۋ ورنى «كىتاپحانا ءىسى» جانە «اقپاراتتى وڭدەۋ جانە مۇراعات ءىسى» باعدارلامالارى بويىنشا كادرلاردى دايارلاۋدا. ءبىلىم الۋشىلار سانى 5 مىڭنان استام ادامدى قۇرايدى. 2023-2024 وقۋ جىلىندا كىتاپحانا ءىسى قىزمەتكەرلەرىن دايارلاۋعا 123 گرانت ءبولىندى، بۇل كورسەتكىش 2،5 ەسەگە وسكەنىن كورسەتەدى. ۋنيۆەرسيتەتتەر جىل سايىن ەڭبەك نارىعىنا تالداۋ جۇرگىزەدى، سونىڭ نەگىزىندە جاڭا جانە يننوۆاسيالىق باعدارلامالار ازىرلەنەدى. بۇگىنگى تاڭدا وتاندىق جوعارى وقۋ ورىندارىندا 225 كىتاپحانا جۇمىس ىستەيدى. كىتاپتاردىڭ سانى 55 ميلليون دانا، ونىڭ ىشىندە قازاق تىلىندە – 23 ميلليون، ورىس تىلىندە – 29 ميلليون، باسقا تىلدەردە – 2 ميلليون»، – دەدى كوميتەت ءتورايىمى.
كونفەرەنسيا بارىسىندا زاماناۋي ۋنيۆەرسيتەت كىتاپحاناسى جانە جوعارى ءبىلىم مەن عىلىمدى اقپاراتتىق-كىتاپحانالىق قامتاماسىز ەتۋدىڭ دامۋ تەندەنسيالارى، قىزمەت كورسەتۋ ساپاسىن قامتاماسىز ەتۋدىڭ باعدارلامالىق-تەحنيكالىق شەشىمدەرى جانە اقپاراتتىق-كىتاپحانالىق قىزمەت كورسەتۋ ساپاسىن باعالاۋدىڭ زاماناۋي ادىستەرى تالقىلاندى.
كىتاپحانا قاۋىمداستىقتارى مەن مەكەمەلەرىنىڭ حالىقارالىق فەدەراسياسىنىڭ (يفلا) ازيا جانە وكەانيا بويىنشا ايماقتىق فيليالى كوميتەتىنىڭ ءتوراعاسى لين لي سو كىتاپحانا ءىسىنىڭ ماماندارىنا الداعى ۋاقىتتا وتەتىن ماڭىزدى شارالار جايلى اقپارات بەردى.
«الداعى ايلاردا ءبىز بىرنەشە ۆەبينار ۇيىمداستىرامىز، ولاردىڭ ماقساتى قازىرگى زامانعى كىتاپحانا قىزمەتىنىڭ وزەكتى باعىتتارى بويىنشا كىتاپحانا قىزمەتكەرلەرىنىڭ كاسىبي قۇزىرەتتەرىن جەتىلدىرۋ بولىپ تابىلادى. ءبىز كليماتتىڭ وزگەرۋى جانە تابيعي اپاتتاردى جوسپارلاۋ، سيرەك ماتەريالدار مەن باسىلىمداردىڭ ساقتالۋىن قامتاماسىز ەتۋ، ۇنەمى وزگەرىپ وتىراتىن سيفرلىق الەمدە اقپاراتتى ءتيىمدى ىزدەۋ قۇرالدارى سياقتى ماڭىزدى قوعامدىق جانە كاسىبي تاقىرىپتاردى قاراستىرامىز. سونىمەن قاتار وسى جىلدىڭ 30 قىركۇيەگى مەن 3 قازانى ارالىعىندا سىزدەردى اقپاراتتىق پروسەستەردەگى بولىپ جاتقان وزگەرىستەردى زەرتتەۋ جانە تالداۋ ماقساتىندا اۆستراليادا وتەتىن IFLA سامميتىنە قاتىسۋعا شاقىرامىز»، – دەدى سينگاپۋر ۇلتتىق كىتاپحاناسى كەڭەسىنىڭ سەرىكتەستىك ءبولىمىنىڭ ديرەكتورى.
حالىقارالىق شاراعا ەلىمىزدىڭ 14 قالاسىنان 44 جوعارى وقۋ ورنىنان قاتىسىپ جاتىر. الىس جانە جاقىن شەتەلدەردەن (اقش، سينگاپۋر، شۆەيساريا، تۇركيا، رەسەي، قىرعىزستان، وزبەكستان، تاجىكستان، تۇركىمەنستان) 28 مامان كەلدى.