ءوز بيزنەسىن باستاعىسى كەلەتىندەر ارنايى جوباعا قاتىسىپ، ءبىلىم الدى.
قازاقستان ۇكىمەتى حالىقتى جۇمىسپەن قامتۋعا ارنالعان شارالاردى ىسكە اسىرىپ كەلەدى. وسى ماقساتتا ىسكە قوسىلعان ۇلتتىق جوباعا 185 مىڭ ادام قاتىسىپ، ءبىلىمىن جەتىلدىرگەن، دەپ حابارلايدى Almaty-akshamy.kz.
«وسى جىلعى 1 ماۋسىمداعى جاعداي بويىنشا، 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبانىڭ قاتىسۋشىلارى 185 مىڭ ادام بولدى. 167،1 مىڭ ادام جۇمىسقا ورنالاستىرىلدى. ونىڭ 91،2 مىڭى تۇراقتى جۇمىسقا ورنالاستى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
جۇمىس بەرۋشىلەردىڭ ءوتىنىشى بويىنشا 3،4 مىڭ ادام وقۋ ءۇشىن وقىتۋ ۇيىمدارىنا جىبەرىلدى.
ءوز كاسىبىن باستاۋ ءۇشىن 1،5 مىڭ ادام مەملەكەتتىك گرانت الدى.
سۋبسيديالاناتىن جۇمىس ورىندارىنا 82،5 مىڭ ادام ورنالاستىرىلدى. الەۋمەتتىك جۇمىس ورىندارىمەن 11،4 مىڭ، جاستار پراكتيكاسىمەن 8،6 مىڭ، قوعامدىق جۇمىستارمەن 61،1 مىڭ ادام قامتىلدى. «العاشقى جۇمىس ورنى» جوباسى اياسىندا 1،1 مىڭ، «ۇرپاقتار كەلىسىمشارتى» جوباسى اياسىندا 138 ادام، «كۇمىس جاس» جوباسى اياسىندا 226 ادام جۇمىسپەن قامتىلدى.
ەسكە سالايىق، بۇعان دەيىن حالىقتى جۇمىسپەن قامتۋعا ارنالعان شارالار ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى اياسىندا جۇزەگە اسىرىلدى. 2021 جىلى باعدارلاماعا 651،8 مىڭ ادام قاتىستى.
مەملەكەتتىك باعدارلاماعا قاتىسۋشىلار تۇراقتى جانە سۋبسيديالاناتىن جۇمىس ورىندارىمەن قامتىلدى. سونداي-اق ولارعا كاسىپكەرلىكتى دامىتۋ ءۇشىن ميكرونەسيە مەن قايتارىمسىز مەملەكەتتىك گرانت بەرىلىپ، قولداۋ كورسەتىلدى. قىسقا مەرزىمدى كۋرستاردا جانە كاسىپتىك-تەحنيكالىق ۇيىمداردا وقىتىلدى.
بۇدان بولەك، «ەڭبەك» باعدارلاماسىنداعى باعىتتاردىڭ ءبىرى اياسىندا جۇمىس كۇشى كوپ ايماقتاردان جۇمىس كۇشى جەتىسپەيتىن ايماقتارعا كوشىرىلدى.