زاڭ بۇزعاندار15 مىڭ تەڭگە ايىپپۇل تولەيدى نەمەسە 5 تاۋلىككە دەيىن قامالادى
الماتىدا تەمىرجول بيلەتىن ارزانعا الىپ، جولاۋشىلارعا قىمباتقا ساتقان 8 دەرەك تىركەلگەن، دەپ حابارلايدى Almaty-akshamy.kz Almaty.tv-گە سىلتەمە جاساپ.
تەمىرجول ۆوكزالىندا بيلەت تاپشىلىعىن ءوز پايداسىنا جاراتقان پىسىقايلار ازايماي تۇر. ولار پويىزعا بيلەت تاپپاعان جۇرتقا ءوز قىزمەتتەرىن ۇسىنادى. ول ءۇشىن ارنايى اقى دا سۇرايدى ەكەن. زاڭ بۇزعاندارعا ايىپپۇل دا توسقاۋىل بولا الماي تۇر. سەبەبى، اكىمشىلىك قۇقىقبۇزۋشىلىق ءۇشىن 15 مىڭ تەڭگە ايىپپۇل سالىنادى نەمەسە 5 تاۋلىككە دەيىن قامالادى.
«الماتى-1 ستانساسىنداعى جەلىلىك پوليسيا باسقارماسىنىڭ قىزمەت اتقارۋ اۋماعىندا 1300-دەن اسا ازامات اكىمشىلىك جاۋاپكەرشىلىككە تارتىلدى. سونىمەن قاتار، جول ءجۇرۋ بيلەتتەرىن ساتىپ الۋ قىزمەتىن ۇسىنعان 8 ادام اكىمشىلىك جاۋاپكەرشىلىككە تارتىلدى»، – دەدى «الماتى-1» جەلىلىك پوليسيا باسقارماسىنىڭ ءبولىم باستاعى جاندار ءابدىقاپاروۆ.
قالاداعى تەمىرجول ۆوكزالدارىندا ءقازىر جولاۋشىلار اعىنى كوپ. ولاردىڭ باسىم كوپشىلىگى الاكول مەن بالقاش سەكىلدى دەمالىس ورىندارىنا اسىققاندار. جولاۋشىلار جۇردەك پويىزعا بيلەتتىڭ كۇرت قىمباتتاپ كەتكەنىن ايتادى.
«مەن بۇرىن قاراعاندىدان الماتىعا 6 مىڭ تەڭگەگە بيلەت ساتىپ الاتىنمىن. وسى جولى ءبىر بيلەت قانا تاپتىم. ونىڭ ءوزى 20 مىڭ تەڭگە دەپ تۇر. وعان نە سەبەپ ەكەنىن ەشكىم ايتقان جوق. سايتتان الامىزعوي ءبىز»، – دەدى جولاۋشى ۇلپان.
سومكەلەرى مەن قول دوربالارىن ارقالاعانداردىڭ كوپشىلىگى بيلەتتى الدىن الا الىپ قويعان. ءقازىر كاسسا الدىنا كەلىپ، كەزەكتە تەلمىرىپ تۇرىپ بيلەت الاتىنداردىڭ قاتارى سيرەك. كوپشىلىگى ونلاين راسىمدەيدى.
«استانا قالاسىنا بارا جاتىرمىز. بيلەتتى 1 اي بۇرىن الىپ قويدىق. نەگىزى بيلەت تاپشىلىعى بار. جاقىنداعاندا 1-2 كۇن قالعاندا بيلەت پايدا بولادى ەكەن. ونى ءبىز بىلمەيمىز عوي»، – دەدى جولاۋشى دانا الييەۆا.
«قازاقستان تەمىر جولى» ۇلتتىق كومپانياسى بيلەت تاپشىلىعىن جويۋ ماقساتىندا بار مۇمكىندىك جاسالىپ جاتقانىن ايتتى. ول ءۇشىن قوسىمشا پويىزدار مەن ۆاگوندار سانىن ارتتىرۋ دا قاراستىرىلعان ەكەن.
«2019 جىلدان باستاپ ءبىز ءوزىمىزدىڭ رەسمي سايتىمىزدا ارنايى پورتال ەنگىزدىك. ول پورتالدىڭ ماقساتى – الىپساتارلارعا توسقاۋىل قويۋ. بۇل سايتتا ءبىر ادام ءوزىنىڭ جەكە كابينەتى ارقىلى ساناۋلى بيلەت عانا ساتىپ الا الادى. ءقازىر جازعى ماۋسىمدا 158 باعىت بويىنشا پويىزدار قاتىناپ ءجۇر. ونىڭ ىشىندە 11 باعىت الاكولگە بارادى»، – دەدى «جولاۋشىلار تاسىمالى» اق رەسمي وكىلى ءمادي مۇحامەدقالي.
الاكولگە بارىپ دەمالاتىن قازاقستاندىقتاردىڭ سانى بۇرىنعىدان ارتا تۇسپەك. سەبەبى، ءۇشارالداعى اۋەجايدىڭ ۇشىپ-قونۋ جولاعى قايتا جاڭارتىلدى. اۋەجاي 10 شىلدەدەن باستاپ ۇشاق قابىلداي باستايدى.