15 قاراشادا استانا قالاسىندا وتكەن اۋىل شارۋاشىلىعى قىزمەتكەرلەرىنىڭ ءبىرىنشى فورۋمى اياسىندا مەملەكەت باسشىسى ۇكىمەتكە جىلقى شارۋاشىلىعى ينستيتۋتىن قۇرۋدى تاپسىردى.
پرەزيدەنت قاسىم-جومارت توقايەۆتىڭ تاپسىرماسىن ورىنداۋ ماقساتىندا اقتوبە اۋىل شارۋاشىلىعى تاجىريبە ستانساسىنىڭ نەگىزىندە «قازاق جىلقى شارۋاشىلىعى جانە جەمشوپ ءوندىرۋ عىلىمي-زەرتتەۋ ينستيتۋتى» ج ش س قۇرىلدى، دەپ حابارلايدى aqshamnews.kz اۋىل شارۋاشىلىعى مينيسترلىگىنە سىلتەمە جاساپ.
ايتا كەتەيىك، مەكەمە «ۇلتتىق ءعىلىمي-بىلىم بەرۋ ورتالىعى» قۇرامىندا.
جاڭا قۇرىلعان ينستيتۋتتىڭ جۇمىسى – اسىل تۇقىمدى جىلقىلاردىڭ ساپاسىن جاقسارتۋعا، جىلقى شارۋاشىلىعىن بەلسەندى دامىتۋعا، عىلىمي-زەرتتەۋ جۇمىستارىن جۇرگىزۋگە جانە وتاندىق تۇقىمدى سىرتقى نارىققا شىعارۋعا باعىتتالعان. الداعى بەس جىلدا اسىل تۇقىمدى جىلقى سانىن 6-7 پايىزعا ارتتىرۋ كودەلىپ وتىر.
جەرگىلىكتى قوستاناي، اداي جانە سوعىمعا ارنالعان مۇعالجار، جابە، كۇشىم گەنوتيپتەرىن كوبەيتۋ ءۇشىن سەللەكسيالىق جانە اسىلداندىرۋ باعىتىندا جۇمىستار بەلسەندى جۇرگىزىلمەك. ول ءۇشىن جىلقىلاردىڭ ءارتۇرلى گەنەتيكالىق توپتارى تۋرالى اقپاراتتى ساقتايتىن دەرەكتەر قورىن جانە ۇرىقتار مەن ەمبريوندار بانكى قۇرىلماق. سونداي-اق، بيەلەردى قولدان ۇرىقتاندىرۋ زەرتحانالىق پۋنكتىن سالىپ، ارنايى جىلقى ءوسىرۋشى ماماندارىن دايىنداۋ جوسپارلانىپ وتىر. ارنايى جىلقى ۆەتەرينارلىق كلينيكاسىن اشۋ ارقىلى ۆەتەريناريالىق قىزمەت كورسەتۋ دەڭگەيىنىڭ ساپاسى جاقسارادى - دەيدى ماماندار.
2035 جىلعا دەيىن جىلقى شارۋاشىلىعىندا عىلىمي زەرتتەۋلەردىڭ باسىم باعىتتارىنىڭ ءبىرى وتاندىق پوپۋلياسياداعى جىلقىلاردىڭ گەنەتيكالىق الەۋەتىن سەلەكسيالىق، تەحنولوگيالىق ادىستەرمەن ارتتىرىپ، قازاقستاننىڭ ءارتۇرلى وڭىرلەرىنىڭ تاۋار شارۋاشىلىقتارىنا كەڭىنەن ەنگىزۋ. مۇنىڭ ءبارى وسىرىلەتىن تۇقىمداردىڭ ونىمدىلىگىنىڭ 20-25%-عا ءوسۋىن قامتاماسىز ەتەدى.
بەلگىلەنگەن جوسپارلاردى ىسكە اسىرۋدىڭ نەگىزگى شارتتارىنىڭ ءبىرى شەتەلدىك عىلىمي-زەرتتەۋ ورتالىقتارىمەن، ۋنيۆەرسيتەتتەرمەن جانە حالىقارالىق ستاندارتقا ساي زەرتحانالارىمەن بىرلەسە جۇمىس ىستەۋ. بىرلەسكەن عىلىمي-تەحنيكالىق باعدارلامالاردى ىسكە اسىرۋ جانە شەتەلدىك ارىپتەستەرمەن اقپارات الماسۋ ارقىلى ەلىمىزدىڭ جىلقى شارۋاشىلىعىنا وزىق تاجىريبەلەردى ەنگىزۋگە جانە ونى حالىقارالىق ارەنادا باسەكەگە قابىلەتتى ەتۋگە مۇمكىندىك بار.