سونداي-اق 5 بۋكمەكەرلىك كەڭسە مەن 2 توتاليزاتوردىڭ ليسەنزياسى توقتاتىلدى
ق ر مسم تۋريزم يندۋسترياسى كوميتەتىنىڭ حابارلاۋىنشا، ونلاين كازينولاردى انىقتاۋ جانە بۇعاتتاۋ بويىنشا جۇرگىزىلگەن جۇمىستاردىڭ ارقاسىندا جىل باسىنان بەرى ەلىمىزدە 3 670 ينتەرنەت-كازينو بۇعاتتالدى، دەپ حابارلايدى Almaty-akshamy.kz.
سونداي-اق سوت شەشىمىنىڭ نەگىزىندە 5 بۋكمەكەرلىك كەڭسە مەن 2 توتاليزاتوردىڭ ليسەنزياسى توقتاتىلدى. بۇعان ليسەنزيالىق الىمدى تولەۋ بويىنشا قارىزدار، ويىن ايماقتارىنان تىس تىركەۋ، مىندەتتى رەزەرۆتىڭ بولۋى بويىنشا تالاپتاردى ورىنداماۋ جانە باسقا دا زاڭبۇزۋشىلىقتار نەگىز بولدى، -دەپ جازدى Azattyq Ruhy.
2022 جىلى كوميتەت 4 ويىن اۆتوماتتارى زالىنا قاتىستى جوسپاردان تىس تەكسەرۋلەر جۇرگىزگەن بولاتىن. تەكسەرۋ ناتيجەلەرى بويىنشا 1 زال جابىلىپ، ليسەنزياسىنان ايىرىلدى، 3 زالدىڭ قىزمەتى توقتاتىلدى جانە 6 اكىمشىلىك ايىپپۇل سالىندى.
«جاسىراتىنى جوق، ونلاين-كازينولار جانە، اتاپ ايتقاندا، ولاردىڭ جارنامالارى وڭاي جەڭىسكە جەتۋگە ۋادە بەرەدى جانە قۇمار ويىنشىلاردان اقشا تابۋعا تىرىسادى. بۇعان قارسى تۇرۋ ءۇشىن ءبىز ينتەرنەتتە مونيتورينگ جۇرگىزەمىز جانە قولدانىستاعى ليسەنزيالاردى تەكسەرەمىز. مىسالى، 4 بۋكمەكەرلىك كەڭسەنىڭ، 3 توتاليزاتوردىڭ جانە 1 ويىن اۆتوماتتارى زالىنىڭ ليسەنزيالارىن جويۋ جۇمىستارى جۇرگىزىلىپ جاتىر»، - دەپ اتاپ ءوتتى مادەنيەت جانە سپورت ۆيسە-مينيسترى ەرجان ەركىنبايەۆ.
2019 جىلى ەلدە ينتەرنەت-رەسۋرستاردى مونيتورينگىلەۋ ءۇشىن «كيبەرنادزور» اقپاراتتىق جۇيەسى ىسكە قوسىلدى. بۇل بىردەن بىرنەشە مەملەكەتتىك ورگاندارعا، سونىڭ ىشىندە مادەنيەت جانە سپورت مينيسترلىگىنە ينتەرنەت-كازينولاردى جەدەل انىقتاۋعا جانە ولارعا كىرۋگە تىيىم سالۋعا مۇمكىندىك بەرەدى. بۇل رەتتە اقپارات جانە قوعامدىق دامۋ مينيسترلىگىمەن بىرلەسىپ انىقتالعان ينتەرنەت-كازينولاردى بۇعاتتاۋ تۋرالى اقپاراتتى قاراۋ مەرزىمىن قىسقارتۋ جونىندە شارالار قابىلداندى.