بييىلعى 9 ايدا قازاقستاندىقتارعا 10،4 ملن شارشى مەتر تۇرعىن ءۇي پايدالانۋعا بەرىلگەن. بۇل، بىلتىرعى كورسەتكىشتەن 8 پايىز كوپ. ۇكىمەت وتىرىسىندا ق ر پرەمەر-مينيسترى اسقار مامين مالىمدەدى، دەپ حابارلايدى almaty-akshamy.kz
«قۇرىلىستىڭ ءوسۋ قارقىنى 9،7 پايىز دەڭگەيىندە. 9 ايدا ەلدە 10،4 ملن شارشى مەتر تۇرعىن ءۇي پايدالانۋعا بەرىلدى، بۇل وتكەن جىلمەن سالىستىرعاندا 8 پايىزعا كوپ. ينۆەستيسيالاردىڭ قالىپقا كەلۋى بەلسەندى تۇردە جالعاسىپ، 2 پايىز بولدى. ال تاۋ-كەن ءوندىرىسىن ەسەپتەمەگەندە – 15،1 پايىزدى قۇراپ وتىر. نەگىزگى كاپيتالعا ينۆەستيسيالاردىڭ جوعارى كورسەتكىشتەرى قۇرىلىستا، وڭدەۋ ونەركاسىبىندە، ساۋدادا، اۋىل شارۋاشىلىعىندا، جىلجىمايتىن مۇلىك وپەراسيالارىندا، قارجى قىزمەتىندە، اقپارات پەن بايلانىستا بايقالدى»، - دەدى اسقار مامين.
ۇكىمەت باسشىسىنىڭ ايتۋىنا قاراعاندا، ىسكەرلىك بەلسەندىلىكتى ودان ءارى قالپىنا كەلتىرۋ جانە ساپالى ينۆەستيسيالار تارتۋ جۇمىسىن جالعاستىرىپ، ودان ءارى كۇشەيتۋدىڭ ماڭىزى زور. سونداي-اق، ول ماكروەكونوميكالىق كورسەتكىشتەرى جوعارى وڭىرلەردى اتادى.
«قاڭتار-قىركۇيەك ارالىعىنداعى قورىتىندىعا سايكەس، بارلىق نەگىزگى ماكروكورسەتكىش بويىنشا ءوسىم الماتى، اقمولا، جامبىل، قوستاناي وبلىستارى مەن شىمكەنتتە بايقالادى»، - دەدى پرەمەر-مينيستر.