كولىك مينيسترلىگى قازاقستان جولدارىندا اۆتوبۋستار مەن جۇك كولىگى جۇرگىزۋشىلەرىنىڭ جولاۋشىلاردى، باگاجدى نەمەسە جۇكتى تاسىمالداۋ كەزىندە ەڭبەك جانە دەمالىس رەجيمىن ساقتاۋىن باقىلاۋ بويىنشا اۋقىمدى اكسيا وتكىزۋدە. 9 قىركۇيەكتە باستالعان اكسيا 9 قازانعا دەيىن جالعاسادى، دەپ حابارلايدى aqshamnews.kz.
كولىكتى باسقارۋدىڭ كۇندەلىكتى ۇزاقتىعى قولدانىستاعى قاعيداعا سايكەس 9 ساعاتتان اسپاۋ كەرەك. ءتورت جارىم ساعات بويى ۇزدىكسىز باسقارعاننان كەيىن، جۇرگىزۋشى كەمىندە 45 مينۋت ءۇزىلىس جاساۋعا ءتيىس.
اكسيا باستالعالى اۆتوموبيل كولىگى جانە كولىكتىك باقىلاۋ كوميتەتىنىڭ قىزمەتكەرلەرى جالپى سوماسى 4 ميلليون تەڭگەدەن استام اكىمشىلىك قۇقىق بۇزۋشىلىق تۋرالى 218 حاتتاما تولتىردى.
«اكسيا ەلىمىزدىڭ بارلىق وڭىرىندە ءوتىپ جاتىر. تاحوگراف بۇل جۇرگىزۋشىنىڭ ەڭبەك جانە دەمالىس رەجيمىن، قوزعالىس جىلدامدىعىن، ءجۇرىپ وتكەن جولىن ۇزدىكسىز تىركەيتىن ساندىق قۇرىلعى. بۇل قۇرىلعى جول قوزعالىسى قاۋىپسىزدىگىن قامتاماسىز ەتۋگە مۇمكىندىك بەرەدى. قالاارالىق جانە حالىقارالىق تاسىمال بارىسىندا ورىن الاتىن جول كولىك وقيعالارىنىڭ باستى سەبەپتەرىنىڭ ءبىرى جۇرگىزۋشىنىڭ رەجيمدى ساقتاماي، شارشاۋى نەمەسە رۇقسات ەتىلگەن قوزعالىس جىلدامدىعىن اسىرۋى بولىپ تابىلادى.
اكسيا اۆتوجولدارداعى جول-كولىك وقيعالارىنىڭ سانىن ازايتۋعا، جولاۋشىلاردى، باگاجدى جانە جۇكتەردى تاسىمالداۋ بارىسىندا قاۋىپسىزدىكتى قامتاماسىز ەتۋگە، سونداي-اق اۆتوكولىك قۇرالدارى جۇرگىزۋشىلەرىنىڭ ەڭبەك جانە دەمالىس رەجيمىن ساقتاماۋىن انىقتاۋ جانە الدىن الۋعا باعىتتالعان»، - دەدى كوميتەتتىڭ باس ساراپشىسى كۇنايىم كامييەۆا.
جالپى بۇل جۇمىس تۇراقتى جۇرگىزىلەدى. جىل باسىنان بەرى 2 700-دەن استام اۋىر جۇك كولىگى مەن اۆتوبۋس جۇرگىزۋشىلەرى ەڭبەك جانە دەمالىس رەجيمىن بۇزعان. كولىكتىك باقىلاۋ ينسپەكسياسىنىڭ قىزمەتكەرلەرى ولارمەن تۇسىندىرمە جۇمىستارىن جۇرگىزىپ، حاتتاما تولتىردى. ايىپپۇلدىڭ جالپى سوماسى 48 ملن تەڭگەدەن استى.
انىقتاما ءۇشىن:
تاحوگرافتارمەن جابدىقتاۋعا اۆتوبۋستار، جۇك كولىكتەرى، ونىڭ ىشىندە:
- ءقاۋىپتى جۇكتەردى اۆتوموبيلمەن تاسىمالداۋدى؛
- جولاۋشىلاردى، باگاجدى جانە جۇكتەردى اۆتوموبيلمەن حالىقارالىق تاسىمالداۋدى؛
- جولاۋشىلاردى جانە باگاجدى اۆتوموبيلمەن وبلىسارالىق، قالاارالىق تۇراقتى تاسىمالداۋدى؛
- جولاۋشىلاردى جانە باگاجدى اۆتوموبيلمەن وبلىسارالىق، قالاارالىق، اۋدانارالىق تۇراقتى ەمەس تاسىمالداۋدى جۇزەگە اسىرۋ كەزىندە پايدالانىلاتىن كولىكتەر جاتادى.
قاعيدا تالاپتارى ساقتالماعان جاعدايدا «اكىمشىلىك قۇقىق بۇزۋشىلىق تۋرالى» ق ر كودەكسىنىڭ 572-بابىمەن تاسىمالداۋشىلارعا 10 اەك-تەن 50 اەك (36 920 - 184 600 تگ) ارالىعىندا، جۇرگىزۋشىلەرگە 10 اەك (36 920 تگ) كولەمىندە اكىمشىلىك ايىپپۇل كوزدەلگەن.