مەديانىڭ ىقپالى جانە سيفرلىق ۇيلەسىم

ەلوردادا حالىقارالىق دەڭگەيدەگى Astana Media Week شاراسى رەسمي تۇردە اشىلدى

بيىلعى اپتالىقتىڭ باستى تاقىرىبى – «مەديانىڭ ىقپالى جانە سيفرلىق ۇيلەسىم». الداعى ءۇش كۇن بويى جەتەكشى ماماندار، حالىقارالىق ۇيىمدار وكىلدەرى جانە بەلگىلى جۋرناليستەر مەديا سالاسىنىڭ وزەكتى ماسەلەلەرىن تالقىلايتىن بولادى.

سونىمەن قاتار، جاھاندىق مەديا ۇيىمداردىڭ وكىلدەرى مەن سالا كوشباسشىلارى پىكىر الماسىپ، الەمدىك ترەندتەر جانە مەديا-كوممۋنيكاسيا سالاسىنداعى ۇزدىك تاجىريبەلەرىن ۇسىناتىن بولادى. وعان قوسا، ءىس-شارا بارىسىندا 25-26 قىركۇيەك كۇندەرى «كونتەنت-ماركەت» وتكىزىلەدى. بۇل شارادا تەلەارنالار مەن پروداكشن ستۋديالار وزدەرىنىڭ مەديا جوبالارىن تانىستىرادى دەپ جوسپارلانۋدا.

اشىلۋ سالتاناتىندا مادەنيەت جانە اقپارات ءمينيسترى ايدا بالايەۆانىڭ قۇتتىقتاۋ حاتىن ۆيسە-مينيستر قانات ىسقاقوۆ وقىپ بەردى.

«قۇرمەتتى ارىپتەستەر، سىزدەردى جىل سايىنعى Astana Media Week شاراسىنىڭ اشىلۋىمەن قۇتتىقتايمىن. بيىل «مەديانىڭ اسەرى جانە سيفرلىق ۇندەستىك» تاقىرىبىندا ءوتىپ جاتقان اپتالىق، قوعامداعى وزگەرىستەر مەن اقپاراتتىق تەحنولوگيالاردىڭ ماڭىزىن ايقىنداي تۇسۋدە. مەديا تەك اقپارات تاراتۋشى عانا ەمەس، قوعامدىق پىكىر قالىپتاستىرۋشى ءارى مادەنيەتكە ىقپال ەتۋشى ءرول اتقارادى. سيفرلىق تەحنولوگيالاردىڭ دامۋى وسى ۇردىستەردى جاڭا دەڭگەيگە شىعارىپ، مەديانىڭ ىقپالىن كۇشەيتەدى. بۇل مەديا ماماندارىنىڭ بىلىكتىلىگىن ارتتىرىپ، جاڭا مۇمكىندىكتەر اشۋعا كومەكتەسەدى. Astana Media Week مەديا سالاسىنىڭ كوشباسشىلارى مەن ساراپشىلارىن ءبىر ارناعا توعىستىرىپ، ماڭىزدى ماسەلەلەردى تالقىلاۋعا ارنالعان كاسىبي الاڭعا اينالدى. بارشاڭىزعا ساتتىلىك تىلەيمىن»، – دەلىنگەن قۇتتىقتاۋدا.