قازاقستان تمد ەلدەرىنىڭ اراسىندا ءبىرىنشى بولىپ جۇرەك اريتمياسىن ەمدەۋدىڭ جاڭا تەحنولوگياسىن ەنگىزدى.
UMC جۇرەك ورتالىعىنىڭ ماماندارى الەمنىڭ جەتەكشى كلينيكالارىندا قولدانىلاتىن جۇرەك اريتمياسىن ەمدەۋدىڭ وزىق ءادىسى – Farapulse ەلەكترويمپۋلستى ابلياسياسىن ءساتتى ەنگىزدى. تەحنولوگيا جوعارى قاۋىپسىزدىك پەن تيىمدىلىككە يە جانە ەم-شارادان كەيىن پاسيەنتتەردىڭ قالپىنا كەلۋ ۋاقىتى 1-2 كۇنگە دەيىن قىسقارادى، دەپ حابارلايدى aqshamnews.kz دەنساۋلىق ساقتاۋ مينيسترلىگىنە سىلتەمە جاساپ.
ەۋروپالىق جۇرەك اسسوسياسياسى قاۋىمداستىعىنىڭ (EHRA) حاتشىسى بولىپ تابىلاتىن، الەمگە ايگىلى كارديولوگ، فرانسۋز كلينيكاسى Clinique Pasteur پروفەسسورى سەرج بوۆەدا جاڭا تەحنولوگيانى قولدانۋ بويىنشا ماستەر-كلاسس وتكىزدى.
«ەم-شارا از ءينۆازيۆتى – كاتەتەر سان كوكتامىرى ارقىلى ەنگىزىلىپ، جۇرەككە جىبەرىلەدى، وندا ەلەكتروپوراسيا ارقىلى ول تەك پاتولوگيالىق تىندەرگە اسەر ەتەدى. بۇكىل پروسەسس ءبىر ساعاتتان اسپايدى جانە پاسيەنتتەر ەكى كۇننەن كەيىن قالىپتى جاعدايعا ورالادى»، – دەدى پروفەسسور.
Farapulse تەحنولوگياسى قازاقستاندا تمد جانە ورتالىق ازيا ەلدەرىنىڭ اراسىندا العاش رەت ەنگىزىلدى. ول پاسيەنتتەردە جۇرەكشە فيبريللياسياسى– جۇرەكتىڭ جوعارعى كامەرالارىنىڭ تەز جانە ىرعاقتى ەمەس جيىرىلۋى پايدا بولعان كەزدە قولدانىلادى. UMC جۇرەك ورتالىعىنىڭ ماماندارى دوكتور بوۆەدانىڭ جەتەكشىلىگىمەن ماستەر-كلاسس بارىسىندا 8 ەم-شارا وتكىزدى.
«تەحنولوگيا ساۋ تىندەرگە اسەر ەتپەي، اريتميا ايماقتارىنا ءدال اسەر ەتۋگە مۇمكىندىك بەرەدى، بۇل پاسيەنت ءۇشىن ەمدەۋدى بارىنشا ءقاۋىپسىز ەتەدى»، - دەپ اتاپ ءوتتى UMC جۇرەك ورتالىعىنىڭ ينتەرۆەنسيالىق اريتمولوگيا ءبولىمىنىڭ مەڭگەرۋشىسى ومىربەك نۇرالينوۆ.
بۇل تەحنولوگيانى ەنگىزۋ اسىرەسە وزەكتى، ويتكەنى جۇرەك-قان تامىرلارى اۋرۋلارى الەمدەگى ءولىمنىڭ نەگىزگى سەبەپتەرىنىڭ ءبىرى بولىپ قالا بەرەدى.
«قازاقستاندا جىل سايىن 1000-عا جۋىق پاسيەنت جۇرەكشە فيبريللياسياسىن ەمدەۋدى قاجەت ەتەدى جانە مەملەكەتتىك كۆوتانىڭ ارقاسىندا ولار وسى جوعارى تەحنولوگيالىق كومەكتى تەگىن الا الادى»، - دەپ اتاپ ءوتتى UMC باسقارماسىنىڭ ءتوراعاسى يۋريي پيا.