22-23 قىركۇيەك كۇندەرى نيۋ-يوركتەگى بۇۇ شتاب-پاتەرىندە «بولاشاق ءسامميتى» ءوتتى.
بۇل شارا ۇيىم ءۇشىن كەلەسى ۇرپاققا ارنالعان ماڭىزدى وقيعا رەتىندە قاراستىرىلادى، دەپ حابارلايدى aqshamnews.kz
سامميتتە ءسوز سويلەگەن سپيكەرلەردىڭ ءبىرى – قازاقستاننىڭ سىرتقى ىستەر ءمينيسترى مۇرات نۇرتىلەۋ بولدى. «وردا» بۇۇ مىنبەرىنەن ايتىلعان نەگىزگى ويلاردى قىسقاشا ۇسىنادى.
ەڭ الدىمەن، ورتا مەملەكەتتەردىڭ داۋسىنىڭ ماڭىزدىلىعى تۋرالى ءسوز قوزعالدى. جاقىندا عانا قازاقستاندى وسى مەملەكەتتەر قاتارىنا قوسقان بولاتىن.
«قازاقستان پرەزيدەنتى قاسىم-جومارت توقايەۆ ايتقانداي، ورتا مەملەكەتتەر مەن دامۋشى ەلدەردىڭ داۋسى بۇۇ قاۋىپسىزدىك كەڭەسىندە كۇشەيتىلۋى جانە انىق ەستىلۋى كەرەك. گەوساياسي تۇراقسىزدىق پەن ەكونوميكالىق بەلگىسىزدىك كەزەڭىندە الەمگە ديپلوماتيا مەن ديالوگ قاجەت»، - دەدى نۇرتىلەۋ.
سىرتقى ىستەر ءمينيسترى قازاقستان ءۇشىن وتە وزەكتى ماسەلە — تۇرمىستىق زورلىق-زومبىلىق تاقىرىبىن دا قوزعادى:
«ادىلەتتى قازاقستاندى قۇرۋ — نەگىزگى ماقساتىمىز، جانە ءبىزدىڭ ەلىمىز ءولىم جازاسىن الىپ تاستادى، ازاپتاۋلار مەن تۇرمىستىق زورلىق-زومبىلىققا ءابسوليۋتتى توزىمسىزدىك ساياساتىن ەنگىزدى، سونداي-اق ۇلتتىق الدىن الۋ مەحانيزمىن كۇشەيتتى».
مينيستر سونىمەن قاتار كليمات ماسەلەلەرىن دە اتاپ ءوتتى. اتاپ ايتقاندا، قازاقستاننىڭ ورتالىق ازيا مەن اۋعانستان ءۇشىن بۇۇ تۇراقتى دامۋ ورتالىعىن قۇرۋ تۋرالى ۇسىنىسىن ەسكە سالدى. بۇدان بولەك، نۇرتىلەۋ قازاقستاننىڭ يادرولىق قارۋسىزدانۋ ماسەلەسىندەگى ۇستانىمىن ايتتى:
«مۇرات نۇرتىلەۋ حالىقارالىق قاۋىمداستىقتى بولاشاقتا يادرولىق اپاتتىڭ الدىن الۋ ءۇشىن بىرلەسىپ جۇمىس ىستەۋگە شاقىردى»،-دەپ حابارلادى ءسىم سايتى.
قازاقستان اتىنان مينيستر «بولاشاق ءسامميتىنىڭ» ءۇش نەگىزگى قۇجاتىن — بولاشاق پاكتى، جاڭا عالامدىق ساندىق كەلىسىم مەن بولاشاق ۇرپاقتارعا ارنالعان دەكلاراسيانى قولدايتىنىن مالىمدەدى.