كولىك ءمينيسترى مارات قارابايەۆ ەلىمىزدە جول ينفراقۇرىلىمىن باسقارۋدى جاڭعىرتۋ ءۇشىن نەگىز بولاتىن «E-Joldar» ءبىرىڭعاي سيفرلىق پلاتفورماسى ەنگىزىلەتىنىن ايتتى، دەپ حابارلايدى aqshamnews.kz
پلاتفورما قولدانىستاعى سيفرلىق جۇيەلەردى بىرىكتىرەدى جانە بارلىق اۆتوموبيل جولدارى – حالىقارالىق، رەسپۋبليكالىق، وبلىستىق جانە اۋداندىق جولدار تۋرالى اقپاراتتى جيناۋ جانە ەسەپكە الۋ ۇدەرىستەرىن اۆتوماتتاندىرۋعا مۇمكىندىك بەرەدى.
پلاتفورمانىڭ نەگىزگى قىزمەتىنىڭ ءبىرى جول سالاسىن دامىتۋدا اشىقتىقتى قامتاماسىز ەتۋ، سونداي-اق جول اكتيۆتەرىن سەنىمدى باقىلاۋ جانە ءتيىمدى باسقارۋ. سونىمەن قاتار «E-Joldar» اۆتوجول پايدالانۋشىلارى، جەرگىلىكتى ءوزىن-وزى باسقارۋ ورگاندارى جانە جول اكتيۆتەرىن باسقارۋعا جاۋاپتى ماماندار اراسىندا تىعىز بايلانىس ورناتۋعا جاعداي جاسايدى.
ءمينيستردىڭ ايتۋىنشا، پلاتفورمانى ەنگىزۋ 2026 جىلدىڭ ءبىرىنشى جارتىجىلدىعىنا جوسپارلانعان، بۇل جول قىزمەتتەرىنىڭ ساپاسىن ەداۋىر ارتتىرۋعا جانە ينفراقۇرىلىممەن بايلانىستى ماسەلەلەردى شەشۋدى جەدەلدەتۋگە مۇمكىندىك بەرەدى.