كانيكۋل مەن جول قوزعالىسىنىڭ جيىلەۋىنە بايلانىستى ق ر ىشكى ىستەر مينيسترلىگى جول قوزعالىسى قاۋىپسىزدىگى ايلىعىن وتكىزەدى.
بۇل تۋرالى ق ر ىشكى ىستەر مينيسترلىگى اكىمشىلىك پوليسيا كوميتەتى ءتوراعاسىنىڭ ورىنباسارى جاندوس مۇراتالييەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«تەك وتكەن دەمالىس كۇندەرى 80-نەن استام جول-كولىك وقيعاسى بولىپ، 20-دان استام ادام قازا تاپتى. ياعني، جول جاعدايىن ەسكەرىپ، ەلىمىزدەگى جولداردا ادامداردىڭ قازا بولۋى، جاراقات الۋى، مۇگەدەك بولىپ قالۋى سالدارىنان ىشكى ىستەر مينيسترلىگى جول قوزعالىسى قاۋىپسىزدىگى ايلىعىن وتكىزۋدى ۇيعاردى. جول-پاترۋلدىك قىزمەتتىڭ بارلىق ەكيپاجدارى وسى شارانى وتكىزۋگە بارىنشا جۇمىلدىرىلعان. ءبىرىنشى كەزەكتە جولاۋشىلاردى تاسىمالداۋمەن اينالىساتىن كولىك قۇرالدارى تەكسەرىلەدى. ياعني، اۆتوبۋستار، ميكرواۆتوبۋستار، مينيۆەندەر، تاكسي جۇرگىزۋشىلەرى. وسى جول اپاتتارىن تالداۋ ناتيجەسىندە كورگەنىمىزدەي، مىسالى، بەس ورىن قاراستىرىلعان جەڭىل اۆتوكولىكتە – جەتى-سەگىز ادام، بەس ەرەسەك جانە ەكى-ۇش بالا قازا تاپقان»، - دەدى جاندوس مۇراتالييەۆ ىشكى ىستەر مينيسترلىگىنىڭ ونلاين بريفينگىندە.
ونىڭ ايتۋىنشا، جول-پاترۋل پوليسياسىنىڭ تۇنگى ۋاقىتتاعى جۇمىسى كۇشەيتىلگەن، سەبەبى جول-كولىك وقيعالارىنىڭ باسىم بولىگى قاراڭعى تۇسكەندە جيىلەيدى.
سونداي-اق، دەمالىس كەزىندە اۆتوكولىك جولدارىندا قوزعالىس كوبەيەدى. قىزمەتكەرلەر ءتۇرلى سەبەپتەر بويىنشا اۆتوكولىكتەردى توقتاتقاندا جۇرگىزۋشىلەردىڭ، اسىرەسە، تۇنگى ۋاقىتتا مۇقيات بولۋى ءۇشىن ءتۇسىندىرۋ جۇمىستارىن جۇرگىزەدى.
سونىمەن بىرگە، ج. مۇراتالييەۆ ءبىرقاتار جول اپاتىن تەكسەرگەندە تەجەگىش ءىزىنىڭ جوقتىعى انىقتالعانىن، بۇل جۇرگىزۋشىلەردىڭ كولىكتە ۇيىقتاپ كەتكەنىن بىلدىرەتىنىن ايتتى. وسى سەبەپتى سوڭعى ۋاقىتتا 8 ادام قازا تاۋىپ، 9 ادام جاراقات العان.
سوندىقتان، كولىكتى توقتاتقان پوليسيا قىزمەتكەرلەرى جۇرگىزۋشىنىڭ جاي-كۇيىنە – ساپاردى جالعاستىرا الاتىنىنا، كولىكتىڭ قاۋىپسىزدىك تالاپتارىنا سايكەستىگىنە، جولاۋشىلار سانىنا جانە باسقا دا ماسەلەلەرگە نازار اۋدارادى.