قازاقستاندا بيىل جول قاۋىپسىزدىگى احۋالى كۇردەلى بولىپ وتىر، - دەپ حابارلايدى Aqshamnews.kz.
ورتالىق كوممۋنيكاسيالار قىزمەتىندەگى بريفينگتە ءىىم اكىمشىلىك پوليسيا كوميتەتى ءتوراعاسىنىڭ ورىنباسارى عالىم سارعۇلوۆتىڭ مالىمدەۋىنشە، 2024 جىلدىڭ باسىنان بەرى 29 مىڭنان استام جول-كولىك وقيعاسى ورىن الىپ، سالدارىنان 1 916 ادام كوز جۇمعان، 40 مىڭنان استامى ءتۇرلى جاراقات العان.
سپيكەردىڭ ايتۋىنشا، اپاتتاردىڭ نەگىزگى سەبەپتەرى جىلدار بويى وزگەرمەي كەلەدى:
– جىلدامدىقتى شامادان تىس اسىرۋ؛
– ماس كۇيىندە كولىك جۇرگىزۋ؛
– جاياۋ جۇرگىنشىلەردىڭ جولدى بەلگىلەنبەگەن جەردەن كەسىپ ءوتۋى؛
– جۇرگىزۋشىلەر ءتارتىبىنىڭ تومەندىگى.
تەك جوعارى جىلدامدىقتىڭ كەسىرىنەن 406 ادامنىڭ ءومىرى قيىلعان. قارسى جولاققا شىعۋدان – 400، جولدى رۇقسات ەتىلمەگەن جەردەن وتۋدەن – 67 ادام قازا تاپقان.
جولداعى تارتىپسىزدىك كولەمى دە الاڭداتارلىق
جىل باسىنان بەرى:
– 12 ملن-نان استام جول ەرەجەسىن بۇزۋ دەرەگى انىقتالدى؛
– 21 مىڭ ماس جۇرگىزۋشى ۇستالدى؛
– 25 مىڭ ادام جۇرگىزۋشى كۋالىگىنەن ايىرىلدى؛
– 21 مىڭ ازامات اكىمشىلىك قاماۋعا الىندى؛
– 401 مىڭ جاياۋ جۇرگىنشىگە ايىپپۇل سالىندى.
سارعۇلوۆتىڭ ايتۋىنشا، جول قوزعالىسى قاۋىپسىزدىگىن ارتتىرۋ ماقساتىندا سيفرلىق باقىلاۋ كۇشەيتىلىپ جاتىر. ءقازىر:
– 523 ءموبيلدى باقىلاۋ كەشەنى جۇمىس ىستەيدى؛
– «جاسىرىن پاترۋل» ءادىسى قولدانىلادى؛
– دروندار ارقىلى 4 مىڭنان استام قۇقىقبۇزۋشىلىق تىركەلگەن؛
– بارلىق كامەرالار مەن سيفرلىق جۇيەلەر «تور» پلاتفورماسىنا بىرىكتىرىلگەن.
بۇل تەحنولوگيالار ىزدەۋدەگى كولىكتەردى انىقتاۋعا، اگرەسسيۆتى جۇرگىزۋشىلەردى باقىلاۋعا، ۇزدىكسىز ۇزاق جول جۇرگەن «شارشاعان جۇرگىزۋشىلەردى» بەلگىلەۋگە مۇمكىندىك بەرەدى.
ورتاشا جىلدامدىقتى باقىلاۋ دا كۇشەيتىلەدى.
ءقازىر ۇزىندىعى 2 مىڭ شاقىرىم بولاتىن 8 تاسجولدا ورناتىلعان جۇيە الداعى ۋاقىتتا تاعى 10 ءىرى باعىتتا ىسكە قوسىلادى. «استانا–ششۋچينسك» جانە «استانا–قاراعاندى» تراسسالارىنا 56 LED اقپاراتتىق بەلگى ورناتىلىپ، اۋا رايىنا بايلانىستى جىلدامدىق وزگەرتىلەتىن رەجيم ەنگىزىلدى.
جاياۋ جۇرگىنشىلەر قاۋىپسىزدىگى - باسىم باعىت.
جۇرگىنشىلەرگە جول بەرمەۋ دەرەكتەرىن ازايتۋ ءۇشىن ارنايى اۆتوماتتاندىرىلعان كەشەندەر ورناتىلۋدا. قاراعاندى وبلىسىندا مۇنداي 22 كەشەن جۇمىس ىستەپ، 7 مىڭنان استام بۇزۋشىلىقتىڭ جولىن كەسكەن. ەڭ ماڭىزدىسى - ورناتىلعان ايماقتاردا بىردە-بىر جول اپاتى تىركەلمەگەن. بۇل تاجىريبە تاعى بەس وڭىردە جۇزەگە اسىرىلادى.