وقۋ-جاتتىعۋدى ۇيلەستىرۋ جونىندەگى رەسپۋبليكالىق شتاب شىعىس قازاقستان وبلىسىنىڭ وسكەمەن قالاسىندا ورنالاسقان.
وقۋ-جاتتىعۋدىڭ ەكىنشى كۇنى جويقىن جەر سىلكىنىسىنىڭ سالدارىن جويۋ كەزىندە اۆاريالىق-قۇتقارۋ قۇرالىمدارىنىڭ پراكتيكالىق ءىس-قيمىلدارىن پىسىقتاۋ جالعاستىرىلدى، دەپ حابارلايدى Almaty-akshamy.kz توتەنشە جاعدايلار مينيسترلىگىنە سىلتەمە جاساپ.
وسىنداي ءىس-شارالار ەلىمىزدىڭ بارلىق سەيسميكالىق ءقاۋىپتى وڭىرلەرىندە الماتى، شىمكەنت قالالارىندا، اباي، جەتىسۋ، الماتى، شىعىس قازاقستان، جامبىل، قىزىلوردا جانە تۇركىستان وبلىستارىندا وتكىزىلدى. قالعان وڭىرلەردە اپات ايماقتارىنا كۇشتەر مەن قۇرالداردى جىبەرۋ ۇيىمداستىرىلدى.
وقۋ-جاتتىعۋ ەلىمىزدىڭ سەيسميكالىق ءقاۋىپتى وڭىرلەرىندە تۇراتىن حالىقتى جەر سىلكىنىسى مەن باسقا دا توتەنشە جاعدايلار تۋىنداعان كەزدەگى ءىس-قيمىلدارعا جاپپاي ۇگىت-ناسيحات جۇرگىزۋگە جانە وقىتۋعا باعىتتالعان ءبىرىڭعاي كەشەندى مىندەت فورماتىندا ءوتتى.
حالىقتى جەر سىلكىنىسى كەزىندەگى ءىس-قيمىلدارعا وقىتۋ ماقساتىندا «جەر سىلكىنىسى كەزىندەگى 10 قادام» جانە «دابىل چەمودانىن جاساقتاۋ» جادىنامالارىن تاراتا وتىرىپ، جالپى سانى 300 مىڭ ادامدى قامتيتىن 5 مىڭعا جۋىق كوپقاباتتى تۇرعىن ءۇي مەن 23 مىڭ جەكە تۇرعىن ءۇيدى ارالاۋ جۇرگىزىلدى. زارداپ شەككەن حالىقتى قابىلداۋ پۋنكتتەرىن ورنالاستىرۋ تۋرالى اقپاراتى بار 24 مىڭنان استام دانا QR كودتارى ورناتىلدى.
وقۋ-جاتتىعۋ بارىسىندا مەملەكەتتىك ورگاندار اراسىنداعى ءوزارا ءىس-قيمىلدى ۇيىمداستىرۋ، حالىقتى حاباردار ەتۋ، ەۆاكۋاسيالاۋ، زارداپ شەككەن حالىقتى ورنالاستىرۋ، مەديسينالىق جانە پسيحولوگيالىق كومەك كورسەتۋ، وقۋ-جاتتىعۋ جوسپارىنا سايكەس تۇراقتى ورنالاسقان پۋنكتتەردەن جيىنتىق توپتاردى قالىپتاستىرۋ، تاسىمالداۋ جانە توتەنشە جاعداي ايماعىنا كوشىرۋ، قۇتقارۋ قۇرالىمدارىنىڭ كۇشتەرى مەن قۇرالدارىن باسقارۋ، سونداي-اق ۆولونتەرلىك جانە ۇكىمەتتىك ەمەس ۇيىمدارمەن جۇمىس ماسەلەلەرى پىسىقتالدى.
بارلىق مۇددەلى قىزمەتتەر مەن ۇيىمداردى تارتا وتىرىپ، 203 تاكتيكالىق-ارنايى وقۋ-جاتتىعۋ وتكىزىلدى، وعان 5 مىڭ ادام جانە 1 مىڭ بىرلىك تەحنيكا، ونىڭ ىشىندە اۋە كەمەلەرى تارتىلدى. زارداپ شەككەن حالىققا ارنالعان 20 لاگەر، 10 جىلجىمالى گوسپيتال، سونداي-اق 10 دالالىق باسقارۋ پۋنكتى اشىلدى.