وسى ماقساتتا ءبىرىڭعاي ۆەرتيكال قۇرىلدى.
اۋىل شارۋاشىلىعىنىڭ ماماندارى جەر قاتىناستارى سالاسىندا جيناقتالعان پروبلەمالاردى شەشۋ مەن تارتىپكە كەلتىرۋ ءۇشىن اسا ماڭىزدى قادام جاسالعانىن ايتتى، دەپ حابارلايدى Almaty-akshamy.kz.
2014 جىلدان باستاپ جەردىڭ پايدالانىلۋى مەن قورعالۋىن مەملەكەتتىك باقىلاۋ فۋنكسيالارى تولىعىمەن جەرگىلىكتى اتقارۋشى ورگاندارعا جۇكتەلدى.
«بۇرىن جەر قاتىناستارى جانە مەملەكەتتىك باقىلاۋ باسقارمالارى وبلىستىق، قالالىق جانە اۋداندىق اكىمدىكتەردىڭ قۇرامىنا كىرىپ، وندا «مۇددەلەر قاقتىعىسى» ورىن الاتىن. سونداي-اق جەر قاتىناستارى جانە جەردىڭ پايدالانىلۋى مەن قورعالۋىن باقىلاۋ جونىندەگى ۋاكىلەتتى ورگانداردىڭ ءبىر مەملەكەتتىك ورگاندا بولۋىنا بايلانىستى سىبايلاس جەمقورلىق سيپاتىنداعى شەشىمدەر قابىلداۋ تاۋەكەلى بولاتىن»، - دەلىنگەن اۋىل شارۋاشىلىعى مينيسترلىگى باسپا ءسوز قىزمەتىنىڭ حابارلاماسىندا.
مەملەكەت باسشىسىنىڭ 2021 جىلعى 19 ناۋرىزداعى ق ر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ V وتىرىسىندا بەرگەن تاپسىرماسىنا سايكەس، جەر رەفورماسى جونىندەگى كوميسسيا قۇرىلدى.
كوميسسيانىڭ 5 وتىرىسىندا 120-دان استام ۇسىنىس كوتەرىلىپ، جەر زاڭناماسىن جەتىلدىرۋ بويىنشا ءبىرقاتار جۇيەلى ۇسىنىمدار ازىرلەندى. ۇسىنىستاردىڭ ءبىرى «ءورتالىق-وڭىر» قاعيداتى بويىنشا جەردى ۇتىمدى پايدالانۋعا مەملەكەتتىك باقىلاۋدىڭ ءبىرىڭعاي ۆەرتيكالىن قۇرۋ بولدى.
وسىعان بايلانىستى، 2021 جىلعى 30 ماۋسىمدا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارىن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭى قابىلداندى. ول جەردىڭ پايدالانىلۋى مەن قورعالۋىن مەملەكەتتىك باقىلاۋ فۋنكسيالارىن 2022 جىلعى 1 قاڭتاردان باستاپ اۋماقتىق بولىمشەلەرىن قۇرا وتىرىپ، ورتالىق ۋاكىلەتتى ورگاننىڭ ۆەدومستۆوسىنا بەرۋدى كوزدەيدى.
وسىلايشا، جەر بەرۋ جونىندەگى فۋنكسيالار اكىمدىكتەردە قالدى، ال اكىمدىكتەردىڭ جەر بەرۋىن جانە مەنشىك يەلەرىنىڭ/جەر پايدالانۋشىلاردىڭ جەردى پايدالانۋىن باقىلاۋ جونىندەگى فۋنكسيالار اۋماقتىق دەپارتامەنتتەردى قۇرۋ ارقىلى ق ر اشم جەر رەسۋرستارىن باسقارۋ كوميتەتىنە بەرىلدى.
وسىلايشا، «ءورتالىق-وڭىر» قاعيداتى بويىنشا قر-دا جەردى پايدالانۋ مەن قورعاۋدى مەملەكەتتىك باقىلاۋدىڭ ءبىرىڭعاي ۆەرتيكالى قۇرىلدى جانە جەر قاتىناستارى سالاسىندا جيناقتالعان پروبلەمالاردى شەشۋ مەن تارتىپكە كەلتىرۋ ءۇشىن اسا ماڭىزدى قادام جاسالدى.