ۇكىمەت جوسپارى ايتىلدى.
قازاقستان ۇكىمەتىنىڭ جاستاردى جۇمىسقا ىنتالاندىرۋ ماقساتىندا جاسالىپ جاتقان جۇمىستار جايىندا ەڭبەك جانە حالىقتى الەۋمەتتىك قورعاۋ ۆيسە-مينيسترى ەرجان ءبىرجانوۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتى بارىسىندا ايتتى، دەپ حابارلايدى Almaty-akshamy.kz.
«جاستاردى جۇمىسقا تارتۋ جانە ىنتالاندىرۋ ءۇشىن ەڭبەك زاڭناماسىنا «جاس قىزمەتكەر» ۇعىمىن ەنگىزۋ، ولار ءۇشىن سىناق مەرزىمىن الىپ تاستاۋ، باسقا وڭىرلەردەن جۇمىسقا كەلگەن جاستار ءۇشىن تۇرعىن ءۇي جالداۋعا كوتەرمە جاردەماقى ەنگىزۋ جونىندە شارالار قابىلداناتىن بولادى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
مامانداردىڭ ايتۋىنشا، كوپ بالالى وتباسىلار (76،8 مىڭ) جانە مۇگەدەكتىگى بار بالالاردى تاربيەلەپ وتىرعان وتباسىلار (7 مىڭ) ءۇشىن بارلىق وڭىرلەردە قولدانىستاعى ۇلگىدەگى ايەلدەردى قولداۋ ورتالىقتارىن قۇرۋ جوسپارلانۋدا. بۇل ورتالىقتاردا جىل سايىن 20 مىڭعا جۋىق ايەلگە كەشەندى قولداۋ كورسەتىلەتىن بولادى.
جوعارىدا كورسەتىلگەن شارالار ناقتى قاجەتتىلىكتەر بويىنشا الەۋمەتتىك قولداۋعا مۇقتاج ازاماتتاردى انىقتاۋعا، جاستاردىڭ جۇمىسپەن قامتىلۋىن قامتاماسىز ەتۋگە، بالالى وتباسىلارعا كومەك كورسەتۋگە مۇمكىندىك بەرەدى.
ەڭبەك نارىعىنا تالداۋ جۇرگىزىلدى جانە نازار اۋدارۋدى تالاپ ەتەتىن نەگىزگى اسپەكتىلەر ايقىندالدى، اتاپ ايتقاندا، جۇمىسپەن قامتىلعانداردىڭ 15،2%-ى تەك ورتا بىلىمگە يە، تۇلەكتەردىڭ 40%-دان استامى ماماندىق بويىنشا جۇمىس ىستەمەيدى، جاستاردىڭ 34،1%-ى ماماندىقتى ءوز بەتىنشە تاڭدامادى. ساراپشىلاردىڭ بولجامى بويىنشا، الداعى 5 جىلدا قىزمەتكەرلەردىڭ داعدىلارى مەن تالاپتاردىڭ 40%-عا جۋىعى وزگەرەدى.
وسى ماسەلەلەردى شەشۋ ءۇشىن مىناداي شارالار جوسپارلانىپ وتىر:
- بيزنەسپەن بىرلەسىپ، كاسىپورىندار جانىنداعى وقۋ ورتالىقتارى بازاسىندا جاپپاي قايتا دايارلاۋدىڭ، بىلىكتىلىكتى ارتتىرۋدىڭ «فابريكالارىن» قۇرۋ قاجەت. جاستاردى سۇرانىسقا يە ماماندىقتارعا وقىتۋعا ەرەكشە نازار اۋدارۋ جوسپارلانۋدا؛
- سۇرانىسقا يە داعدىلاردى تانۋ جۇيەسىن ەنگىزۋ. مەملەكەت باسشىسىنىڭ تاپسىرماسى بويىنشا ەڭبەكمينى «كاسىپتىك بىلىكتىلىك تۋرالى» زاڭ جوباسىن ازىرلەدى. ونىڭ شەڭبەرىندە بىلىكتىلىكتى تانۋدىڭ تاۋەلسىز ورتالىقتارىن قۇرۋ ءۇشىن ءتيىمدى جاعدايلار جاساۋ، جىل سايىنعى سەرتيفيكاتتاۋدان ءوتۋ ءۇشىن ىزدەنۋشىلەرگە كەمىندە 1000 ۆاۋچەر ۇسىنۋ كوزدەلەدى. ياعني، ءبىر رەتتىك ۆاۋچەر نەگىزىندە جۇمىسسىزدار كەيىننەن جۇمىسقا ورنالاسۋ ءۇشىن ءوز بىلىكتىلىگىن راستاي الادى؛
- skills.enbek.kz پلاتفورماسى ارقىلى جاڭا ءبىلىم مەن داعدىلاردى يگەرۋ ءۇشىن جاعداي جاساۋ. پورتال 2021 جىلى جالپى ەل حالقىنىڭ ءبىلىم دەڭگەيى مەن كاسىبيلىگىن ارتتىرۋ، مانساپتىق دامۋدى ىنتالاندىرۋ جانە «ءومىر بويى وقىتۋ» تۇجىرىمداماسىن ىلگەرىلەتۋ ماقساتىندا ىسكە قوسىلدى. بۇل - Coursera سياقتى حالىقارالىق ونلاين وقىتۋ پلاتفورمالارىنىڭ انالوگى؛
- وقۋشىلار مەن جاستار اراسىندا كاسىپتىك باعدارلاۋدى ۇيىمداستىرۋ ءۇشىن مانساپتىق ىلگەرىلەۋ بويىنشا كەمىندە 100 نۇسقاۋلىق ازىرلەۋ. سۇرانىسقا يە كاسىپتەر مەن پەرسپەكتيۆالى داعدىلاردىڭ ءتىزىمى جىل سايىن جاڭارتىلىپ وتىرادى.
بۇل شارالار جۇمىس بەرۋشىلەردىڭ سۇرانىسى بويىنشا كادرلار دايارلاۋعا، جاستاردى ەڭبەك نارىعىندا سۇرانىسقا يە ماماندىقتار مەن داعدىلار تۋرالى حاباردار ەتۋگە، ولارعا ماماندىق تاڭداۋدا قولداۋ كورسەتۋگە مۇمكىندىك بەرەدى.
ۆيسە-مينيستر سونداي-اق، اعىمداعى جىلدان باستاپ مەملەكەتتىك جوسپارلاۋدىڭ جاڭا جۇيەسىنە سايكەس ەكونوميكانىڭ باسىم سالالارى بويىنشا ۇلتتىق جوبالاردى ىسكە اسىرۋ باستالعانىن، ولاردىڭ نەگىزگى مىندەتى جۇمىس ورىندارىن قۇرۋ بولىپ تابىلاتىنىن اتاپ ءوتتى.
«وڭىرلەردىڭ ورتا مەرزىمدى كەزەڭگە ارنالعان دامۋ پەرسپەكتيۆالارىمەن جۇمىس ورىندارىن قۇرۋ بويىنشا مىندەتتەردى بىرىكتىرۋدى قامتاماسىز ەتەتىن كەشەندى قۇجاتتار بولىپ تابىلاتىن وڭىرلىك جۇمىسپەن قامتۋ كارتالارى قالىپتاستىرىلدى. جالپى، 2025 جىلعا دەيىن 2 ملن-نان استام، ونىڭ ىشىندە 600 مىڭنان استام تۇراقتى جانە 1،4 ملن-نان استام ۋاقىتشا جۇمىس ورىندارى قۇرىلاتىن بولادى. بارلىق قۇرىلعان جۇمىس ورىندارى «جۇمىس ورىندارىن قۇرۋدىڭ ينتەگراسيالانعان كارتاسى» اقپاراتتىق جۇيەسىندە ۆيزۋالداناتىن بولادى. جەرگىلىكتى اتقارۋشى ورگانداردىڭ الدىنا جۇيەنى ساپالى تولتىرۋ مىندەتى قويىلدى.ەكى ايدىڭ قورىتىندىسى بويىنشا شامامەن 65 مىڭ جۇمىس ورنى نەمەسە جىلدىق جوسپاردىڭ 15% (444،4 مىڭ) قۇرىلدى، ونىڭ ىشىندە 16 مىڭنان استامى تۇراقتى»، – دەپ حابارلادى ەرجان ءبىرجانوۆ.
ءوز ءسوزىنىڭ سوڭىندا ول، ەڭبەكمينى جاڭا ترەندتەرگە سايكەس، حالىقتى جۇمىسپەن قامتۋ سالاسىن سيفرلاندىرۋ بويىنشا جۇيەلى جۇمىس جۇرگىزىپ جاتقانىن اتاپ ءوتتى.
«نەگىزگى ماقسات – بيزنەس-ۇدەرىستەردى تولىعىمەن قايتا قاراۋ، پرواكتيۆتى فورماتقا كوشۋدى جۇزەگە اسىرۋ. ول ءۇشىن ءبىز ءبىرىڭعاي سيفرلىق ەكوجۇيەنى قۇراتىن بولامىز، وعان مىناداي سەرۆيستەر كىرەدى: ەلەكتروندىق ەڭبەك بيرجاسى – enbek.kz، قىسقا مەرزىمدى ونلاين كۋرستار پورتالى – skills.enbek.kz، فريلانسەرلەر ءۇشىن جۇمىس ىزدەۋ قىزمەتى – freelance.enbek.kz، ەڭبەك شارتتارىن ەسەپكە الۋدىڭ ەلەكتروندىق جۇيەسى – ehr24.kz، كاسىپكەرلىكتى دامىتۋ شارالارىن كورسەتۋ جونىندەگى اۆتوماتتاندىرىلعان جۇيە – business.enbek.kz. بۇل سەرۆيستەردى ەڭبەكمينى «ەڭبەك رەسۋرستارىن دامىتۋ ورتالىعى» اق ماماندارىمەن بىرلەسىپ دەربەس ازىرلەيدى»، – دەپ قورىتىندىلادى ەرجان ءبىرجانوۆ.