ماماندار پىكىر الماستى.
بىتىمگەرشىلىك دايىندىق ورتالىعىندا قازاقستان رەسپۋبليكاسى قارۋلى كۇشتەرىنىڭ تىل باستىعى جانە قارۋ-جاراق باسقارماسى مەن امەريكا قۇراما شتاتتارى قارۋلى كۇشتەرى ورتالىق قولباسشىلىعىنىڭ وكىلدەرى جۇمىس بابىمەن كەزدەستى، دەپ حابارلايدى Almaty-akshamy.kz
اقپارات الماسۋ بارىسىندا اسكەري نىسانداردىڭ قاۋىپسىزدىگىن قامتاماسىز ەتۋ سالاسىنداعى ىنتىماقتاستىق ماسەلەلەرى قارالدى.
«قازاقستان قارۋلى كۇشتەرىنىڭ وكىلدەرى وق-دارىلەردىڭ تەحنيكالىق جاي-كۇيىن ەسەپكە الۋ، ساقتاۋ، باقىلاۋ جانە باعالاۋدى ۇيىمداستىرۋ تاجىريبەسىن زەردەلەپ، ماتەريالدىق مۇلىكتى ساقتاۋ وبەكتىلەرىن سالۋ جانە تەحنيكالىق كۇزەت قۇرالدارىن قولدانۋ ماسەلەلەرى بويىنشا پىكىر الماستى»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
ەل پرەزيدەنتى قاسىم-جومارت توقايەۆتىڭ تاپسىرماسىنا سايكەس، قازاقستان قارۋلى كۇشتەرىندە وق-دارىلەردى ءقاۋىپسىز ساقتاۋدى، پايدالانۋعا جارامسىز جانە ودان ءارى ساقتاۋعا ءقاۋىپتى زاتتاردى جويۋ شارالارىن ىسكە اسىرۋ جالعاسۋدا.