قازاقستاندا جاڭا كاسىبي مەرەكە بەكىتىلدى

قاۋلى العاشقى رەسمي جاريالانعان كۇنىنەن باستاپ قولدانىسقا ەنگىزىلەدى

قازاقستاندا 10 قاراشادا سيفرلاندىرۋ جانە اقپاراتتىق تەحنولوگيالار قىزمەتكەرلەرى كۇنى اتالىپ وتەدى، دەپ حابارلايدى Almaty-akshamy.kz ۇكىمەتتىڭ باسپا ءسوز قىزمەتىنە سىلتەمە جاساپ.

ق ر پرەمەر-مينيسترى ءاليحان سمايىلوۆ «قازاقستان رەسپۋبليكاسىنداعى مەرەكەلىك كۇندەردىڭ تىزبەسىن بەكىتۋ تۋرالى» قازاقستان رەسپۋبليكاسى ۇكىمەتىنىڭ 2017 جىلعى 31 قازانداعى №689 قاۋلىسىنا وزگەرىستەر مەن تولىقتىرۋ ەنگىزۋ تۋرالى» ءتيىستى قاۋلىعا قول قويدى.

قاۋلىعا سايكەس 17 مامىردا اتالىپ وتەتىن بايلانىس جانە اقپاراتتاندىرۋ قىزمەتكەرلەرى كۇنى مەرەكەسى بايلانىس قىزمەتكەرلەرى كۇنى بولىپ وزگەرتىلدى.

جاڭا كاسىبي مەرەكەنى بەكىتۋگە سالا قىزمەتكەرلەرىن قولداۋ ماقساتىندا سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى باستاماشى بولدى. بۇگىندە بۇل سالاداعى قىزمەتكەرلەردىڭ جالپى سانى 155 مىڭنان اسادى.

سيفرلىق ترانسفورماسيا – قوعامنىڭ ءومىر ءسۇرۋ ساپاسىن جاقسارتاتىن، ەڭبەك ونىمدىلىگىنىڭ ءوسۋىن قامتاماسىز ەتەتىن، ەكونوميكانىڭ باسەكەگە قابىلەتتىلىگىن ارتتىراتىن نەگىزگى فاكتورلاردىڭ ءبىرى. اقپاراتتىق تەحنولوگيالار سالاسىنداعى ماماندار ەڭبەك نارىعىندا جوعارى سۇرانىسقا يە.

ايتا كەتسەك، بيىل قازاقستان بۇۇ ەلەكتروندىق ۇكىمەتتى دامىتۋ جونىندەگى رەيتينگىندە (UN Global e-Government Development Index) 193 مەملەكەتتىڭ ىشىندە 28-ورىندى يەلەندى. اتاپ ايتقاندا، «ونلاين-قىزمەتتەر ساپاسىنىڭ يندەكسى» بويىنشا ەلىمىز 8-ورىندا.

قاۋلى العاشقى رەسمي جاريالانعان كۇنىنەن باستاپ قولدانىسقا ەنگىزىلەدى.