دۋلات ءۇش راۋند بويى شەبەرلىگىنىڭ باسىم ەكەندىگىن كورسەتتى
يوردانيانىڭ اممان قالاسىندا ءوتىپ جاتقان ازيا چەمپيوناتىندا دۋلات بەكباۋوۆ العاشقى جەكپە-جەگىن ءساتتى وتكىزدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قازاقستان چەمپيونى دۋلات بەكباۋوۆ 67 كەلىگە دەيىنگى سالماقتا تۇركمەنستاندىق ساپارمۇرات ودايەۆپەن رينگكە شىقتى.
دۋلات ءۇش راۋند بويى شەبەرلىگىنىڭ باسىم ەكەندىگىن كورسەتىپ، سوققىلارىن كوبىرەك دارىتا ءبىلدى. تورەشىلەر 5:0 ەسەبىمەن جەڭىستى قازاقستاندىق بوكسشىعا بەردى.
وسىلايشا، 6 قاراشا كۇنى دۋلات جارتىلاي فينالعا شىعۋ ءۇشىن قىرعىزستاندىق جاكشىلىك تالايبەكوۆپەن تالاسادى.
سونىمەن قاتار بۇگىن سانجار تاشكەنباي 48 كەلىگە دەيىنگى سالماقتا وزبەكستاندىق اسيلبەك دجاليلوۆپەن، اسلانبەك شىمبەرگەنوۆ (71 كگ) فيليپپيندىك مارجون پيانيارمەن قولعاپ تۇيىستىرەدى.
كۇندىزگى سەسسيا استانا ۋاقىتىمەن ساعات 16.00-دە، كەشكى سەسسيا 21.00-دە باستالادى.
ەسكە سالا كەتەيىك، بۇدان بۇرىن بوكستان ازيا چەمپيوناتىن سەرىك تەمىرجانوۆتىڭ جەڭىسپەن باستاعانىن، ساكەن بيبوسىنوۆتىڭ باستاپقى كەزدەسۋىن ءساتتى وتكىزگەنىن جازعان بولاتىنبىز.
سونداي-اق نازىم قىزايباي ازيا چەمپيوناتىنىڭ ¼ فينالىنا ءوتتى.
ازيا چەمپيوناتىندا بۇگىن قازاقستاندىق ءۇش بوكسشىنىڭ رينگكە شىعاتىنى حابارلاندى.