نىسان الماتى وبلىسى، ەڭبەكشىقازاق اۋدانى، شەلەك دالىزىندە سالىندى.
قازاقستاندا قۋاتى 60 مۆت-نى قۇرايتىن جاڭا جەل ەلەكتر ستانسياسى پايدالانۋعا بەرىلدى، دەپ حابارلايدى Almaty-akshamy.kz Baq.kz سىلتەمە جاساپ.
جوبانىڭ جالپى قۇنى - 37،4 ملرد تەڭگە. جاڭا ستانسيا ءاربىر نومينال قۋاتى 2،5 مۆت بولاتىن 24 جەل ەنەرگەتيكالىق قوندىرعىسىنان تۇرادى. بۇدان بولەك، وعان قوسالقى ستانسيا، سوعان سايكەس ينفراقۇرىلىم سالىنىپ، سونداي-اق اۋە ەلەكتر جەتكىزۋ جەلىلەرى تارتىلدى. ستانسيا الەمدىك جەل تۋربينالارىن ءوندىرۋشى جەتەكشى كومپانيالاردىڭ ءبىرى – «GoldWind» كومپانياسىنىڭ جابدىعىن پايدالانا وتىرىپ سالىندى.
جاڭا جەس جىلىنا 225،7 ملن كۆتس ەلەكتر ەنەرگياسىن وندىرەتىن بولادى. وندىرىستىك سيپاتتامالارىنان بولەك، جوبا ءوزىنىڭ ەكولوگيالىق قۇرىلىمى تۇرعىسىنان ءوڭىر ءۇشىن ماڭىزدى. ەلەكتر ستانسياسىن سالۋ جانە ونى ىسكە قوسۋ پارنيكتىك گازدار شىعارىندىلارىن 206 مىڭ تونناعا دەيىن ازايتۋعا مۇمكىندىك بەرەدى، سونداي-اق جىلىنا شامامەن 89 مىڭ توننا ءداستۇرلى وتىننىڭ ورنىنا جۇرەتىن بولادى.
جوبانى «سامۇرىق-ەنەرگو» اق قازاقستاندىق ەلەكتر ەنەرگەتيكالىق حولدينگى «Power China» جۇڭگو كورپوراسياسىمەن سەرىكتەستىكتە ىسكە اسىردى، ول ەنەرگەتيكا سالاسىنداعى حالىقارالىق ىنتىماقتاستىقتىڭ تابىستى ۇلگىسى بولىپ تابىلادى.
شەلەك دالىزىندە جاڭا جەل ەلەكتر ستانسياسىن ىسكە قوسۋ ءراسىمى ق ر ەنەرگەتيكا ءمينيسترى، الماتى وبلىسى اكىمى، "سامۇرىق-قازىنا" قورىنىڭ باسشىسى، قر-داعى قحر باس كونسۋلدىعى، "Power China" كورپوراسياسى، "سامۇرىق-ەنەرگو" اق، "ەنەرگيا سەميرەچيا" ج ش س وكىلدەرىنىڭ قاتىسۋىمەن ءوتتى. جوبانى ەنەرگەتيكا ءمينيسترى بولات اقشولاقوۆ پەن "سامۇرىق-قازىنا" اق باسقارما ءتوراعاسى الماسادام ساتقالييەۆ تەلەكوپىر ارقىلى on-line فورماتىندا ىسكە قوستى.
جەس-تى ىسكە قوسۋعا ارنالعان ءىس-شارا اياسىندا «سامۇرىق-قازىنا» اق مەن Power Construction Corporation of China Ltd اراسىندا ىنتىماقتاستىق تۋرالى مەموراندۋمعا قول قويىلدى. قۇجات ستانسيانى كەڭەيتۋ جانە ونىڭ قۋاتىن 300 مۆت-عا دەيىن ارتتىرۋ ارقىلى جوبانىڭ ەكىنشى كەزەڭىن ىسكە اسىرۋدى كوزدەيدى.
جاڭا ەنەرگەتيكالىق نىساندى سالۋ كەزىندە 300 ادام جۇمىسپەن قامتىلدى. ستانسيانى ودان ءارى پايدالانۋ ءۇشىن 14 مامان دايارلانىپ، جۇمىسقا ورنالاستىرىلدى.
سامۇرىق-ەنەرگو ساراپشىلارىنىڭ ايتۋىنشا، الماتى قالاسى مەن الماتى وبلىسىندا بۇگىنگى كۇنى جۇمىس ىستەپ تۇرعان ەنەرگەتيكالىق قۋاتتار - الماتى جەو، قاپشاعاي جانە الماتى گەس كاسكادى، جامبىل گرەس، سونداي - اق ەسىك، مويناق، قاراتال، تالدىقورعان گەس-تەرىنە قاراماستان، بۇل وڭىردە ەنەرگيا تاپشىلىعى بار ءارى ءوزىنىڭ وتىن رەسۋرستارى جەتكىلىكتى دەڭگەيدە ەمەس. ءوندىرۋشى قۋاتتاردىڭ جەتىسپەۋشىلىگىنەن وبلىستىڭ ەلەكتر ەنەرگياسىنا دەگەن مۇقتاجدىعىن وبلىستىڭ ەنەرگيا كوزدەرى تەك 50%-عا وتەيدى. تاپشىلىق سىرتقى ەنەرگيا وندىرۋشىلەر (رەسپۋبليكانىڭ سولتۇستىك وبلىستارىنان، جامبىل گرەس-ى جانە قىرعىزستاننان) ەسەبىنەن جابىلادى.
«سامۇرىق-ەنەرگو» اق باسقارما ءتوراعاسىنىڭ مىندەتىن اتقارۋشى سەرىك تۇيتەبايەۆتىڭ ايتۋىنشا، كومپانيا جاڭارتىلاتىن ەنەرگەتيكانى دامىتۋعا ەرەكشە كوڭىل بولەدى. ەنەرگەتيكالىق حولدينگتە بۇگىندە 5 جەك نىسانى جۇمىس ىستەيدى – كۇن، جەل ەلەكتر ستانسيالارى، شاعىن سەس-تەر. وسى جەك نىساندارىنىڭ ەلەكتر ەنەرگياسىن ءوندىرۋى 2022 جىلعى قاڭتار-شىلدەدە 206،6 ملن.كۆتس قۇرادى، بۇل 2021 جىلعى ۇقساس كەزەڭمەن سالىستىرعاندا 8،9%-عا جوعارى.
الماتى وبلىسىندا «جاسىل» ەلەكتر ەنەرگياسىن ءوندىرۋ ءۇشىن كوپتەگەن تابيعي مۇمكىندىكتەر بار. كۇن مەن جەلدىڭ الەۋەتىنەن باسقا، سامۇرىق-ەنەرگو گيدروەنەرگەتيكانى دامىتۋعا ەرەكشە كوڭىل بولەدى، بۇعان مويناق گەس-ىن سالۋ جانە شاردارا گەس-ىن جاڭعىرتۋ جونىندەگى اياقتالعان جوبالار دالەل بولا الادى. كومپانيانىڭ پورتفەلىندە جاڭا سۋ ەلەكتر ستانسيالارىن سالۋ بويىنشا ءبىرقاتار جوبالار بار. اتاپ ايتقاندا، ىلە وزەنىندە قاپشاعاي گەس-ىنىڭ اپتا سايىنعى بىركەلكى ەمەس تاۋلىكتىك سۋ جىبەرۋلەرىن تەڭەستىرۋگە جانە ستانسيانى بارلىق قولدا بار قۋاتتى پايدالانا وتىرىپ، ەڭ جوعارى جۇكتەمەلەردى جابۋ رەجيمىنە اۋىستىرۋعا مۇمكىندىك بەرەتىن قۋاتى 40 مۆت كەربۇلاق سەس-ىن كونتررەتتەگىشىن سالۋ.سونداي-اق، كومپانيا الماتى وبلىسىنىڭ تاپشى ەنەرگيا جۇيەسىنە جەتكىزۋ ءۇشىن ەلەكتر ەنەرگياسىنىڭ كوزىن قۇرۋ ماقساتىندا شەلەك وزەنىندە گەس-29-دى سالۋ بويىنشا جوبالاۋ الدىنداعى جۇمىستاردى جۇرگىزۋدە. ۇزاق مەرزىمدى پەرسپەكتيۆادا الماتى وبلىسىنداعى الەس گەس كاسكادىن قايتا قۇرۋ جانە جاڭعىرتۋ جونىندەگى جوبانى ىسكە اسىرۋ جوسپارلانىپ وتىر. جوبا قايتا قۇرىلاتىن گەس-1 جانە گەس-2 - دە ەلەكتر ەنەرگياسىن ءوندىرۋدى ارتتىرۋ ارقىلى ۇلكەن الماتى وزەنىنىڭ گيدروتەحنيكالىق رەسۋرستارىن ءتيىمدى پايدالانۋعا مۇمكىندىك بەرەدى،-دەپ اتاپ ءوتتى «سامۇرىق-ەنەرگو» اق باسشىسى.
ەنەرگەتيكا مينيسترلىگىنىڭ دەرەكتەرى بويىنشا، قازاقستاندا 2022 جىلعى شىلدەدەگى جاعداي بويىنشا بارلىعى 142 جەك نىسان جۇمىس ىستەيدى. جىل باسىنان بەرى قازاقستاندا جالپى قۋاتى 322 مۆت بولاتىن 8 نىسان پايدالانۋعا بەرىلدى. 2022 جىلدىڭ سوڭىنا دەيىن جالپى قۋاتى 153 مۆت بولاتىن 13 نىساندى ىسكە قوسۋ جوسپارلانۋدا.