«ءار وتباسىنان - ءبىر اعاش».
كوكتەم كەلگەندە اعاش كوشەتتەرىن وتىرعىزۋ ناۋقانى باستالاتىنى ايان. وسى ورايدا ەلىمىزدىڭ مادەنيەت جانە سپورت مينيسترلىگى كوگالداندىرۋ جۇمىسىنا بۇكىل ەل بولىپ جۇمىلۋدى ۇسىنىپ وتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ناۋرىز - تازالىق پەن ەكولوگياعا قامقورلىق مەرەكەسى. بۇل الەۋەتتى اۋقىمدى ەكولوگيالىق اكسيالار مەن جالپى وسكەلەڭ ۇرپاقتى ەكولوگيالىق تاربيەلەۋ ءۇشىن پايدالانۋ قاجەت. وسى كۇنى بۇكىل ەل بويىنشا جاپپاي اعاش وتىرعىزۋ جانە ەلدى مەكەندەر مەن اۋلالاردىڭ اۋماقتارىن تازارتۋ بويىنشا «تازا تابيعات» رەسپۋبليكالىق اكسياسى باستالادى»، - دەدى ق ر مادەنيەت جانە سپورت ۆيسە-مينيسترى نۇرعيسا داۋەشوۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.
ونىڭ ايتۋىنشا، ەل بويىنشا اعاش وتىرعىزۋ ءار وڭىردەگى اۋا رايىنا بايلانىستى جۇرەدى.
«سونىمەن ءبىر مەزگىلدە بۇكىل ەل بويىنشا الەۋمەتتىك جەلىلەردە «ءار وتباسىنان ءبىر اعاش» چەللەندجىن وتكىزۋ ۇسىنىلادى. اعاش وتىرعىزۋ اۋا رايىنىڭ جاعدايىنا قاراي جۇرگىزىلەدى. ياعني قولايلى جىلى كۇندەر كەيىنىرەك كەلەتىن ايماقتاردا اكسيانى دا كەيىنىرەك ۇيىمداستىرۋعا جول بەرىلەدى»، - دەيدى ول.