جالپى، 2025 جىلعا دەيىن 11 مىڭ شاقىرىمدا تولەم جۇيەسىن كەزەڭ-كەزەڭىمەن ەنگىزۋ جوسپارلانىپ وتىر.
بۇگىن ماجىلىستە وتكەن ۇكىمەت ساعاتىندا سالا ءمينيسترى قايىربەك وسكەنبايەۆ وسىلاي مالىمدەدى. ونىڭ دەرەگىنشە، قازىرگى تاڭدا اقىلى جولداردىڭ ۇزىندىعى 2 مىڭ شاقىرىمنان اسقان. جىل باسىنان بەرى جالپى الىمدار كولەمى 4 ميلليارد تەڭگەنى قۇرادى، دەپ حابارلايدى Almaty-akshamy.kz.
تاريفكە كەلەر بولساق، جەڭىل اۆتوموبيلدەر 1 شاقىرىم ءۇشىن 1 تەڭگە، ال جۇك كولىكتەرى 25 تەڭگە تولەيدى. جالپى، ەلىمىز بويىنشا رەسپۋبليكالىق جەلىنىڭ 90، ال جەرگىلىكتى ماڭىزداعى جولداردىڭ 80 پروسەنتى نورماتيۆتىك جاعدايعا سايكەس كەلەتىنىن ايتتى مينيستر. 2025 جىلعا قاراي ولاردىڭ ۇلەسىن سايكەسىنشە100 جانە 95 پايىزعا جەتكىزۋ جوسپارلانعان.
«رەسپۋبليكالىق جەلى بويىنشا 4 مىڭ شاقىرىم جولدا قۇرىلىس جانە قايتا جاڭارتۋ جۇمىستارى جۇرگىزىلۋدە. شامامەن 3 مىڭ شاقىرىم جول كۇردەلى جانە ورتاشا جوندەۋمەن قامتىلعان. جەرگىلىكتى جەلى بويىنشا جوندەۋدىڭ بارلىق تۇرلەرىمەن 4،6 مىڭ شاقىرىم اۆتوجول قامتىلعان. رەسپۋبليكالىق بيۋدجەتتەن اۆتوجول سالاسىن دامىتۋعا 2022 جىلعا 603 ملرد.تەڭگە ءبولىندى. مەملەكەت باسشىسىنىڭ تاپسىرماسىنا سايكەس، ءبىز بۇرىن باستالعان بارلىق جوبالاردى اياقتاۋىمىز قاجەت. بۇگىندە ەلىمىزدەگى اۆتوجول سالاسىنداعى ونداي جوبالاردىڭ سانى - 17. ال ىسكە اسىرىلۋى 2024 جىلعا كوزدەلگەن 4 مىڭ شاقىرىمدى قۇرايتىن جول جەلىسى بار. جىلدىڭ سوڭىنا دەيىن شامامەن 1 مىڭ شاقىرىم جولدى پايدالانۋعا بەرۋ جوسپارلانىپ وتىر. قالعان 3 مىڭ شاقىرىم جولداعى جۇمىستاردى 2023 جىلى اياقتاۋدى كوزدەپ وتىرمىز»، - دەيدى ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ.