وتكەن جىلدىڭ سوڭىندا 32،1 مىڭ ادامعا وسكەن.
قازاقستاندىق ماماندار ەلدە جالدامالى جۇمىسكەرلەر سانىنىڭ ارتقانىن ايتادى، دەپ حابارلايدى Almaty-akshamy.kz.
«2021 جىلعى 4 توقساندا جالدامالى جۇمىسكەرلەر سانىنىڭ 32،1 مىڭ ادامعا ءوسۋى جانە ءوزىن-وزى جۇمىسپەن قامتىعان ادامدار سانىنىڭ 33،1 مىڭ ادامعا قىسقارۋى بايقالدى. تۇتاستاي العاندا، قازاقستاننىڭ ەڭبەك نارىعىندا وسى كەزەڭدە جۇمىسسىزدار سانى قىسقارۋدى جالعاستىردى، بەلسەندى جۇمىسپەن قامتىلماعان ادامدار ەڭبەك نارىعىنا قايتا ورالۋدا، ال قاشىقتىقتان جۇمىسپەن قامتۋدىڭ تانىمالدىعى تومەندەۋدە»، - دەلىنگەن ەڭبەكمينى باسپا ءسوز قىزمەتىنىڭ حاباراماسىندا.
جۇمىس كۇشىنىڭ جالپى سانى 2021 جىلعى 3 توقسانمەن سالىستىرعاندا 1،3 مىڭ ادامعا قىسقاردى، الايدا جىلدىق ماندە بۇل كورسەتكىش 0،3%-عا (29،9 مىڭ) 9،3 ملن ادامعا دەيىن ءوستى. بۇعان وتكەن جىلدىڭ 1 توقسانىمەن سالىستىرعاندا جۇمىسپەن قامتۋدىڭ جالپى 0،4%-عا (30،8 مىڭ) 8،8 ملن ادامعا دەيىن ءوسۋى ىقپال ەتتى.
جۇمىسپەن قامتۋ قۇرىلىمىندا 4ء-شى توقساننىڭ قورىتىندىسى بويىنشا جۇمىس ىستەيتىن حالىقتىڭ 76% (6،72 ملن) جالدامالى ەڭبەكپەن قامتىلدى، ولاردىڭ سانى 2021 جىلعى 3 توقسانمەن سالىستىرعاندا 0،5%-عا (32،1 مىڭ) ارتتى. تيىسىنشە، جۇمىسپەن قامتىلعانداردىڭ 24%-ى (2،1 ملن) ءوزىن-وزى جۇمىسپەن قامتىعان ادامدار بولىپ تابىلادى، ولاردىڭ سانى الدىڭعى توقسانمەن سالىستىرعاندا 1،6%-عا (33،1 مىڭ) قىسقاردى.
«سونىمەن قاتار، ەگەر وتكەن جىلدىڭ باسى مەن اياعىنىڭ كورسەتكىشتەرىن سالىستىراتىن بولساق، جالدامالى جۇمىسشىلار مەن ءوزىن-وزى جۇمىسپەن قامتىعان حالىق سانىنىڭ تيىسىنشە 14،3 مىڭ جانە 16،5 مىڭ ادامعا وسكەنىن اتاپ وتۋگە بولادى»، – دەدى «ەڭبەك رەسۋرستارىن دامىتۋ ورتالىعى» اق باسقارۋشى ديرەكتورى الەكساندرا مولچانوۆسكايا.
سونداي-اق، ساراپشى 2021 جىلدىڭ سوڭىنا قاراي جۇمىسسىزدار سانى قىسقارۋدى جالعاستىرعانىن اتاپ ءوتتى.
«وتكەن توقسانمەن سالىستىرعاندا، ازايۋ بار بولعانى 350 ادامدى قۇراعانىنا قاراماستان، ءبىر جىلدىق كەزەڭدە ولاردىڭ سانى 2،6 مىڭ ادامعا قىسقاردى. جۇمىسسىزدىق دەڭگەيى الدىڭعى بەس توقسانداعىداي 4،9% دەڭگەيىندە قالدى»، – دەدى الەكساندرا مولچانوۆسكايا.
ەكونوميكالىق بەلسەندىلىككە ورالۋ بەلسەندى جۇمىسپەن قامتىلماعان ادامدار سانىنىڭ ازايۋىمەن دە كورىنەدى. وتكەن جىلدىڭ سايكەس كەزەڭىمەن سالىستىرعاندا، جۇمىس ىستەمەگەن نەمەسە جۇمىس ىزدەمەگەن ادامداردىڭ سانى 13،2 مىڭعا تومەندەپ، 4،1 ملن ادامدى قۇرادى.
جۇمىسپەن قامتۋ سيپاتتامالارى بۇرىنعىداي: جۇمىسپەن قامتىلعانداردىڭ كوپشىلىگى قالالىق جەرلەردە تۇرادى (59%)، ولاردىڭ كوپشىلىگى جالدامالى جۇمىسشىلار. ءوز بەتىنشە جۇمىسپەن قامتىلۋ، ادەتتە، اۋىلدىق جەرلەردە باسىم (57%). ءوزىن-وزى جۇمىسپەن قامتىعانداردىڭ باسىم بولىگى تۇركىستان (ءوزىن-وزى جۇمىسپەن قامتىعانداردىڭ جالپى سانىنىڭ 83%)، الماتى (79%)، جامبىل جانە باتىس قازاقستان (73%) وبلىستارىندا.
«كاسىپتىك ءبىلىمى بار جۇمىسپەن قامتۋ ۇلەسى وسۋدە. ماسەلەن، 2021 جىلعى 4-توقساندا الدىڭعى توقسانمەن سالىستىرعاندا ولاردىڭ سانى 68 مىڭ ادامعا ارتىپ، جۇمىسپەن قامتىلعان حالىقتىڭ 85% - ىن قۇرادى. وتكەن جىلدىڭ ۇقساس كەزەڭىمەن سالىستىرعاندا جالدامالى جۇمىسكەرلەر مەن ءوزىن-وزى جۇمىسپەن قامتىعاندار اراسىندا ولاردىڭ ۇلەسى تيىسىنشە 89% جانە 72% قۇراپ، 2 پايىزدىق تارماققا ءوستى. ايتا كەتۋ كەرەك، جالپى تەحنيكالىق جانە كاسىپتىك بىلىممەن قامتىلعانداردىڭ ءوسۋ ءۇردىسى بايقالادى»، – دەپ اتاپ ءوتتى الەكساندرا مولچانوۆسكايا.
ەكونوميكالىق قىزمەت تۇرلەرى بولىنىسىندە ءتورت سالا ءداستۇرلى تۇردە بارلىق جۇمىسپەن قامتۋدىڭ 55%-ىن الادى: ساۋدا، اۋىل شارۋاشىلىعى، ءبىلىم بەرۋ جانە ونەركاسىپ. سونىمەن قاتار، جۇمىسپەن قامتۋدىڭ قىزمەت كورسەتۋ سالاسىنا قاراي ءوسۋى جالعاسۋدا.
ماسەلەن، 2021 جىلعى 4ء-شى توقساندا، 2021 جىلعى 3ء-شى توقسانمەن سالىستىرعاندا، جۇمىسپەن قامتىلعانداردىڭ ەڭ كوپ ءوسىمى قارجى جانە ساقتاندىرۋ قىزمەتىندە (+5% نەمەسە 9،2 مىڭ ادام)، مەملەكەتتىك باسقارۋدا (+2،6% نەمەسە 12،8 مىڭ ادام)، دەنساۋلىق ساقتاۋدا (+2،4% نەمەسە 12،7 مىڭ ادام)، كولىك جانە قويمالاۋ سالاسىندا بولدى (+2،2% نەمەسە 13،3 مىڭ ادام) جانە باسقا دا قىزمەت تۇرلەرىن ۇسىنۋ (+2% نەمەسە 6،3 مىڭ ادام).
جۇمىسپەن قامتىلعان جاستاردىڭ (15-28 جاس) سالالىق قۇرىلىمىن قاراستىرا وتىرىپ، جۇمىس ىستەيتىن جاستاردىڭ كوبەيۋى اكىمشىلىك جانە قوسالقى قىزمەت كورسەتۋ (+11 مىڭ)، قارجى جانە ساقتاندىرۋ (+8،9 مىڭ)، كاسىبي جانە عىلىمي قىزمەت (+7،7 مىڭ)، مەملەكەتتىك باسقارۋ (+7،4 مىڭ)، سونداي-اق، باسقا دا سالالاردا بايقالاتىنىن اتاپ وتۋگە بولادى ونەر جانە ويىن-ساۋىق (+4 مىڭ). قالعان سالالاردا جۇمىسپەن قامتىلعان جاستار سانى قىسقارۋدا، ەڭ كوپ تومەندەۋ ساۋدا سالاسىندا تىركەلدى (-42 مىڭ ادام). مۇنداي اعىندار سونىڭ ىشىندە جۇمىسپەن قامتىلعانداردىڭ جاس ەرەكشەلىگىنە بايلانىستى وزگەرىستەرىمەن بايلانىستى – جاستار توبىنان 29-34 جاس ارالىعىنداعى جۇمىسپەن قامتىلعاندار توبىنا اۋىسۋ، ولاردىڭ سانى 4ء-شى توقسانعا قاراي 95 مىڭ ادامعا ۇلعايدى، سونداي-اق وقىتۋ، ءۇي شارۋاشىلىعىن جۇرگىزۋ جانە ت.ب. سەبەپتەر بويىنشا ەكونوميكالىق بەلسەندىلىك تانىتپاي تۇر.
2021 جىلدىڭ 4ء-شى توقسانىندا قازاقستاندا نومينالدى جالاقى ورتاشا ەسەپپەن 275،6 مىڭ تەڭگەنى قۇرادى، بۇل 2020 جىلدىڭ ۇقساس كەزەڭىمەن سالىستىرعاندا 18،2%-عا جوعارى. سونىمەن قاتار ناقتى جالاقى يندەكسى 2020 جىلدىڭ وسى كەزەڭىنە 8،7%-دى قۇرادى.
وڭىرلەر بولىنىسىندە جالاقى دەڭگەيى بويىنشا مۇنايلى وڭىرلەر – اتىراۋ (ايىنا 420،4 مىڭ تەڭگە) جانە ماڭعىستاۋ (382،4 مىڭ تەڭگە) وبلىستارى، سونداي-اق مەگاپوليستەر – نۇر-سۇلتان (391،4 مىڭ تەڭگە) جانە الماتى قالالارى (329،1 مىڭ تگ) كوشباسشى بولىپ قالۋدا. ال سۋ كولىگى سالاسى ورتاشا جالاقىسى 890،7 مىڭ تەڭگەگە تەڭ ەلدەگى ەڭ تابىستى سالا بولىپ تابىلادى.
جىل سوڭىنا قاراي قاشىقتان جۇمىسپەن قامتۋ دا تومەندەدى: قاشىقتان جۇمىس ىستەيتىندەردىڭ سانى نەبارى 24،4 مىڭ ادامدى قۇرادى، وتكەن توقسانمەن سالىستىرعاندا 16،1 مىڭعا قىسقاردى. قاشىقتان جۇمىسپەن قامتىلعاندار سانىنىڭ كۇرت تومەندەۋىنە قاراماستان، ولاردىڭ اراسىندا قالا تۇرعىندارىنىڭ (74%) اۋىل تۇرعىندارىنان جانە ايەلدەردىڭ (66%) ەرلەردەن باسىم بولۋ ءۇردىسى ءالى دە ساقتالۋدا.
دەگەنمەن، مۇنداي جۇمىس فورماتى ەڭبەك نارىعىندا سەنىمدى تۇردە ورنىققان، ەگەر بۇل قۇجاتتالماعان بولسا، وندا كەز كەلگەن جاعدايدا جۇمىس بەرۋشىمەن كەلىسىم بويىنشا جۇمىسشىلاردىڭ ءبىر بولىگى گيبريدتى جۇمىس رەجيمىن (ونلاين/وفلاين) ساقتاي الادى.