قازاقستاندا جالدامالى باسپانانىڭ قۇنى قىمبات پا؟

ەلىمىزدە تۇرعىن ءۇيدى جالعا الۋ قۇنى ءبىر جىلدا 18 پايىزعا قىمباتتادى.

باسپانا جالداۋ قۇنىنىڭ قىمباتتىعى جونىنەن قازاقستان 107 ەلدىڭ اراسىندا 82-ورىندا تۇر، دەپ حابارلايدى Almaty-akshamy.kz ەnergyprom.kz سايتىنا سىلتەمە جاساپ.

قازاقستان 82-ورىن العان بۇل رەيتينگتە مەملەكەتتەردىڭ قالا ورتالىعىنداعى اي سايىنعى جالعا بەرىلەتىن (ءبىر جاتىن بولمەلى) تۇرعىن ءۇيدىڭ قۇنى سالىستىرىلعان. اتالعان رەيتينگ بويىنشا قازاقستاندا پاتەر  جالداۋ باعاسى $303،85 بولدى.

باعاسى شارىقتاپ تۇرعان جالدامالى پاتەرلەر گونكونگ، سينگاپۋر جانە باا-دە بولسا، تۇرعىن ءۇي جالداۋدىڭ ەڭ ارزانى نەپالدا ەكەن.

تمد ەلدەرىنىڭ ىشىندە تۇرعىن ءۇيدى جالعا الۋ، قازاقستان رەسپۋبليكاسىنا قاراعاندا، ءازىربايجاندا ارزانىراق – ايىنا 266،3 اقش دوللارى شاماسىندا.

رەسەيدە اي سايىنعى پاتەر جالداۋ اقىسى 412،51، ارمەنيادا — 396،74، ۋكراينادا — 366،11، وزبەكستاندا — 322،27، بەلورۋسسيادا — 306،17 اقش دوللارى تۇرادى.

2021 جىلدىڭ جەلتوقسانىندا قازاقستاندا جايلى تۇرعىن ءۇيدى جالعا الۋ باعاسى ءبىر جىلدا 17،5%-عا ءوستى، ياعني 1 شارشى مەتر ءۇشىن الىناتىن اقى 1،9 مىڭ تەڭگەگە دەيىن قىمباتتادى

ەلىمىزدىڭ ءىرى قالالارىنىڭ ىشىندە جالعا الۋ باعاسى بىردەن 40،6%-عا كوتەرىلگەن الماتى قالاسى بولىپ تۇر. بۇل ۇشتىككە ورال مەن شىمكەنت قالالارى دا كىردى. سايكەسىنشە، بۇل قالالارداعى قىمباتشىلىق 32،5% جانە 31،3%-دى قۇرايدى. قىمباتتاۋ بويىنشا ەڭ از جىلدىق ءوسىم تاراز قالاسىندا تىركەلدى، ناقتىراق ايتقاندا، پاتەر جالداۋ باعاسى 5،5%-عا ارتقان.

باسپانا جالداۋدىڭ ەڭ قاتتى قىمباتتاعانى ەلوردادا دا بايقالدى: ءار شارشى مەتر ءۇشىن 3،7 مىڭ تەڭگە. ەڭ «قىمبات» قالالاردىڭ قاتارىندا الماتى (3،3 مىڭ تەڭگە) مەن اقتاۋ (2،4 مىڭ تەڭگە) تۇرسا، «ەڭ ارزان» قالا تاراز (1،4 مىڭ تەڭگە) بولدى.