سۋ سالاسىن دامىتۋ بويىنشا سەرىكتەستەردىڭ ۇيلەستىرۋ كەڭەسىنىڭ II وتىرىسى اياسىندا سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ يسلام دامۋ بانكىنىڭ قازاقستانداعى وڭىرلىك وكىلدىگى باسشىسىنىڭ مىندەتىن اتقارۋشى الي حان جانە بۇۇ دامۋ باعدارلاماسىنىڭ قر-داعى تۇراقتى وكىلى كاتارجينا ۆاۆەرنيامەن كەزدەستى.
تاراپتار «كليماتقا ءتوزىمدى سۋ رەسۋرستارىن دامىتۋ» جوباسىن ىسكە اسىرۋ بويىنشا بىرلەسكەن جۇمىستى تالقىلادى. جوبادا استانا سۋ قويماسىن تولىقتىرۋ جونىندەگى جوبانى قوسا العاندا، 4 جاڭا سۋ قويماسىن سالۋ جانە جۇمىس ىستەپ تۇرعان 4 سۋ قويماسىن رەكونسترۋكسيالاۋ، 115 ارنانى رەكونسترۋكسيالاۋ جانە كۇردەلى جوندەۋ كوزدەلگەن. جۇمىستار اقمولا، الماتى، جامبىل، قىزىلوردا، تۇركىستان، باتىس قازاقستان، جەتىسۋ وبلىستارىندا جانە استانا قالاسىندا جۇزەگە اسىرىلادى.
سونداي-اق قازاق سۋ شارۋاشىلىعى عىلىمي-زەرتتەۋ ينستيتۋتىنا ەلىمىزدىڭ سۋ جانە وزەن باسسەيندەرىن زەرتتەۋگە، سۋ رەسۋرستارىنىڭ اقپاراتتىق-تالداۋ ورتالىعى ءۇشىن ەرتە دەن قويۋ جۇيەلەرىن ەنگىزۋدى باعالاۋعا جانە «قازسۋشار» كاسىپورنىن تەحنيكالىق جاراقتاندىرۋعا يسلام دامۋ بانكىنىڭ گرانتىن ءبولۋ كوزدەلگەن.
قازىرگى ۋاقىتتا بارلىق قاجەتتى قۇجاتتى ازىرلەۋ جانە ولاردى باسقا مەملەكەتتىك ورگاندارمەن كەلىسۋ جۇرگىزىلىپ جاتىر.
«قىسقا مەرزىم ىشىندە ۇيلەستىرۋ كەڭەسى اياسىندا ۇلكەن جۇمىس اتقارىلدى. يسلام دامۋ بانكىنىڭ ينۆەستيسيالارى قازاقستاننىڭ سۋ ينفراقۇرىلىمىن جەتىلدىرۋگە كومەكتەسەدى. سونىمەن قاتار ءبىز ەلىمىزدىڭ سۋ سالاسىن دامىتۋ جوبالارىنا جاڭا سەرىكتەستەر تارتۋ ءۇشىن بۇۇ دامۋ باعدارلاماسىمەن بەلسەندى ىنتىماقتاستىقتى جالعاستىرۋعا نيەتتىمىز»، - دەپ اتاپ ءوتتى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.