وعان قوسا وسى دەرتكە شالدىققان بالالار مەن جاسوسپىرىمدەر كوپ.
بۇل جونىندە الماتىدا ىشەكتىڭ قابىنۋ اۋرۋلارى جونىندەگى رەسپۋبليكالىق كۇزگى مەكتەپ اياسىندا وتكەن كونفەرەنسيادا ايتىلدى، دەپ حابارلايدى Almaty-akshamy.kz 24.kz-كە سىلتەمە جاساپ.
وتاندىق جانە شەتەلدىك ماماندار بۇگىنگى تاڭدا دياگنوستيكالاۋدىڭ ءارى ەمدەۋدىڭ زاماناۋي ادىستەرى ارقىلى بۇل اۋرۋدى اسقىندىرماي ەمدەۋگە بولاتىنىن ايتادى. ىشەكتىڭ قابىنۋ اۋرۋلارى اۋتويممۋندىق دەرتكە جاتادى. ۇزاق سترەسس، ءارتۇرلى ۆيرۋستىق ينفەكسيالار مەن باتىس تاعام تۇرلەرىن ءجيى پايدالانۋ بۇل اۋرۋلاردىڭ وسۋىنە اكەلىپ وتىر، - دەيدى ماماندار. ايتا كەتەرلىگى بۇگىندە بۇل پاتولوگيا 40 جاسقا دەيىنگى ادامداردا ءجيى انىقتالا باستاپتى.
«وكىنىشكە وراي بۇل دياگنوز كەيدە نارەستەلەرگە دە قويىلادى. ءبىزدىڭ ماقساتىمىز حالىق اراسىندا دۇرىس تاماقتانۋدى ناسيحاتتاۋ. سونىمەن بىرگە باسقا جاعىمسىز فاكتورلاردىڭ اسەرىن ازايتۋعا كومەكتەسۋ. بۇل ءقاۋىپتى سىرقاتتان بالالار مەن ولاردىڭ وتباسى مۇشەلەرىن قورعاۋىمىز قاجەت»، - دەيدى «كارديولوگيا جانە ىشكى اۋرۋلار» عزي باسقارما ءتوراعاسىنىڭ ورىنباسارى ءجاميلا قايبۋللايەۆا.
دارىگەرلەر دەرتتىڭ ىشەك جاراسى جانە كرون اۋرۋى سەكىلدى ەكى ءتۇرى كوپ كەزدەسەدى دەيدى. بىرىنشىسىندە تەك توق ىشەك زاقىمدانسا، كرون اۋرۋى كەزىندە اس قورىتۋ جۇيەسىنىڭ كەز كەلگەن بولىگى زاقىمدانۋى مۇمكىن. بىردەن ءبىر بەلگىسى-ديارەيا. بۇگىنگى تاڭدا زاماناۋي ادىستەردىڭ ارقاسىندا بۇل اۋرۋلاردى ءتيىمدى ەمدەۋگە بولادى.
«بيىل ءبىزدىڭ دارىگەرلەر زەرتتەۋدىڭ – ماگنيتتى-رەزونانستى ەنتەروگرافيا، ينتەستينوسكوپيا، ىشەكتىڭ ۋلترا دىبىستىق زەرتتەۋلەرى سەكىلدى تاسىلدەرىن ەنگىزدى. بۇل ناۋقاستىڭ ىشەك قۇرىلىسىن تولىق زەرتتەپ، دارىگەرلەرگە ناقتى دياگنوز قويىپ، ءتيىمدى تەراپيا تاعايىنداۋعا كومەكتەسەدى»، - دەيدى «كارديولوگيا جانە ىشكى اۋرۋلار» عزي گاستروەنتەرولوگ-دارىگەرى ايناش تانابايەۆا.
ءقازىر ەلىمىزدە ىشەكتىڭ قابىنۋ اۋرۋلارىنا شالدىققان پاسيەنتتەردىڭ ءبىرىڭعاي ءتىزىمى جاسالۋدا. بۇل ەلدەگى جاعداي تۋرالى ناقتى مالىمەت الىپ، دارىگەرلەرگە ناۋقاستاردى دەر كەزىندە جانە ءتيىمدى ەمدەۋگە مۇمكىندىك بەرەدى.