الاياقتار ابونەنتتىك ءنومىردى اۋىستىرۋعا ارنالعان سەرۆيستەردى بەلسەندى پايدالانادى.
ينتەرنەت الاياقتىققا قارسى كۇرەس الەمدە باسا نازار اۋدارۋ كەرەك ماسەلەنىڭ ءبىرى بولىپ وتىر. الاياقتار ازاماتتاردى الداۋ ءۇشىن ءارتۇرلى امالداردى قولدانادى. بۇل تۋرالى بۇگىن ورتالىق كوممۋنيكاسيالار قىزمەتىنىڭ باسپا ءسوز ءماسليحاتىندا ءمالىم بولدى، دەپ حابارلايدى Almaty-akshamy.kz Baq.kz سىلتەمە جاساپ.
ق ر ءىىم كريمينالدىق پوليسيا دەپارتامەنتى كيبەرقىلمىسقا قارسى كۇرەس ورتالىعىنىڭ باسشىسى جاندوس ءسۇيىنباي جىل سايىن وسىنداي جاعدايلاردىڭ كوبەيىپ جاتقانىن باسا ايتادى.
«سيفرلىق تەحنولوگيالاردىڭ دامۋى ونى پايدالانا وتىرىپ جاسالاناتىن ۇرلىقتاردىڭ كوبەيۋىنە الىپ كەلدى. بۇگىندە ينتەرنەت الاياقتىق كەڭ قوعامدىق رەزونانس تۋدىرىپ وتىر. اعىمداعى جىلى ولاردىڭ سانى 18 000-نان اسىپ وتىر»، – دەدى ول.
كوبىنەسە مۇنداي قىلمىستار تاۋارلاردى ونلاين ساتىپ الۋ جولىمەن جاسالادى ەكەن. مۇنداي ادىسپەن 6000-داي قىلمىس تىركەلگەن.
- سونداي-اق، بانك، قۇقىق قورعاۋ ورگاندارىنىڭ قىزمەتكەرىمىن دەپ جاسالعان الاياقتىق ەرەكشە الاڭداتىپ وتىر، - دەيدى ول.
«جىل باسىنان بەرى وسى تاسىلمەن 3000-داي قىلمىس تىركەلىپ وتىر. بۇل - الاڭدايتىنداي ماسەلە. تىركەلگەن ىستەردى تالداۋ كورسەتكەندەي، وسىنداي جاعدايدا الاياقتار ابونەنتتىك ءنومىردى اۋىستىرۋعا ارنالعان سەرۆيستەردى بەلسەندى پايدالانادى»، – دەپ اتاپ ءوتتى.
ماماننىڭ سوزىنشە، الاياقتار كوبىنەسە تەلەفون ارقىلى حابارلاسىپ، كۇدىكتى وپەرسيا تۋرالى حابارلايدى نەمەسە بانكتىڭ جەمقور قىزمەتكەرىن ۇستاعالى جاتىرمىز، كومەگىڭىز كەرەك دەپ حابارلاسادى. وسىنداي ساتتە اڭ-تاڭ بولعان ازامات كوبىنەسە الاياقتاردىڭ قۇربانى بولىپ جاتادى.