ماماندار كەشەندى شارالار قابىلداپ جاتىر.
بيىل ەلىمىزدە ينتەرنەت الاياقتىق ارەكەتى 34 پايىزعا تومەندەگەن. بۇل تۋرالى ىشكى ىستەر مينيسترلىگىنىڭ وكىلى شۇعىلا تۇرلىباي ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ينتەرنەت، ونلاين قىزمەت پەن ءىت سالاسىنا قاتىستى زاڭبۇزۋشىلىقتىڭ ارتۋىنا بايلانىستى ىشكى ىستەر مينيسترلىگى كەشەندى شارالار قابىلداپ جاتىر. ونىڭ قاتارىندا الدىن الۋ شاراسى، زاڭ بۇزۋشىلىقتى انىقتاۋ جانە تەرگەۋ بار. سول سياقتى اقپارات، بايلانىس جانە اقپاراتتىق تەحنولوگيا كومەگىمەن جاسالاتىن قىلمىسقا قارسى كۇرەس باعدارلاماسى قابىلداندى»، - دەدى ش.تۇرلىباي مينيسترلىكتە وتكەن باسپا ءسوز ءماسليحاتىندا.
ونىڭ ايتۋىنشا، ەلىمىزدە كيبەرقىلمىسقا قارسى كۇرەس ماقساتىندا ارنايى جەدەل تەرگەۋ توبى جۇمىس ىستەيدى.
«وتكەن جىلى كيبەرقىلمىستىڭ الدىن الىپ، كۇرەسەتىن شتات قىزمەتكەرلەرىنىڭ سانى كوبەيدى. سونىمەن قاتار ينتەرنەت الاياقتىقتى زەرتتەۋمەن اينالىساتىن توپ قۇرىلدى. ينتەرنەت الاياقتىق بيىل 3 ايدىڭ ىشىندە وتكەن جىلدىڭ وسى ۋاقىتىمەن سالىستىرعاندا 34 پايىزعا ازايدى»، - دەيدى ول.
ەسكە سالا كەتسەك، وتكەن جىلى اتالعان ۆەدومستۆو ەلىمىزدە ينتەرنەت الاياقتىقتىڭ ءورشىپ تۇرعانىن حابارلاعان ەدى. https://lenta.inform.kz/kz/kazakstanda-internet-alayaktyk-orship-tur_a3865243
ايتا كەتەيىك، بۇعان دەيىن مينيسترلىك وكىلى زاڭسىز اينالىمنان 1 مىڭنان استام قارۋ تاركىلەنگەنىن جەتكىزدى. https://www.inform.kz/kz/kazakstanda-zansyz-aynalymnan-1-mynnan-astam-karu-tarkilendi_a3924024