باعدارلامانى 2029 جىلعا دەيىن وزەكتەندىرۋ شارالارى پىسىقتالدى
پرەمەر-مينيستر ءاليحان سمايىلوۆتىڭ توراعالىعىمەن وتكەن كەڭەستە حالىقتىڭ تابىسىن ارتتىرۋ باعدارلاماسىن وزەكتەندىرۋ بويىنشا ۇسىنىستار مەن ناتيجەلەرى قارالدى، دەپ حابارلايدى Almaty-akshamy.kz.
ۇلتتىق ەكونوميكا ءمينيسترى الىبەك قۋانتىروۆ باعدارلامانى ىسكە اسىرۋ ناتيجەسىندە بيۋدجەت سالاسىنىڭ 1،1 ملن-نان استام قىزمەتكەرىنىڭ، اتاپ ايتقاندا، 74 مىڭ دارىگەردىڭ جالاقىسى ورتا ەسەپپەن 30%-عا، 600 مىڭ پەداگوگ پەن ءمۇعالىمنىڭ جالاقىسى – 25%-عا، 173 مىڭ ورتا مەديسينالىق پەرسونالدىڭ جالاقىسى 20%-عا جانە بيۋدجەتتىك ۇيىمدار قىزمەتكەرلەرىنىڭ ىشىندە باسقا دا ساناتتارىنىڭ جالاقىسى 20%-عا وسكەنىن حابارلادى. جۇمىسپەن قامتۋدى قامتاماسىز ەتۋ جانە قىزمەتكەرلەر اراسىنداعى ەڭبەكاقى الشاقتىعىن ازايتۋ بويىنشا قوسىمشا شارالار قابىلداندى.
سونىمەن قاتار بۇگىنگى تاڭدا باعدارلامانى 2029 جىلعا دەيىن وزەكتەندىرۋ شارالارى پىسىقتالدى. بۇل رەتتە ونى رەسپۋبليكالىق جانە وڭىرلىك دەڭگەيلەرگە ءبولۋ جوسپارلانىپ وتىر، بۇل جەرگىلىكتى اتقارۋشى ورگانداردى كەڭىنەن تارتۋعا مۇمكىندىك بەرەدى.
الداعى كەزەڭدەگى نەگىزگى باعىتتاردىڭ ءبىرى - وڭىرلىك جۇمىسپەن قامتۋ كارتاسى شەڭبەرىندە ەكونوميكانىڭ ناقتى سەكتورىندا جۇمىس ورىندارىن قۇرۋ، «اۋىل اماناتى» جوباسى اياسىندا اۋىل حالقىنىڭ تابىسىن ارتتىرۋ، سونداي-اق شاعىن جانە ورتا بيزنەسكە مەملەكەتتىك قولداۋ كورسەتۋ.
سونىمەن قاتار بيۋدجەتتەن جالاقىنى كوتەرۋ جانە ازاماتتارعا جاڭا سيفرلىق قىزمەتتەر ارقىلى بەلسەندى الەۋمەتتىك قولداۋدىڭ شارالارىمەن قامتاماسىز ەتۋ بويىنشا جۇمىستى جالعاستىرۋ جوسپارلاندى.
پرەمەر-مينيستر ەكى كۇن ىشىندە حالىقتىڭ تابىسىن ارتتىرۋدىڭ وڭىرلىك جوسپارلارىن بەكىتۋدى قامتاماسىز ەتىپ، باعدارلامانى ۇكىمەتكە كەشەندى جوسپار تۇرىندە جەدەلدەتىپ كەلىسۋ جانە ەنگىزۋ قاجەتتىگىن اتاپ ءوتتى.
جيىندا سونداي-اق ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا، اۋىل شارۋاشىلىعى ۆيسە-مينيسترى ءابىلقايىر تامابەك جانە اقتوبە وبلىسىنىڭ اكىمى ەرالى توعجانوۆ بايانداما جاسادى.