قازاقستاندا حالىقتان اتىس قارۋىن ساتىپ الۋ ناۋقانى اياقتالدى

بۇل اكسيا 2008 جىلدان بەرى جۇرگىزىلىپ كەلەدى.

ىشكى ىستەر مينيسترلىگىنىڭ حالىقتان زاڭسىز ساقتالعان اتىس قارۋىن، وق-دارىلەردى جانە جارىلعىش زاتتاردى ساتىپ الۋ بويىنشا جىل سايىنعى اكسياسى اياقتالدى، دەپ حابارلايدى Almaty-akshamy.kz  قازاقپاراتقا سىلتەمە جاساپ.

بۇل تۋرالى ق ر ىشكى ىستەر مينيسترلىگىنىڭ وكىلى شۇعىلا تۇرلىبەك ايتىپ بەردى.

«ىشكى ىستەر مينيسترلىگىنىڭ حالىقتان زاڭسىز ساقتالعان اتىس قارۋىن، وق-دارىلەردى جانە جارىلعىش زاتتاردى ساتىپ الۋ بويىنشا وتكىزىلەتىن جىل سايىنعى اكسياسى اياقتالدى. شارا قورىتىندىسى بويىنشا، ىشكى ىستەر ورگاندارىنا 1 087 ازامات جۇگىنىپ، 1 400 دانا اتىس قارۋى مەن 10 مىڭعا جۋىق پاتروندى ءوز ەركىمەن تاپسىرعان»، - دەدى ىشكى ىستەر مينيسترلىگىنىڭ وكىلى اپتالىق ونلاين بريفينگىدە.

ءوز ەركىمەن تاپسىرىلعان قارۋدىڭ جاي-كۇيىنە قاراي ءار داناسى ءۇشىن 10 ايلىق ەسەپتىك كورسەتكىشتەن (31 800 تەڭگە - رەد.) 100-اەك-كە دەيىن (318 000 تەڭگە -رەد.) تولەم بەرۋ كوزدەلەدى.

ايتا كەتەيىك، بۇل اكسيا 2008 جىلدان بەرى جۇرگىزىلىپ كەلەدى، وسى ۋاقىت ارالىعىندا ازاماتتار 54 مىڭنان استام اتىس قارۋىن، 2 ملن استام پاتروندى ءوز ەركىمەن تاپسىردى.
كەيىنگى 5 جىلدا اتىس قارۋىمەن جاسالعان قىلمىستاردىڭ سانى 43%-عا تومەندەگەن.