قازاقستاندا حالىقارالىق اقشا اۋدارىمدارى ارتتى

ۇلتتىق بانك كەلتىرگەن مالىمەتتەرگە زەر سالساق، حالىقارالىق قارجى اۋدارىمدارى جۇيەسى ارقىلى اقشا اۋدارىمدارىنىڭ جيىنتىق كولەمى 21% - عا ءوستى، دەپ حابارلايدى Almaty-akshamy.kz 

«وسى جۇيەلەر ارقىلى اقشا اۋدارىمدارىنىڭ جيىنتىق كولەمى 2021 جىلى 1،364 ترلن تەڭگەنى قۇرادى. ترانزاكسيالار سانى - 4،3 ملن. 2020 جىلمەن سالىستىرعاندا، بۇل كورسەتكىشتىڭ 21%-عا ءوسۋى بايقالادى. قازاقستاننان شەتەلگە اقشا اۋدارۋ كولەمى 28،3%-عا ۇلعايدى، شەتەلدەن قازاقستانعا اقشا اۋدارۋ كولەمى 1،2%-عا قىسقاردى»، - دەلىنگەن ق ر ۇلتتىق بانكىنىڭ حابارلاماسىندا.

بۇل رەتتە ەل ىشىندەگى اقشا اۋدارىمدارىنىڭ كولەمى 35،4%-عا ارتىپ، 70،4 ملرد تەڭگەنى قۇرادى.

2021 جىلى قازاقستاننان شەتەلگە حجت ارقىلى جىبەرىلگەن اقشا اۋدارىمدارىنىڭ كولەمى 1،010 ترلن تەڭگەنى قۇرادى. شەتەلگە اقشا اۋدارىمدارىنىڭ نەگىزگى ۇلەسى وزبەكستانعا (29،5%)، تۇركياعا (20،9%)، رەسەي فەدەراسياسىنا (17،5%)، قىرعىز رەسپۋبليكاسىنا (14،3%) تيەسىلى.

مەجەلى كەزەڭدە شەتەلدەن قازاقستانعا 283،5 ملرد تەڭگە ءتۇستى.

قازاقستانعا اقشا اۋدارىمدارى نەگىزىنەن رەسەي فەدەراسياسىنان (18،7%)، وزبەكستاننان (17،6%)، وڭتۇستىك كورەيادان (14،0%)، قىرعىز رەسپۋبليكاسىنان (12،0%) جانە اقش-تان (11،8%) جۇزەگە اسىرىلدى.

قازىرگى ۋاقىتتا قازاقستان اۋماعىندا حالىقارالىق اقشا اۋدارىمدارىنىڭ 8 جۇيەسى جۇمىس ىستەيدى. ولار: «زولوتايا كورونا»، «ۆەستەرن يۋنيون»، «يۋنيستريم»، Contact، Faster، MoneyGram جانە باسقالار.