كوگىلدىر وتىننىڭ بولشەك ساۋدا باعاسى ءبىر جىلدا 5 پايىزعا قىمباتتاعان.
2022 جىلدىڭ قاڭتار-اقپان ايلارىندا قازاقستاندا 10 ملرد تەكشە مەتر تابيعي گاز ءوندىرىلدى، بۇل ءبىر جىل بۇرىنعىدان 9،2%-عا ارتىق، دەپ حابارلايدى Almaty-akshamy.kz ەnergyprom.kz سايتىنا سىلتەمە جاساپ.
سونىڭ ىشىندە گاز كۇيىندەگى ءونىم 4 ملرد تەكشە مەتردى قۇرادى، ىلەسپە مۇناي 6 ملرد تەكشە مەتر بولدى.
وندىرىلگەن گازدىڭ قۇنى 52،2 ملرد تەڭگەنى قۇرادى (ونەركاسىپتىك ءوندىرىس يندەكسى – 108،9%).
ءوندىرىستىڭ باسىم بولىگى، ارينە، اتىراۋ وبلىسىنىڭ ۇلەسىنە ءتيدى: 4،6 ملرد تەكشە مەتر، جىلدىق ءوسىمى – 18،3%-عا ارتىق. ۇزدىك ۇشتىككە ادەتتەگىدەي باتىس قازاقستان (3،7 ملرد تەكشە مەتر) جانە اقتوبە (1 ملرد تەكشە مەتر) وبلىستارى دا كىرەدى.
انىقتاما ءۇشىن: جالپى 2021 جىلدىڭ قاڭتار-جەلتوقسان ايلارىندا ەلىمىزدە 54،3 ملرد تەكشە مەتر تابيعي گاز وندىرىلگەن، بۇل ءبىر جىل بۇرىنعىدان 1،5%-عا از.
تابيعي گازدى تىكەلەي كوممەرسيالىق باعىتتاعى وندىرۋگە كەلەتىن بولساق، 2022 جىلعى قاڭتاردا قازاقستاندىق كومپانيالار نارىقتىق سۇرانىستى (ىشكى نارىقتاعى ساتۋ مەن ەكسپورتتى قوسا العاندا) 54،3%-عا قامتاماسىز ەتتى، بۇل كورسەتكىش ءبىر جىل بۇرىن 46،4% بولعان. يمپورتتىڭ ۇلەسى تيىسىنشە 45،7%-دى قۇرادى. ەلىمىزگە 902،2 ملن تەكشە مەتر گاز اكەلىندى، بۇل كورسەتكىش 2021 جىلدىڭ قاڭتارىمەن سالىستىرعاندا 30،8%-عا از.
بۇل رەتتە ەكسپورتتىڭ ۇلەسى 45،2%-دى قۇرادى. قازاقستان 891،6 ملن تەكشە مەتر تابيعي گاز ەكسپورتتادى. قازاقستان قاڭتاردا گازدى تەك رەسەيگە عانا تاسىمالداعان. ەسكە سالا كەتسەك، قازاقستان مەن رەسەيدىڭ ينفراقۇرىلىم ماسەلەلەرىنە قاتىستى گاز سالاسىندا ايىرباس وپەراسيالارىنىڭ ءبىرقاتار سحەمالارى بار.
2022 جىلدىڭ قاڭتارىندا ىشكى نارىقتاعى ساتۋ كولەمى 38،3%-عا ازايىپ، 1،1 ملرد تەكشە مەتردى قۇرادى.
قازاقستان رەسپۋبليكاسىنىڭ ىشكى نارىعىندا اعىمداعى جىلدىڭ اقپان ايىنىڭ قورىتىندىسى بويىنشا گازدىڭ تۇتىنۋ باعاسى ءبىر جىلدا 5،4%-عا قىمباتتاعان.
باعانىڭ ءوسۋى ەلىمىزدىڭ 17 ءوڭىرىنىڭ 14-ىندە بايقالدى. شىعىس قازاقستان وبلىسىنىڭ تۇرعىندارى باعانىڭ قىمباتتاۋىن قاتتى سەزىندى، وڭىردە باعا ءبىر جىلدا 14%-عا وسكەن. قىمبات ۇشتىككە ماڭعىستاۋ (12%- عا وسكەن) جانە سولتۇستىك قازاقستان (11،7%- عا وسكەن) وبلىستارى دا كىردى. ەڭ از جىلدىق ءوسىم ەلوردادا تىركەلدى – 0،7%. گاز باعاسى ءۇش ايماقتا: شىمكەنت، قىزىلوردا (ءار وبلىستا 2%-عا) جانە تۇركىستان (4،4%-عا) وبلىستارىندا ارزانداعان.
