قازاقستاندا ەۋروپالىق قوي تۇقىمىن تۇرلەندىرۋ زەرتحاناسى اشىلماق

جوبا اراب ينۆەستورلارىمەن بىرلەسىپ ىسكە اسىرىلادى.

بۇل تۋرالى «ۇلتتىق اگرارلىق ءعىلىمي-بىلىم بەرۋ ورتالىعىنىڭ» ءتوراعاسى دارحان بالپانوۆ ايتتى، دەپ حابارلايدى Almaty-akshamy.kz.

بۇگىنگى تاڭدا ەلىمىزدە ەكى گەنەتيكالىق زەرتحانا بار. وندا قوي تۇقىمىن اسىلداندىرۋ جۇمىسى جۇرگىزىلەدى. قازاقستانداعى قوي ەتىنە اراب ەلدەرىنىڭ قىزىعۋشىلىعى زور. ال ەلىمىزدىڭ بۇل تۇرعىدا الەۋەتى ۇلكەن. ەندىگى جىلدان باستاپ اراب ەلدەرىمەن بىرگە قوسىلىپ، 2 ملن ەۋروعا باعالانعان زەرتحانا قۇرىلماق. 

 «جالپى، ستراتەگيا بويىنشا، عىلىمي ينستيتۋتتىڭ دەڭگەيىن كوتەرىپ، فەرمەرلەرگە ۇرىقتاندىرۋ تەحنولوگيالارىن جەتكىزۋ ويىمىزدا تۇر. ال جۇنگە ەلىمىزدە سۇرانىس بولماسا دا، شەتەلدە سۇرانىس كوپ. سوندىقتان سەلەكسيا جۇمىستارىن اتقارۋ كەرەك. ول جۇمىستار دا عىلىمي ينستيتۋتتارىمىزدا جۇرگىزىلىپ جاتىر. ءبىزدىڭ ماقساتىمىز – سەلەكسيانى دۇرىس ۇيىمداستىرىپ، ءتيىمدى ناسىلدەر شىعارىپ، سول ماسەلەنى فەرمەرلەرگە جەتكىزۋ. ال مەملەكەت تاراپىنان ءونىمدى شەتەلگە شىعارۋدىڭ مۇمكىندىكتەرىن ىزدەۋ ماڭىزدى»، - دەيدى «ۇلتتىق اگرارلىق ءعىلىمي-بىلىم بەرۋ ورتالىعىنىڭ» ءتوراعاسى دارحان بالپانوۆ.

كورمەگە الەمنىڭ 20 ەلىنەن 300 دەن استام كومپانيا قاتىسادى. ورتالىق ازياداعى ەڭ ءىرى كورمە ەرتەڭ ەكسپو كورمە كەشەنىندە وتەدى. ەكى بولىكتەن تۇراتىن جارمەڭكەنىڭ ءبىرى مال شارۋاشىلىعىنا ارنالسا، "قاز اگرو" كورمەسى ەلدەگى تۇقىم شارۋاشىلىعىنان باستاپ، ۇن ءوندىرىسىن دە قامتيدى. سالانىڭ وزىق تەحنولگيالارى تانىستىرىلاتىن الاڭ وتاندىق شارۋالار ءۇشىن تاجىريبە الماسۋعا تاپتىرمايتىن مۇمكىندىك، - دەيدى ماماندار.